「男人四十而不惑」正正在現年40歲的林詠倫（Alan）身上看到，從前年與前女友感情出現問題，即使他澄清事件，亦被負面報道而困擾，Alan於人生低潮時明白再艱難也要面對。去年社會運動加今年疫情，原先教跳舞的工作也備受影響。在零收入低下，去年底，Alan聽取女友意見一齊經營湯水外賣生意，今年再挑戰《全民造星III》，下一步是穩定收入後成家立室。
Alan指2018年初E-kids舉行演唱會後，一直任教跳舞工作，直至傳出負面新聞，整個人都跌進低潮，加上去年的社運，即使想派歌也沒用，惟有阿Q一點去想，抱着E-kids打不死的精神，當從頭洗牌再來過，加上女友覺得追夢前也要有足夠收入支撐，於是提議他做生意，原先Alan心想開跳舞學校，他說：「女友爸爸分析跳舞可以跳到幾歲呢﹗而Uncle做過吓飲食，所以就決定一齊做飲食當係挑戰。」
從上年9月有念頭做湯水外賣生意，然後租到現時的食物工廠，他說：「接場嗰時，一打開個雪櫃就有個臭咗嘅蛋糕，對於我呢啲太子仔，平時執嘢都懶，但為咗慳得就慳，同女友細佬夾手夾腳去清潔，當係一種體驗。」開業後又親自拉車仔送湯水外賣，曾經在舞台上被fans呼叫追捧，到拉着車仔送外賣，Alan坦言有失落感：「當時戴晒帽同口罩送外賣，我係有啲唔開心，正如我當時喺網上分享咗張相，幾年前仲為演唱會綵排，幾年後就送外賣。不過好快就當係新嘗試，fans訂湯我一定親自送，仲會影合照留念，係好開心，當放下身段後就覺得幾型呀。」
昔日隊友阿Tim及不少圈內朋友都大讚Alan的勇氣，Alan從入貨、煲湯，以至送外賣，事無大小都親力親為，讓自己每個崗位都能勝任，甚至連過年時售賣的海味禮盒，也是他親自入盒及貼招紙，他說：「做生意上，我學到係要守，唔好因為蝕就放棄，我曾經覺得只係得個做字，仲蝕錢，不如執咗佢，但女友話唔得，因為要做好信譽。」
疫情下默默經營生意同時，機緣下參賽《全民造星III》，節目出街前Alan已成話題人物，全因他已年屆40歲，足夠當部份參賽者的爸爸，入圍前一度被監製黃慧君（花姐）考慮拒於門外，參賽時又顯得跟年輕參賽者格格不入，Alan說：「我參賽唔係想要啲乜，係唔甘心，Alan真係咁就一世？我做乜都3分鐘熱度，除咗（演出）工作係堅持，我想知如果冇E-kids，我咁嘅年紀可以做成點。」他承認50強首次集訓課時，眼見全場都是年輕人，曾擔心會被人寸，他笑說：「佢哋一啲都唔串，當我介紹自己係E-kids Alan時，好多人都呆咗，小息時仲成班走埋嚟問我E-kids當時啲經驗，我話我都唔叻，如果唔係都唔會坐喺度一齊參賽，當刻就覺得自己有啲用。」排舞初期，因為舞步與以往所學的不同，他笑指自己如腦閉塞，記得當時每次食飯時，自己都快快吃兩啖便再走入排舞室練舞步，到不明白時再請教隊員，怎料就變成一班人再練，他直認練到腰痠骨痛，連上一級樓梯也艱難，不過每次見到班年輕隊友又忘記痠痛。
參與《全民造星III》過程令Alan有所得着，首先是重建自信，以往他覺得表演只要着靚衫取悅觀眾便可，但只能在一剎那有用，之後便沒有人記得，原因是表演中不夠真心去做，但上了梁祖堯堂後令他明白何謂真正演出，他說：「我記得《This is Me》甩嘴一直搵唔返個Key，點解會咁，有咁嘅機會都做成咁，我返到去攬住女友喊。直至到演出《給十年後的我》，估唔到回響好好，好記得花姐攬住我話『由我唔鍾意你，直至欣賞你，到而家有啲鍾意你。』夠啦，我已經無憾。」這次作品從排練至演出，Alan都好深體會，也是入行多年首次感受到跟觀眾真正心連心聯繫，他說：「可能感動嘢唔關你事，但你會感受到真心演出，同埋為你打氣感覺，係好深感受、好虐心同好傷身演出，正如林二汶話好嘅作品係永遠留傳。」
以往出騷時，Alan為求做到最好，可能會貼錢或拍膊頭找舞蹈員伴舞，女友覺得他只要唱好歌便夠，不用做太多花巧事，因此兩人不時為此爭拗。直至女友主動提出跟他入錄影廠看他參賽，便深深感受到Alan為何要堅持如此。從參賽中有所得着，再得到女友理解，Alan坦言珍惜在《全民造星III》的一分一秒，離開時也是笑着，沒有遺憾，他說：「出局第2日，一瞓醒唔知做乜，空虛咗2、3日就開始食嘢同女友買好多維他命畀我補返。」
出局後，Alan的熱血及堅毅獲不少客戶欣賞，他指有好多相關產品聯絡他合作，同時跟A隊隊友保持聯絡，若果有合適的工作或訪問，都會轉介給他們，他說：「我以前出道仲有公司幫，所以有啱佢哋咪畀聯絡佢哋去傾，我就唔想錢銀過我手，佢哋都好開心，我話將來有工作可以介紹返畀我。」
與女友拍拖兩年，她一直在旁支持自己，又在生意上給予不少意見，問到何時將女友收歸做賢內助？他說：「嚟緊要啦，等我真係收入穩定，我知佢好想要小朋友，其實而家都朝夕相對，一齊做生意，一齊生活，但我唔敢承諾係怕我做唔到，但身邊啲朋友就好想（我哋結婚），成日話包我5圍，好似演唱會咁話包5行咁，我都好想，總之我一有起色就結婚，或者簽咗紙先，佢都係想要安全感。」Alan指女友細自己10年，但生活上不少事都由女友給予意見及提點，他笑言：「我就好似大細路咁，成日要佢氹我。」
採訪：馬建華
攝影：陳俊強
化妝：LottoVi
場地提供：AK workshop
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|