2020年12月7日星期一

【估佢唔到】畫作太靚被質疑劉心悠希望開慈善畫展 #劉心悠

【估佢唔到】畫作太靚被質疑劉心悠希望開慈善畫展

劉心悠近日為慈善活動繪畫，相隔8年重拾對畫畫的熱愛。

因為抗疫留家，令劉心悠相隔8年重拾畫畫興趣。早前野生動物保護組織發起「End The Trade」的活動，邀請心悠繪畫野生動物畫作，以及拍攝宣傳短片，喚起大家關注。

拍攝當日心悠把畫作帶到現場，不論導演或是工作團隊看到畫作後都不禁嘩然，心悠不解表示:「點解大家會有咁大反應，其實我喺加拿大讀書係讀Design，識畫畫係基本！有同事見到幅畫質疑係咪我畫，好在畫嘅時候有朋友幫我拍片。」這次心悠需要繪畫野生動物，而她最後選擇了畫大象，她解釋：「本身收到佢哋畀我嘅參考圖，係一啲後現代風格，佢哋冇規限我，最後我喺網上做research，見到一幅Real Life嘅大象相，隻大象BB嘅眼神好無助，我覺得好切合今次主題，所以最後我就畫咗呢幅Real Life嘅大象BB。」

有工作人員質疑畫作是否心悠本人繪畫，心悠表示幸好過程有被拍下，力證畫作是親手繪畫。

對心悠來說，拍攝今次宣傳短片除了要畫畫，還有另一個挑戰，就是跟三位小朋友一同拍攝，心悠笑言：「拍攝一向最大困難就係遇到動物同小朋友，今次拍攝啲小朋友都好得意，亦算好聽話不過當佢哋唔受控制嘅時候就需要啲耐性，同埋佢哋拎住支畫筆周圍畫，我當時好擔心佢哋會畫花我幅畫，如果真係畫花咗我會好傷心，畢竟我都用咗好多時間準備，畫咗8個鐘。」

劉心悠為野生動物保護組織發起的活動「End The Trade」，拍攝宣傳短片。

是次拍攝令心悠重拾畫畫的熱情，表示之後會繼續畫畫，更表示開畫展是她的未來目標，她說：「我會繼續畫畫，但唔會為咗開畫展而畫，同埋開畫展一定要有一個目的，舉例可以為慈善，或者喚起一啲值得大家關注嘅事情！」心悠坦言下一副畫要等有靈感才開筆：「或者下一幅畫可能畫垃圾，其實垃圾都可以有好多種解釋，除咗一舊垃圾，垃圾都可以形容一啲事情等等。」心悠透露，今次活動除了畫作是自己親手繪畫外，連工作室的畫架也是她親自做木工及裝嵌的，非常有誠意。