《萬千星輝頒獎典禮2020》曲終人散，近日陸續有唔同嘅花絮出爐，無綫搵嚟一班主持做後台直播，當中《東張西望》嘅「爆喊主持」黎寬怡竟被發現失禮街坊，事關佢訪問到「最佳男配角」白彪嘅時候，竟然為咗影合照而9秒9閃人，淨低前輩白彪呆企鏡頭前，即被網友喪插佢唔識尊重人兼冇禮貌！
喺後台直播中，黎寬怡原本同白彪做訪問，訪問結束之後有位工作人員同佢講咗句：「可以影相喇！」點知黎寬怡竟然一個華麗轉身將咪牌塞畀另1位工作人員，仲大叫一聲之後閃人！白彪亦畀佢嘅舉動嚇親，六神無主咁擰轉頭跟對方一齊跑，搞到揸cam哥哥都要出口叫住「彪哥！彪哥！彪哥……」佢先停落嚟回頭，一臉茫然，然後再由工作人員帶引離開。
片段於網上公開後，網友即大鬧黎寬怡好失禮，冇禮貌兼唔識得尊重：「前輩都未走開，佢就自己跑走」、「真係好唔識大體，出唔到大場面」。
黎寬怡自出鏡以嚟，一直表現「出位」，佢最令人印象深刻係曾喺訪問期間爆喊，訪問張衞健時太緊張喊咗出嚟，跟手佢訪問黃宗澤又喊，連佢拍《東》時去老人院試着約束衣都喊。
來源 source: http://hk.on.cc
|
鍾意就快D Share啦！
|
|
|
