一代西宮娘娘李香琴於上周一病逝，享年88歲，本月25日在紅磡世界殯儀館舉行喪禮，翌日大殮，並隨即出殯奉柩哥連臣角火葬場火化；昨日是琴姐的頭七，譚炳文女兒譚淑瑩（貞貞）在社交網貼合照悼念，並為琴姐點了一盞佛燈。
貞貞寫道：「琴姐頭七，聊表心意，點燈誦經迴向；祈願你早登極樂世界，阿彌陀佛」相中的琴姐面容飽滿，氣色紅潤，搽了橙紅色指甲油，臉上和手上的皮膚都白淨光滑，保養得宜。貞貞接受《蘋果》訪問表示，這張相片拍於3年前，「之後都有去探琴姐，雖然好熟，但唔想貼佢後期嘅相，要尊重佢。」貞貞指最後一次見面是農曆年，「琴姐後期都好靚，工人將佢打扮得好靚。」
琴姐跟炳哥是多年好拍檔，貞貞自細已認識前輩，以前不時往探望老人家，不過，3年前拍攝這張相片時，炳哥沒有同行，「爸爸幾年前身體已經唔好，雖然仲有返工，而琴姐嗰時開始唔認得人，爸爸話拍檔咁耐，見到好傷心，不如唔去。」而貞貞最記得當年陪爸爸同琴姐去外地登台，主辦安排了兩間總統套房給他們，「佢哋兩個都有少少怕黑，獨自喺房好驚，用英文叫嘢食又麻煩，當時我同老竇一間房，琴姐話：『我自己瞓好驚，不如你過嚟。』我提議佢哋住埋一間總統套房，爸爸瞓主人房，琴姐瞓客房，兩間房都有獨立洗手間，我方便照顧。」貞貞還記得當年跟他們走埠時，過海關檢查要除鞋除襪除褸，「我幫佢哋攞到成手都係，好似《歡樂今宵》啲趣劇，好好笑。」
炳哥去年走了，琴姐現在亦走了，昨日琴姐頭七，貞貞在佛堂為琴姐點佛燈，「佢屋企冇宗教，我自己信佛，覺得點燈最好，少少心意。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB
來源 source: http://hk.appledaily.com
|
鍾意就快D Share啦！
|
|
|
