歌手吳業坤趁30歲去日本Working Holiday（工作假期），喺疫情下去年11月頭帶咗幾萬蚊出發，唔經唔覺已經喺當地關西留咗2個幾月！最近佢越洋接受鄭裕玲（嘟嘟）電台訪問，當嘟姐問佢有冇做過嘢時，佢就話未，仲係待業中：「No Working嘅Holiday！」不過都有搵工，想去牧場、滑雪場或者旅館，但都要做1個月以上，又唔知會唔會要返香港做嘢，所以都係算，同埋打算新年前返香港，而香港嘅唱片公司都不斷問佢幾時返，不過想延長Visa，咁可以隨時再去日本！
嘟姐問到佢日文有冇進步，佢就話基本都聽到，同埋有去上空手道堂，可以同日本人練習。至於佢留咗2個幾月唔覺得悶？佢就話：「都有啲思鄉，2個月唔做嘢都有少少覺得自己好似好廢！」每日瞓到自然醒，之後做吓運動，鍾意就煮吓飯，唔煮就出去食飯，睇吓書咁就好快夜晚！而租金大概係每個月大概3、4千港元。而睇佢社交網，見佢不時上載嘢食相，又睇吓風景搭吓JR，好似非常寫意，不過佢笑言唔係淨係放假，有帶到啲錄音器材去錄嘢、影吓相，咁返到香港就有材料開工喇！
來源 source: http://hk.on.cc
|
鍾意就快D Share啦！
|
|
|