出身於演藝世家的林曉峰（阿Lo），在1993年入行做藝人，雖然他當時戴着家姐林珊珊、哥哥林海峰及舅父狄龍的光環，但似乎對他的演藝事業沒有幫助，早前阿Lo為ViuTV節目《晚吹 — 有酒今晚吹》做嘉賓，主持之一的練美娟細數這段關係，阿Lo笑說：「你數呢一個，可能而家有啲朋友會話『邊個嚟架』？其實可能我家姐阿哥而家呢一代啲人真係未必認識，可能你哋話譚俊彥係我表弟，佢哋反而會話『乜原來佢係你表弟嚟』！」阿Lo坦言以前覺得有這背景是一件壞事：「從來冇人話我做得好，係調轉！當你有咁顯赫嘅背景，個牌坊咁厲害，就算你做幾多嘢，人哋都會覺得你唔好，佢哋家人最好。我阿哥同家姐係十大DJ嘅阿頭，我舅父狄龍係東南亞影帝，佢屋企啲獎一排排擺滿，好勁架，所以嗰陣我係點做都死嘅！」
阿Lo續說：「以我咁嘅樣貌同學歷，其實能夠捱到而家真係要感恩。最初我覺得係障礙，做咗十年八年之後就諗，點解做人唔可以去感激有一個咁好嘅屋企人、咁好嘅背景，我可以行到條捷徑，點解我唔行？呢個捷徑唔係我做壞事得到，係我屋企畀我，係上天安排，點解唔多謝屋企人，只要我唔好做壞事，影響我屋企人就得嘞！」在往後的日子，阿Lo坦言在工作的發展逐漸順暢：「而家呢個年紀，更加覺得開心就得，同所有合作夥伴能遇上已經係開心事，開開心心去做所有工作，暫時係我唯一嘅任務。」
在節目內亦提到與鄭伊健的「古惑仔」關係，阿Lo說：「嗰陣我哋都冇期望戲有幾賣，點知播完午夜場反應好好，仲話即刻再開第二集，雖然我哋有一段時間唔係成日見面，到喺2014年先再一齊開演唱會，不過大家嘅感情都好好，好似屋企人一樣，做完演唱會之後，大家齊齊飲酒，唔夠一個鐘就極速『冧』！」阿Lo亦大爆最好酒量的人是鄭伊健：「佢好飲得，係千杯不醉嘅酒筲箕嚟，佢飲醉後會不動聲色咁坐喺度，好似冇嘢咁，聽朋友講伊健最醉一次，最初係好似華英雄咁坐喺度，轉個頭叫人拎個酒桶畀佢，結果嘔滿咗三個酒桶！」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|