Paul和朱茵日前合體挑戰「愛情五秒定律」。
適逢元宵佳節（26日），相愛超過廿載的黃貫中（Paul）和朱茵，日前合體挑戰「愛情五秒定律」，當問到被老婆激嬲的3個原因時，Paul即「機關槍式」搞笑道：「天氣凍着唔夠衫、肚餓又唔食嘢、亂放雜物、唔願起身、遲到⋯⋯咦，原來可以講到咁多。」語畢朱茵笑稱要罰對方頂痰罐，場面爆笑！隨後，問到太太身上3個最大的地方？朱茵一向以身材豐滿見稱，惟Paul沒有講出對方的「D Cup上圍」，反而說是「眼大、嘴大和志氣大」，o氹得愛妻全程笑不攏嘴。
朱茵投訴Paul婚後出街只拖囡囡，又會狂窒她。
至於老公婚前婚後的不同之處，朱茵便趁機投訴：「以前出街一定會拖實我，而家就會拖阿囡（黄鶯）；仲有以前唔會窒我，婚後就係咁窒。」不過，講到Paul具備的3個好老公條件，她甜絲絲地表示：「大力、任我差遣，而且會煮飯畀我食。」Paul聞言反擊：「講緊好老公條件，唔係揀工人喎！」最終朱茵於賽事中落敗，並向Paul獻上香吻作為元宵禮物，認真Sweet爆！
黃氏夫婦於人前人後都非常恩愛，Paul不諱言經常有人向他取經，也坦言一齊「唔悶就呃你」，故需學習如何避免這種悶，他教路：「最重要唔好有一個奉旨嘅心態，例如太太為你煮飯，你要識得欣賞，要覺得每一餐飯都係第一次，將呢個心態套用喺所有事情上，就唔會覺得悶，反而好新鮮。」朱茵也建議一眾有情人為生活加添情趣，有助增進感情：「尤其而家喺屋企嘅時間多咗，可以嘗試多啲唔同嘅嘢，最近我哋會等囡囡瞓覺後，一齊砌3D模型，都幾好玩，同埋我哋晚晚都會睇戲。」
雖然因育兒理念不同偶爾爭執，但夫婦倆都會主動認錯，「愛妻號」Paul更自有一套「爭吵哲學」，他說：「吵架輸咗，固然係輸；贏咗你都有排捱！既然輸贏都係處於輸家嘅狀態，奉勸各位男士最好就唔好同另一半嘈，係咪都認錯先。」
適逢元宵佳節，黃氏夫婦拍片大玩遊戲。
來源 source: http://eastweek.my-magazine.me
|
鍾意就快D Share啦！
|
|
|
