廖啟智安息禮｜遺孀陳敏兒分享感人往事 曾因遲見一日攬住哭成淚人
- 發布日期：2021-04-20 15:19
已複製
智叔廖啟智的安息禮，遺孀陳敏兒分享「背包客窮遊歐洲兩個月」的往事。感人，亦體現智叔為人無得頂！
「由於慳嘅原故，我哋買啲便宜機票，唔係直航，要搭成廿幾個鐘。點解弊喇，計錯數，原定10號返香港，點知個時差係11號先到香港。弊喇，告假告到10號，於是打電話同TVB講要告多一日假。點知TVB話唔得，10號有工開，廖啟智要返嚟拍外景，不能夠延長多一日。點算好呢？無辦法啦，嗱嗱聲買單程飛機票，用直航方式準時10號返到香港。為咗慳，我就照搭廿幾個鐘頭嘅航班，遲一日返到。
同一日去到機場，佢入閘，10號返到。我就遲三個鐘頭上機，搭廿幾個鐘，11號先返到。佢入閘時回頭望我，跟住就流眼淚。我見佢喊，忍唔住又喊，於是兩人攬住喺機場閘口喊成淚人。真係慶幸當時無人問我：『佢要移民呀？你哋3年後先有得見？』如果我答佢：『唔係，一日後就見。』我諗真係會被人鬧。
去到今時今日，呢個往事就提醒咗我，原來生離死別，哪怕你知道好快會同佢重聚都好，你仍然會唔捨得，就好似此時此刻。
佢喺病房時，佢知道自己就快要離開，佢好多眼淚、好多唔捨得，佢嘅唔捨得正正因為佢係個有責任嘅人，放唔低啲仔同老婆。佢同我講：『敏兒，我諗住我係殿後㗎！而家要留低你，辛苦你喇！』佢就係個咁有責任嘅人，佢唔係害怕死亡，佢只係好唔捨得我哋。不過，我哋三個(兩名兒子)好想畀佢知道，其實我哋好掂、好照顧到自己……」
- 陳敏兒與兩子均有分享與智叔的往事。
- 安息禮上播放的舊照。
----------------------------
和你壹起撐住香港主題海報 全港良心商戶免費派發
了解更多
----------------------------
和你壹起撐徽章 良心商店及網店有售
了解更多
-----------------------------
守住新聞自由 和你撐壹週刊計劃 每月港幣$300起
按此了解更多
－－－－－－－－－－－－－－－－－－－－
來源 source: http://nextplus.nextmedia.com
|
鍾意就快D Share啦！
|
|
|
