2021年6月8日星期二

【細個好靚】真性情網友勁Like　《造美人》地盤妹OK疑改造後新Look曝光

《造美人》參賽者OK人氣急升，其疑似新造型曝光！

ViuTV另類選美真人騷《造美人》早前公開16強資料，旋即掀起網上熱話，事關有別一般選美比賽，未經「雕琢」的參賽者們需參與3個月的飲食調校及身體塑形課程，甚至進行醫學美容級的整形療程，令一眾網民都大讚參賽者好有勇氣！節目終於在昨晚首播，第一集共7位參賽者率先登場，當中5人順利晉身12強，包括2號張育玲（Kathy）、3號劉兆汶（AB）、4號歐陽玉婷（Miko）、6號胡靄琪（OK）及8號林珊妮（Shweta），剩下的1號劉芷橋和5號冼潁琹（Georgia）則被安排到候補區。

報稱26歲、任職建造工程及管理業的OK，雖然外貌被嘲同「專家Dickson」撞樣，但《造美人》播出後，憑着其「有嗰句講嗰句」的真性情，為節目帶來唔少歡樂之餘，仲令她贏得唔少觀眾歡心。在地盤工作的OK甫上台表示，經常「風吹雨打，日曬雨淋」搞到滿面雀斑，故希望透過節目「執靚個人」，被主持人強尼問到返工係咩Look？她坦言打扮嘥時間，「戴副眼鏡、搽防曬就得㗎喇，因為我每日都着住件死人公司制服，我換件衫同褲子就上去，咁鬼遠，我淨係來回着畀大家睇呀？又出汗，搞到塊面出晒油，咁我為乜啫？」語畢引發全場大笑，OK續笑道：「唔好意思，我已經辭咗職㗎喇。」

對於戴眼鏡現身初選，OK笑稱以為面試好Hea，加上自己都「有少少懶」。隨後回顧首輪及次輪面試片段，OK當時不諱言：「其實我覺得自己而家都OK，但可以再靚啲，我想執眼袋，腮骨可以執番細少少，雀斑都應該容易解決，其他算喇，身就算喇。（如果我哋可以幫你變到好靚，你跟唔跟到我哋步伐？）咁都要畀我睇吓你畀啲咩我㗎，大佬！你畀我就要㗎喇咩！」最後OK自言「搞錯少少嘢」，本來以為只是扮靚做Facial，後來獲通知殺入16強才得悉自己參加了選美。

OK笑言「搞錯少少嘢」，本來以為只是扮靚做Facial的節目，未料原來是選美比賽。

騷後OK旋即遭起底，看到其童年照後，一眾網民更以「靚女」形容，十分可愛。4天前，OK的好友亦於IG貼出二人合照，相中，化了淡妝的OK疑已矯正牙齒，睇落索咗好多，未知該圖是否經節目「改造」後的新Look呢？

其實不少網民睇完《造美人》後，也紛紛開Po讚OK：「講嘢好直，我鍾意」、「佢好好笑，好真實」、「性格幾可愛」、「呢個好pure好true」、「好《表姐，妳好嘢！》feel」、「鍾意佢夠自信」等，亦有人認為她：「五官面形唔差，箍埋牙打扮下爭好遠啦。」甚至有網民覺得，OK和「女版KLAU」Miko都好有喜感，即使落選也可以轉拍綜藝節目，仲叫ViuTV簽二人為旗下藝人。