《金像獎》影帝終於揭盅，一如東網所料，賽前大熱劉青雲揮低麥沛東，憑《神探大戰》奪得最佳男主角，這是他繼2007年《我要成名》及2015年《竊聽風雲3》後，第3度在香港《金像獎》稱帝，認真威水。
劉青雲上台表示：「好多謝楊生（楊受成）投資者，同埋台前幕後，陪我度過好多個孤獨嘅晚上，多謝幾位漂亮嘅女孩子幫我搵呢件戰衣，仲有我太太同我嘅團隊，佢哋一向都係神探，用咗一般人未必能夠忍受嘅能力去工作，一日接受一次核爆，如果大家有夢想，只要肯努力，夠長命，夢想就會有一日，好奇怪亦帶點遺憾咁去實現，不過，唔緊要世事豈能盡如人意，我仲要多謝鏡頭前嘅大家，熱愛香港電影、熱愛香港嘅朋友，掌聲、噓聲我都會接受，因為總好過無聲。」
劉青雲接受訪問時，對於頒獎嘉賓吳鎮宇指現時影壇青黃不接，他說：「佢真係一個好幽默嘅人，其實佢嘅演技值得一早攞獎！（你點慶祝？）冇打算慶祝，因為聽日仲要開工，拍翁子光嘅新戲，如果大家見我頭先心神恍惚，真係要理解，因為我第二日要開工。」至於太太郭藹明是否已發祝賀短訊，他說未有時間睇：「我諗佢都會有啩！唔係咁都冇嘛？我好開心，因為今年金像獎搞得好好，見到咁多新導演同新演員，係一個新時代嘅開始，香港電影好有希望，係好事。（想同邊位新人合作？）冇呀，因為我都唔係好知佢哋咩名，依家拍戲同以前唔同，除咗科技先進咗之外，大家都客氣同好有禮貌、學識，好有自己想法，所以令我覺得香港電影好有希望。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|