第41屆香港電影金像獎今晚（16日）在尖沙咀文化中心舉行，今午在海濱長廊大樓梯舉行的紅地氈環節，成為一眾女星爭妍鬥麗的戰場，在入圍角逐的女星當中，最搶「峰」頭，莫過於是角逐「最佳女配角」的馬來西亞女神林明禎半「裸」上陣！林明禎所穿的低胸裙不單令她奇「峰」凸出，上半身裸色兼透視設計，令雙峰若隱若現狂增吸睛度！至於角逐「最佳女主角」的女星袁澧林一身黑裙看似冇睇頭，其實內有乾坤，胸口的黑色蝴蝶結設計，即時有「漏奶」效果！至於未有提名的王丹妮一樣搏到盡，一身水晶珠片設計的高訂晚裝，露腰低胸兼大露背！
林明禎接受訪問時被問到以性感打扮上陣，她即打趣反問：「係呀！又露背！我夠唔夠誠意呀？我第一次着到咁樣，真係好唔慣、好驚，又低胸又透視，好似透視360度咁！因為之前係睇片揀衫，覺得條裙好公主裙，但着起上嚟原來係透視，但已趕唔切揀另外一套衫，我覺得係天意。今日我都着得唔係好自然，我細佬有陪我嚟，不斷提我唔好佗背，要挺胸收腹企直啲。」
至於袁澧林說今日的打扮尚算安全，問到為何未有谷胸，她笑說：「吓！我冇咁多呀！對我嚟講算係性感，大家覺得呢？（為着戰衣而之前禁食？）尋日開始偷懶，因為覺得就算食咗嘢，都唔會咁快肥，但之前有戒糖，希望着得靚啲，因為今日係我人生中幾大場合之一，好開心喺香港出席呢個頒獎禮，因為香港係我成長嘅地方，可以同大家分享喜悅，對我嚟講好重要。五、六年前我做過金像獎嘅MC，當時有人問我同金像獎有幾遠，當時我覺得係北極，覺得呢個夢好遠，所以今日可以喺度心情激動。」
王丹妮指身上靚裙是高級訂造服，特別從外國運來：「因為要隆重其事嘛，為咗呢條裙都唔敢食咁多嘢，同埋條裙都重有成10幾、20磅重。（驚唔驚太重墜咗落嚟走光?）唔驚，因為掛咗係條頸度，呢條裙都係我性感極限，但我都打足底，造型師畀咗一啲貼士我去防走光，所以都好安全。（去洗手間會唔會好麻煩？）都唔會，平時一樣，好方便。」
另外，「宅男女神」鄧月平亦有現身，穿上性感晚裝亮相的她，為了隆重其事擔任紅地氈主持的她特別帶了兩套衫來換，問她如此性感有無做足安全措施？她笑言：「件衫好安全，唔會走光。（妳搶晒鏡？）呢排拍打戲瘦咗，可以勇敢啲着衫。」莫文蔚與古巨基結伴進場時，一度被裙Kick一Kick，幸沒有絆倒。
本文作轉載及備份之用 來源 source: http://hk.on.cc
|
鍾意就快D Share啦！
|
|
|