「抽水王」林作疑與JPEX案有關，早前被執法人員以涉嫌串謀詐騙被捕，其後獲保釋，他今日（22日）於下午3時許召開記者會，是他被拘捕後首度開腔，現場有廿多間傳媒到場採訪，林作由代表律師范律師陪同出席，女友裕美全程站在男友其後，默默支持，但未見林作母親。
林作於記者會表示，第一，他於本月19日離開執法部門，暫時無被控告獲准保釋；第二，他聘請了資深律師，法律意見基於事件仍在調查當中，故不會就案情相關方面作出評論，無論公開或私下都不作回應；第三，其位於中環的辦公室在前日已中止租約，所有業務均已終止；第四，他知道不少苦主好苦惱，他亦一樣，因為可能將要面對更多的苦惱。他表示會積極樂觀地面對，並借用邱吉爾名句，「I am an optimist,it does not seem too much use being anything else。」自勉一番：「意思係我係樂觀主義者，做其他類型嘅人似乎仲無用，我希望大家都可以一樣。」第五，他想做很多事，好想幫手，但目前基於事件仍然在調查中，好多事情都不可以做，他說：「但有一日，還我清白之身，承諾一定會盡力，在能力範圍內，在法律容許下，協助受影響嘅人士。」
最後，他表示會盡力協助相關執法機構，直至事件水落石出，希望事情盡快得到解決，盡快將幕後人士繩之於法。
對於很多問題，如關於幕後主腦、是否合夥人之一、調查時落口供，以及是否認識其他涉案網紅等問題，林作均以與案情有關，不能回答。過去幾天他表示睡得好，提到好多事情想做及想幫忙，他說：「我呢刻好多嘢想做想幫，但呢刻事件在刑事調查中，我想做但絕對唔能夠做，我希望獲得清白後，在能力範圍內，法律容許下去協助。（向受害人道歉？）認為在調查完後，還得清白之身後，會做所有會做嘅嘢，但一定要等事件告一段落。（賠償畀啲客？）好多方面有可能性，我有不少自己諗法，承諾水落石出後會做。」
在拘留期間他吃過裕美送來的叉燒飯和凍檸茶，至於他為何保釋離開執法部門時要走後門？他解釋：「我哋期間好配合調查及配合不同要求，所有安排都全力配合。（執法人員安排你行後門？）細節唔講，我好合作，期間一齊正常。（話你龜縮？）盡力配合調查和要求，我覺得環境下應該謹慎和配合。」他沒有回應自己資產是否被凍結，至於事件因此損失幾多及學會幾多？他稱：「數字唔回應，大家知道租約提早終結，面對調查，我相信大家都見到呢件唔係一件小事，以前嬉皮笑臉嘅我，現在都好嚴肅。（財政有冇困難？）呢個唔係案情問題，係感觀問題，唔希望喺呢度畀人知道我財政點，我知道好多人都好苦惱，我都好苦惱，平時天跌落嚟當被冚，呢刻好多煩惱，好多嘢煩。（媽媽財政上幫助你，如借錢畀你？）網民話我正職係兒子，始終得我一個仔，點都支持我，希望唔使佢咁擔憂，呢件事我自己面對。」在拘留期間，他思考人生，在執法部門入面聽其他被拘留人士分享以前坐監的經歷，他還懂得講笑說比相像中有趣。對於他保釋後表示報警無用？林作即時口窒窒，表示法律建議下不可回應，問到他言論是否負法律責任？「不承認有咁嘅情況，有啲問題未必基於事實，一律不作回應。」
問到他有否為涉牽其中而生感後悔？「好哲學，何為後悔人生？應該點去睇過咗去或發生咗嘅事，只可以講發生咗，要勇於面對，盡自己所能去解決，絕對有承擔有擔當。」對於虛擬資產，他覺得這方面法律上規管進展好快，現在沒有全面睇法，但他會繼續觀察，之後或會有更多睇法。提到媽媽，他直認媽媽非常擔心，「傳統家長角度，現在情況非常嚴重，不是每個人都熟悉無罪假定的普通法概念，佢擔憂，我好唔好意思。」問到會否擔心人生安全，林作又口窒窒，「有啲人唔喜歡我，討厭我，唔係第一日嘅事，我希望更加多人睇到，今時今刻我肯出來，係有擔當嘅人，覺得交畀法律制度去調查，同埋可以還我清白。」
由於他已終止兌換電子貨幣公司業務，租約亦中止，現在已冇做任何相關業務，至於將來的事，以後再說。對於他的業務都告終，問到未來大眾如何再相信他時，他稱：「呢兩日我觀察有值得同大家分享嘅事，第一，人生去到33歲，近48小時，我收到最多祝福和支持私訊和訊息，來自朋友、前同事和網民，好感動，無諗過咁感動，好多網民討論，當然有好多hater，落井下石，食足咁多年花生，今次食得最開心，不過有唔少心水清網民話:「你哋睇佢可能係失敗者，但可能係我哋最成功嘅失敗者，佢嘅成可以不斷地失敗，而繼續行下去。」
睇完幾感動，我想趁呢個機會，願意將佢哋嘅打氣說話講出嚟，都有hater話我搵打手或自己打，我只想做個紀錄，同話畀佢哋聽我收到祝福。」談及取消寫字樓兩年租約，他表示無人會諗到，所有人都好震驚，他形容過去發生的事情，他說：「今年頭半年醉心保險事業，6月離職之前公司，開過記招，嗰次都十分之大鑊，3個月內，低處未算低，發生今次事件，人生總有跌跌伏伏，但咁短時間裏面，中間做過眼睛大手術，至今視力都未恢復，仲脫咗4隻智慧齒，好痛苦，只可以講，呢3、4個月不好過，依家係最難過一關，9月9日中環寫字樓開幕儀式，今日9月22日，短兩個禮拜唔夠，發生咁多事，如果代入我人生，係幾咁不容易，但會積極面對，選擇其他方法更加無用，希望大家咁過大家人生。」
早前女友裕美與媽媽關係破冰，問到現在「婆媳」關係會否更拉近？他笑稱：「拉到太近，佢兩個對話多過我好多，佢哋兩個會打電話傾。」最後裕美陪林作離開，有人問到林母是否在場，裕美即擋駕說：「不要搞老人家。」對於網民讚她是最佳女朋友，她苦笑說多謝，林作即搶答表示同意。於尾聲時，林作女友裕美戴上口罩現身，跟林作的律師講了幾句之後，跟林作手拖手一同離開。問到裕美有網民指她是最佳女朋友，林作搶答表示：「我同意。」裕美：「盡力而為。」
林作於記者會提出6大要點
1.19日離開執法部門。
2.已聘請大律師，所以公開下或私底下都不回應事件
3.中環辦公室已於昨日終止租約，亦停止業務
4.好多人十分苦惱，我一樣有更多苦惱。正如我偶像邱吉爾所說：「I am an optimist. It does not seem too much use being anything else.」
5.我想做好多嘢，到我有一日處理好問題，喺能力範圍內，法律容許下一定會做
6.我會協助相關機構，希望事情得到解決
問答環節中，有記者問及：「呢兩日瞓得好唔好？」林作想了半秒後，回答：「我係瞓得好嘅。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
