影帝梁家輝細女梁靜曦（Nikkie）大前日（12日）正式下嫁任職金融嘅外籍男友，尋晚（14日）佢終於都有時間甫出婚禮當日嘅靚相，享受新婚生活！見Nikkie同老公以白婚紗襯藍色西裝情侶Look行禮，簡約斯文又大方，加上婚禮場地同場以純白為主調，溫馨又浪漫。
只見第二度榮升老爺嘅梁家輝，坐喺落地大玻璃前嘅梳化上，飲過Nikkie同新女婿跪地斟嘅喜茶，一臉喜極而泣嘅模樣，不禁令人驚嘆影帝對囡囡嘅不捨及祝福，畫面感動又貼地，點知阿女就踢爆佢原來係扮喊：「假哭的。開玩笑的哈哈。」估唔到佢喺囡囡婚禮上都依然風趣，大晒開通外父嘅一面。
今次二人成婚，佢哋索性當日就喺婚禮場地影埋婚紗相，不過因為場地布置、格局均似足住宅，即令人估計佢哋係喺梁家豪宅內完婚，即係間接令超誇張靚屋曝光！只見有坐逾10人巨型梳化、落地大玻璃等，樓梯轉角嘅婚照更見家中至少係3層樓獨立屋，奢華富貴。
本文作轉載及備份之用 來源 source: http://hk.on.cc
|
鍾意就快D Share啦！
|
|
|