陳啟泰聲線略帶沙啞，訪問一開始，陳啟泰已跟觀眾玩「ABCD」，原來他的身份除了是演員、主持，亦是一位歌手，曾在香港出過一張，內地更推出過三、四張唱片，現在內地仍有簽唱片公司，他說：「會出一啲翻唱嘅唱片，即係類似嗰啲Hi-Fi碟，好多人唔知嘅東西，其實我咁多年，尤其《百萬富翁》多咗機會之後，都有涉足音樂方面。」
陳啟泰90年代出道，他曾在周梁淑怡開辦的製作公司擔任PA（助導），亦有幫忙出鏡拍卡拉OK的LD碟，從此對幕前和幕後均產生興趣。之後他加入無綫（TVB），曾主持《香港早晨》、《K100》及《歡樂今宵》，早年深受觀眾歡迎的角色必定是《再見亦是老婆》的「馬子儒醫生」；其後轉投亞視後亦有不少代表作，包括劇集《我和殭屍有個約會》及遊戲節目《百萬富翁》。
不過，在陳啟泰心目中「亞視一哥」卻另有其人，他說：「我一向覺得係何守信，何B師傅，因為佢教咗我好多嘢，我做《百萬富翁》之前有請教佢點做呢個節目，點去揣摩呢個角色。我覺得主持都係一個角色嚟，問B哥點樣喺現場會唔驚，佢話︰『我做咗30幾年，我依家出去做主持節目，選亞姐、做台慶都驚。』原來都係演一個角色，睇你演得好唔好，睇你可唔可以演俾觀眾睇，你唔驚，好氣定神閒，就係咁。」
陳啟泰透露現在有主持一個關於車的節目，問到會否簽公司，他說：「依家唔係我要去搵一個電視台，因為我已經唔係十八廿二，樂悠卡都攞咗嘞啱啱，都好開心，原來慳好多錢，其實要雙方好似談戀愛咁，要你有意思大家有意思先可以喺埋一齊。我都簽過有線，ViuTV又拍過劇集一定要大家有意思先可以合得埋，依家有咩節目啱我做而又長期簽一個電視台，我自己暫時睇唔到。如將來有合作機會，可能係自由工作形式，做一次性嘅工作。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|