約基利斯唔吼曼聯。
士砵亭瑞典神鋒約基利斯將於今夏離隊，雙方協議唔會啟動1億歐元解約金，士砵亭將轉會費減到7,500萬歐元(約6.3億港元)，據報多達10間球會對佢有興趣，雖然消息最多係曼聯，但因為「紅魔鬼」成績太差，加上財政問題，約基利斯唔會揀曼聯。
「轉會專家」羅曼諾透露：「好多歐洲球隊留意佢（約基利斯），我唔想列出10間球會，但都係真嘅，幾乎所有歐洲球隊今夏都對約基利斯有興趣，其中曼聯報道最多，魯賓艾摩廉想簽約基利斯係事實，佢哋互相熟悉，但對於曼聯，情況就同域陀奧森漢一樣，決於預算，仲有歐洲賽資格。」
葡萄牙傳媒報道，艾摩廉同約基利斯關係融洽，不過今季艾摩廉說服約基利斯留喺士砵亭多一季，但艾摩廉就季中過檔曼聯，有「放飛機」成分，所以今夏約基利斯就算唔揀曼聯，艾摩廉都唔怪得佢。
曼聯想要簽入約基利斯，除咗要滿足7,500萬歐元轉會費，仲要攞到歐聯資格，而曼聯今季唯一取得歐聯資格途徑，就係捧走歐霸盃，曼聯想簽好球員，呢隻盃好緊要。
本文作轉載及備份之用 來源 source: http://hk.on.cc
|
鍾意就快D Share啦！
|
|
|