未婚妻Chris忙於打理龐大家族事業：我等住佢養我
李龍基指：「佢出返嚟之後好忙，反而仲忙過我，因為佢幫緊佢父親嘅事業，家庭嘅事業都幾龐大，所以佢有佢忙，我呢輪都好忙，自從去完美加返到嚟都未停過。（佢事業咁龐大，會唔會養埋你？）我等住佢養我㗎，真係㗎。（佢從事邊方面？）因為我應承過我太太唔好講咁多我同佢之間嘅嘢，尤其係佢屋企嘅嘢，佢屋企人都唔係太鍾意我哋啲嘢成日都喺傳媒裡面播，所以我都盡量低調低調，總之我都好多謝大家關心，我只可以講，我哋依家都真係幾開心！」
激動澄清未婚妻Chris未有失聯：話我買催情藥
至於有指未婚妻Chris失聯，李龍基解釋：「我喺美國返嚟之後，好多人問我同太太有冇事，跟住喺加拿大請我去嘅朋友直情打畀我『基哥，你同你太太冇嘢呀嘛？』我話咩事呀？『佢話你太太唔見咗』我話吓？咩唔見咗？我話你幫我調查吓咩事，之後佢打返畀我，原來係我去加拿大登台，我哋影咗張相4個人唔見我太太，就係呢張相，就有好多憑點數養活自己嘅人就大做文章，話我太太唔見咗，我一個人好孤單寂寞飛咗去美加，就憑一張相就可以咁樣作出嚟，我就懷疑佢係邊間電視台出嚟嘅編劇，好嘢！我形容係『一犬吠形，百犬吠聲』，個個都唔執輸都寫，仲有一個仲離譜，話我老婆出嚟，我買催情藥，心底唔好，咁樣作嘢有咩意思？人一定要有良心，冇良心！」
二人感情從未受影響：幾多號風球都打唔甩
雖然經常被作故仔，李龍基稱已坦然面對：「我其實都幾好，養活咗好多人，有一個話靠李龍基呢單嘢十幾日搵咗30幾萬，多過我好多，仲有好多個，睇吓我養活幾多人，開心嘅，但人一定要靠良心。」至於問道一直以來的新聞會否影響對未婚妻Chris的信任，李龍基稱：「唔會喎，反而我哋嘅感情非常之好，越嚟越好，佢觀察我喺呢段時間點樣對佢，我亦深知道佢點樣對我，我相信幾多號風球都打唔甩，總之多謝大家嘅關心，其實我哋真係活得幾好！」
李龍基不排除生B計劃：唔避㗎！我絕對係奉行呢個自然派
至於婚期，我都唔係想講呢樣嘢，我可以好肯定咁講我哋一定活得好好。（未必會註冊？）我都係唔講，因為一講佢屋企人會知，所以都係唔好講。（就算結都會低調？）無錯，我哋好低調，總之我哋好開心，呢個真嘅！我可以講，晚晚我哋都講老公我好掛住你，我又老婆我都好掛住你。」老當益壯的李龍基更不排除生B計劃，他稱：「隨緣我覺得呢樣冥冥中自有安排，若然真係有就有囉。（唔會特登避孕？）唔避㗎！我絕對係奉行呢個自然派！」目前，李龍基已移居珠海築愛巢，且沒有退休計劃。
本文作轉載及備份之用 來源 source: http://www.hk01.com
|
鍾意就快D Share啦！
|
|
|