魯賓艾摩廉(左)對於約瑟夫加比爾(右)的潛力，感到驚訝。
曼聯今夏豪花超過2億鎊(約21億港元)收購3位前鋒馬菲奧斯根夏、麥比奧莫、班捷文施斯高，但上輪英超開鑼戰對阿仙奴，始終入唔到波輸0比1。根據英國《太陽報》爆料，紅魔鬼主帥魯賓艾摩廉準備提拔年僅14歲超新星約瑟夫加比爾上一隊操練，似乎想將呢位「神童」打造成秘密武器。
有「小美斯」之稱嘅約瑟夫加比爾上年已經冒起，當時以13歲之齡成為曼聯U16主力，並有份代表曼聯U16訪港比賽，上陣2場入2球及1次助攻，當選賽事最佳球員。曼聯今夏迅速出手同約瑟夫加比爾續約，佢上周六(16日)首次擔任曼聯U18正選，協助球隊擊敗愛華頓U18。據悉魯賓艾摩廉對於約瑟夫加比爾嘅超卓潛力，感到驚訝，準備提升佢上一隊，跟隨正規軍操練。
值得一提，約瑟夫加比爾要等到10月先至年滿15歲，仍「未夠秤」踢青年英足盃，反而有機會同一班大師兄操練，可見艾摩廉極之重視佢，話唔定好快會安排呢位「小美斯」參賽。英超史上最年輕上陣球員紀錄係阿仙奴中場尼華尼利，2022年9月對賓福特後備上陣，當時只係15歲零181日，英國傳媒指約瑟夫加比爾好大機會可以刷新紀錄。
本文作轉載及備份之用 來源 source: http://hk.on.cc
|
鍾意就快D Share啦！
|
|
|