2014年1月2日 星期四

[壹週刊 1243] 不同檔次 頂阿刨 陳寶珠冇場爆 M1,




陳寶珠與阿嗲已開始閉關,為《再世紅梅記》準備。

探熱針

不同檔次 頂阿刨 陳寶珠冇場爆

為紀念拍檔任劍輝逝世二十五周年,今年初,仙姐白雪仙開始籌劃雛鳳合體演出,經過多月考慮,退居加國多年的阿刨龍劍笙未允復出,最終改由陳寶珠頂上,與阿嗲梅雪詩合作。

人腳有變,於一月中文化中心公演的十一場《再世紅梅記》,門票公開發售成個月,依然無場爆,相比過去「雛鳳鳴」開騷,門券一粒鐘搶清,寶珠姐的叫座力,實在無法與阿刨相提並論。

有見及此,為免三、四月於演藝學院(十一場)及澳門(四場)的演出受到影響,主辦單位「任白基金」已向一班富貴票友促銷,提前補定飛。

去飛慢

一月中,陳寶珠將與「雛鳳鳴」的阿嗲於文化中心合作演出任白戲寶《再世紅梅記》,但十一場門票開賣已經一個月,至今依然未有一場爆滿,打破雛鳳一開即爆的神話。

雛鳳鳴自○五年重組後,先後在○六年及一一年作三度演出,每次開足幾十場,依然一票難求,戲迷要瞓街撲飛,一一年的演出,門票更在五十分鐘內售罄,破曬紀錄。

去飛慢,除了阿刨辭演,改由陳寶珠補位令戲迷失望,票價貴亦有影響,大劇院地下前排門票一千元一張算合理,但連第二層前排位都要八百元,去到第三層前排亦要四百八十元,票價比天王天後還要貴。

「主辦嗰邊最初都有考慮票價問題,但寶珠姐信心十足,其實原先最貴飛係一千零八十元,後來先改齊頭一千,叫做減咗啲!」一名製作人說。



11月 12日擔任《再世紅梅記》藝術總監的白雪仙,親自出席記者會公布演出詳情。

門票開售個幾月,依然無場爆。仍有大量中價飛。

有歌迷投訴《再世紅梅記》中價飛太貴,坐文化中心樓上都要收 800元。

無得比

為紀念拍檔任劍輝逝世二十五周年,仙姐一早計劃促成愛徒阿刨、阿嗲再次合體復出,可惜即使師傅開到口,出年七十歲的阿刨始終以體力問題推辭演出,令仙姐一度陣腳大亂。

「上次(一一年)雛鳳開騷最貴已經要八百八十蚊一張,今次加到一千,其實唔算過分,因為乜都貴曬,加上仙姐要求好高,以前雛鳳做《帝女花》,單單一張龍椅已經要十萬蚊,舞台布置、戲服到製作,仙姐都係一絲不苟,佢咁落本,都係想幫『任白基金』籌多啲錢,好老實,如果今次係阿刨落場,就算千八蚊一張飛,都冇人會話貴。」知情者說。

事實上,有不少粉絲的陳寶珠九九年復出,公演舞台劇《劍雪浮生》,創下一百零四場驕人紀錄外,往後多次重踏舞台,包括○九年與李香琴合作舞台劇《我愛萬人迷》,反應已大不如前;一○年,她把粵劇搬上紅館,與南鳳、陳詠儀開了四場《俏、柳、紅、梅》,門票更加滯銷,演出當天,依然可以買到第三行。

歸根結底,雛鳳是龍劍笙與梅雪詩組合,無可取替。

11年,丘亞葵力邀阿刨由加拿大返港,「雛鳳」合體演出《龍情詩意半世紀》,門票 50分鐘被搶曬。

汪阿姐出名要求高,但據知仙姐比阿姐更甚,絕對一絲不苟。

神話幻滅

陳寶珠代阿刨,與阿嗲演出《再世紅梅記》,粵劇迷反應冷淡外,將於農曆年後開騷的徐小鳳,六場門票無論貴價、中價、平價飛,依然有大量供應;三月的黃耀明一樣冇場滿,就連每次開騷都掀起搶飛熱潮的「軟硬」,農曆年前的八場騷,中價飛仍未賣曬,爆曬冷!



鍾意就快D Share啦!
Related Posts Plugin for WordPress, Blogger...