全身老虎紋打扮嘅蘇永康，去完麼鳳買嘢，單手插住褲袋行 catwalk走埋《壹》仔身邊，話要請食腰果同檸檬茶，真客氣！
同你吟一吟
蘇永康 虎上身
呢排天氣凍到冇朋友，但身為 fashion人嘅蘇永康，再凍都要著得有型有款，最緊要出位！上個禮拜五（十二月二十七日），《壹》仔響銅鑼灣撞到蘇永康同女友 Anita睇完眼鏡再去麼鳳買鹹濕嘢食。是日潮康打扮由厚褸到長褲，全部都印有老虎紋圖案，加埋副白框黑超，就算置身人來人往嘅銅鑼灣，依然一眼見到佢。
買完鹹濕嘢，蘇永康攞住包腰果同檸檬茶走埋《壹》仔身邊：「拍硬檔，等陣唔好跟，我有啲嘢搞！」
其實《壹》仔都想做「順得人」，點知轉個頭又喺利園撞番蘇永康，原來佢口中所謂「有啲嘢搞」，其實係去 Joyce睇衫，店員仲好好服侍，捧咗成大堆新衫俾超級 VIP過目。
又見到《壹》仔，蘇永康劈頭第一句：「又話唔跟？」大佬呀！銅鑼灣話大唔大，《壹》仔行咇，來來去去都係嗰幾個點，你都係去買衫啫，又唔係陪你老友許志安鄭秀文買婚紗。
買到熟曬，蘇永康臨走前同店員揮手 say bye，之後再對住鏡頭打招呼。
|
鍾意就快D Share啦！
|
|
|
