探熱針
食為先 PSY荃灣篤魚蛋
去年憑一首《江南 Style》熱爆全球的韓國大叔 PSY，即使馬舞熱潮減退，但有 YouTube點擊率累積十七億做後盾，無阻 PSY繼續財路暢通。十一月在香港拍廣告，十二月中又 encore！ PSY收工路經荃灣路德圍忍唔住跳車，在黑人保鑣護駕下，掃街篤魚蛋。
黑人保鑣擋駕
早前在台上自嘲可能要花多十年時間，才能製作多一首好似《江南 Style》般大熱作品的 PSY，雖然無以為繼，但財來自有方，即使要應付首爾的聖誕個唱，仍唧出檔期，飛香港拍廣告。
拍完廣告， PSY馬不停蹄飛車到機場，搭機趕返韓國，但皇帝唔急太監急，往機場路上， PSY路經荃灣路德圍，見到一街熟食檔，大叔竟然要求停車，要落車掃街。
「佢（ PSY）一落車就即刻跑住咁衝去幫襯賣魚蛋燒賣嘅熟食檔，買完企喺街就食，陪埋佢落車嘅黑人保鑣見愈來愈多人行埋去，有啲仲用相機影相，即刻用手遮鏡頭。 PSY應該唔係咁想俾人見佢當街篤魚蛋個樣，所以吞咗兩粒，就將食淨嘅俾保鑣拎住，轉身行返上七人車，其間有幾個人死跟住要同佢合照， PSY最後都叫保鑣行開，企定定同 fans影咗幾張相。」目擊者說。
食完魚蛋， PSY即飛首爾開騷，在台上穿著大紅又唱又跳，他更將 Big Bang的 G Dragon爆呔相放微博公諸同好。
私人飛機候命
PSY的確十萬火急，事關當晚八點（香港時間七點）他便要在首爾開個唱，但三點仍然人在香港，即使搭私人飛機，扣除三個半鐘機程，幾乎一落機就要「劈」去場館，裝身
出場。
「十一月嗰次佢喺香港拍廣告都係咁趕，又係一落機就去開工，拍完最後一個 shot就搭私人飛機走， PSY鍾意食，嗰次都安排咗，不過佢實在冇時間，今次佢就連十蚊五粒嘅辣魚蛋都唔放過，點都要試嚇！」知情者說。
啱食
香港街頭小吃多花款，魚蛋燒賣蛋撻奶茶是遊客必吃，就算由細食到大的香港人，就算有錢有面，一樣食極唔厭。
|
鍾意就快D Share啦！
|
|
|
