2014年1月2日 星期四

[壹週刊 1243] 住公屋遭欺凌 子宮生瘤 密友爆藍潔瑛淒涼生活 藍潔瑛,M1,




娛頭

住公屋遭欺淩 子宮生瘤 密友爆藍潔瑛淒涼生活

本刊在十二月中收到一段長約三分鐘的訪問片,內容是藍潔瑛自述二十多年先後被兩名影壇大哥強姦,不過礙於勢力,當年她未有即時報警,但往後卻多次用刀片割脈自殺,慘遭蹂躪,令她身心嚴重受創,精神出現問題。

一直陪著她的密友楊曼莉,日前接受訪問指藍潔瑛住筲箕灣公屋時遭變態佬欺淩,早前又發現子宮生瘤;半生坎坷,卻鮮有圈中人肯出手相助,這些年來,十分淒涼。

行蹤飄忽

被影壇大哥強姦訪問片段曝光後,藍潔瑛一直未有現身赤柱寓所,連日來,當年跟她同期讀訓練班的同學劉嘉玲,公開表示憂心,曾經與她同是金牌經理人陳自強旗下藝人的成龍,更以「一言難盡」回應。至於前演藝人協會會長,在圈中一呼百應的曾志偉,也表示未能聯絡上。

在藍潔瑛仍然行蹤不明時,本刊聯絡上過去七年來,曾經讓她寄居在自己深圳寓所,陪著她度過不少難關的好友楊曼莉,她大爆藍潔瑛這些年來的坎坷生活,因受精神問題困擾,不斷失去工作機會,以致淪落到靠政府綜援過活。

楊曼莉曾經照顧藍潔瑛的起居生活。

入到教堂,藍潔瑛即揮手跟神父打招呼。

藍潔瑛在教堂參與彌撒,不時周圍望的她,由紅衫教友全程陪住。

靠綜援生活的藍潔瑛,搭小巴去教堂參與彌撒。

藍潔瑛出現教堂,在場教友未有顯出詫異,已視她為姊妹。

有食藥

壹:藍潔瑛俾兩個影壇大哥強姦,你有冇聽過?

楊:好耐之前提過一次,唔想提喇。

壹:外界覺得藍潔瑛應該報警,將嗰啲人繩之於法,你覺得佢會唔會咁做?

楊:應該唔會,其實佢健康狀況一直都唔係幾好,可能都唔想搞咁多事。

壹:佢係咪驚咗兩個影壇大哥?

楊:我唔知呀,我覺得佢唔會報警,因為係咁耐之前嘅事。

壹:圈中傳佢吸毒,你有冇見過?信唔信係事實?

楊:之前同佢住過一段時間,我哋成日見面又通電話,我未見過佢吸毒,佢係有食藥,係食治療方面嘅藥。

壹:先後兩次俾人強姦對佢影響好大?

楊:你講嗰件事(強姦)唔知真定假,我覺得如果俾任何一個人遇到咁嘅事,都會對人生影響好大。佢而家唔係咁健康,我都唔想講咁多。

藍潔瑛寓所近日開始「有人氣」,掛上窗簾外,廚房亦有砧板等廚具,重過正常生活。

十二月中收到的藍潔瑛訪問片段,她自爆被強姦外,又展示割脈自殺的手腕。

撞車傷腦

壹:佢有冇透露過受到咩打擊,令佢精神出現問題?

楊:其實我唔覺得佢有精神病,係醫生話佢有,要佢食藥。(醫生點講?)醫生話唔知係咪撞車(九八年藍潔瑛撞車,之後被送去精神病院)傷咗個腦,唔知點講,諗到好心酸。

壹:佢近年生活係點?

楊:都係平平淡淡,有大陸劇組搵過佢,不過新聞對佢有影響,譬如有劇組搵佢拍戲,但人哋諗到佢好似有病就放棄咗,失去機會。佢(藍潔瑛)考慮嘅嘢唔同,要求好高,我都好欣賞佢嘅專業,做戲好專業,希望佢健康同開心,工作隨緣啦。

無煙不歡

壹:你最近有冇幫佢搵嘢做?

楊:有套戲喺三月份開,搵咗好多香港藝人,都想搵佢,同佢傾緊。

壹:你可以聯絡到佢?

楊:大家都係電話聯絡,佢話要諗(拍戲)。如果佢身體好番,又咁專業,應該都可以收到好高價錢。

壹:佢有冇同你提過訪問件事(自爆遭兩影壇大哥強姦)?

楊:佢冇提過,大家只係提工作。佢從來唔睇報紙,咩都唔知。佢淨係食煙,煙係佢終身伴侶,冇任何嘢都可以,唔食飯都得,冇咗煙就唔得。

曾志偉日前出席顧紀筠老公生日 party,表示未能聯絡上藍潔瑛。

劉嘉玲對藍潔瑛表示擔心之餘,更指只有曾志偉能跟她溝通。

成龍早前在內地出席記者會,對藍潔瑛被強姦事件,只有「一言難盡」作回應,之後即轉話題。

華倩借兩萬

壹:佢有冇提過,邊個係佢娛樂圈最好朋友?

楊:冇講過,(有冇提過九龍女?)冇提過九龍女,我都唔知。(九龍女包括邱淑貞、張曼玉、吳君如、羅美薇、梅艷芳、曾華倩、上山詩鈉、劉嘉玲以及藍潔瑛)

壹:據你所知,咁多年來有邊個圈中人曾經對佢施以援手?

楊:佢有提過曾華倩借過兩萬蚊俾佢。劉德華都有提過,有次佢突然有好多一千蚊紙喺身,不過之後又唔見曬(藍潔瑛曾指獲劉華十萬元資助,但拎住大筆錢去酒吧飲酒時,全部被偷走,事後她更到酒吧大吵大鬧)。

露體狂騷擾

壹:有指佢住筲箕灣(藍潔瑛○九年住愛東邨)公屋時發生好多唔開心嘅事,所以佢先要申請搬走?

楊:佢搬去赤柱(一二年),因為佢曾經住喺嗰度好耐,後來冇錢先將間屋賣咗,嗰度有好多美好回憶。筲箕灣係公屋,嗰度有好多好奇怪嘅人,有變態、猥瑣、智障,仲試過好多次有人喺佢面前除褲,佢好驚,我同佢一齊都遇過好多次,所以先搬。

壹:強姦報導出街時,佢係咪入咗醫院,究竟咩病?

楊:(未有正面回答)希望佢好番,快啲開心番。

對於曾志偉在聖誕夜參加顧紀筠老公生日派對時,表示一直未能聯絡上藍潔瑛,楊曼莉回應:「佢不斷改電話號碼,我諗曾志偉應該都聯絡唔到佢,同埋佢本電話簿都冇佢個名,呢幾年應該都冇聯絡過。」

住在筲箕灣愛東邨的藍潔瑛行為怪異,經常被拍到踎在住所附近的大廈。

吳君如和曾華倩都是「九龍女」成員,曾經與藍潔瑛來往甚密。

由電視轉戰影壇,藍潔瑛跟成龍、張學友及羅美薇等都是陳自強經理人公司旗下藝人。

一度決心重新做人,○二年藍潔瑛減肥出席活動,更公開表示有裙下之臣。

生瘤住院

本週日(十二月二十九日)早上未夠十點,藍潔瑛終於現身。頭戴 cap帽,將一頭灰白髮染黑的她離開屋邨,坐專線小巴前往赤柱巿中心。落車後,記者上前問藍潔瑛可否傾幾句,她瞪大眼怒視未有回應,並急步行去聖德蘭學校的聖亞納天主堂,參與十點開始的廣東話彌撒。

入到教堂,藍潔瑛向神父揮手打招呼,不少熱情教友陪住她傾偈。十一點多彌撒結束,但一直未見藍潔瑛蹤影。等到兩點,負責主持彌撒的神父向記者表示她已經離開。

據了解,藍潔瑛早前因子宮生良性瘤而入院,故多日未有返回赤柱住所。

出院後,已改信天主教的她週日會返教會,有了信仰影響,她的外觀亦開始有改變,注重儀容外,更把之前亂七八糟的寓所執拾清潔,掛上窗簾布保護私隱,亦買齊家品在家中煮食,逐步重過正常生活。

○六年藍潔瑛認識鍾意出風頭的曾律師後,經常有錢使。不過有錢在手的她,即過大海賭博。

藍潔瑛拍罷經典劇《大時代》後未能抽離角色,搞到精神出現問題。

○二年一度正常的她,被豐胸產品睇中任代言人,幫補拮據生活。

當年藍潔瑛食住豐胸代言人條水,還有機會返內地登台。以為她可重新振作賺錢,但未幾又傳出她情緒失控。

小鄧麗君有情義

對藍潔瑛一直照顧有加的楊曼莉於武漢大學醫學院畢業後,曾得「懷念鄧麗君歌唱比賽」最佳神韻獎,繼而有小鄧麗君之稱,一把靚聲令她順利打開內地市場,至今已灌錄多隻發燒碟。

楊曼莉一次在深圳出席派對期間,認識由黃夏蕙陪同出席的藍潔瑛,當時更因對方遺失電腦及無錢傍身而借錢給她。為方便照顧,楊曼莉曾邀情緒不穩的藍潔瑛回自己深圳的家同住,助她捱過難關並為她四出找尋演出機會。雖然藍潔瑛曾希望楊曼莉做她的經理人,但被對方拒絕:「我唔想喺佢身上賺一分一毫,寧願私下幫佢,我只希望佢健康快樂。」

精神出現問題後,藍潔瑛在○四年曾報警表示要自殺,大批傳媒趕到其西貢寓所,發現她的屋企亂七八糟。

好唔耐

自九八年遇車禍大鬧醫院後,藍潔瑛便經常出入精神科診所,早年她的情況未算失控時,身邊仍有大班藝人支持,向她伸出援手;但久病床前無孝子,加上她不易相處,最終嚇退不少朋友。

藝人之家

在發病初期,藝人之家一班教友經常邀請藍潔瑛參加聚會,姚煒、彭家麗、高皓正等又會約她食飯,連她自己都承認,有班教友陪她打波,精神好好多。

林建明

曾患上抑鬱焦慮症的林建明,以過來人身份鼓勵藍潔瑛重過新生,由她做主席的心晴行動慈善基金,○四年搞抗抑鬱騷,大姐明即穿針引線安排藍潔瑛公開演唱,之後更陸續有登台騷搵上門,但藍潔瑛卻不滿大姐明不停對外講解她的病,二人逐漸疏遠。

曾權威

○五年藍潔瑛由朋友介紹認識六十八歲的退休律師曾權威,二人在一次齋宴後,不愁經濟的曾權威便負責起藍潔瑛的起居飲食玩兼睇醫生等支出,她更當正對方是契爺。但一段長時間後,藍潔瑛開始認為對方借她搏見報,曾權威亦不滿藍潔瑛當他提款機之餘還要受氣,一段霧水緣又破滅。

失控

情緒病是癌症外另一社會殺手,競爭大、跟紅頂白的娛樂圈病例亦多,有人正視病情重過新生,亦有人愈來愈嚴重。

洪朝豐 復工 DJ

曾是當紅 DJ的洪朝豐,九八年與寶詠琴高調相戀人氣急升,拍拖不足一年二人反面收場,他更以「一隻手指捽死佢」成為經典語錄,後來洪朝豐承認患有遺傳憂鬱躁狂症,引致他不時瘋言瘋語。經過長時間治療病情好傳後,○一年復出為 DBC數碼電台主持節目至一二年。

蔡楓華 開演唱會

大起大落,因公開失言令事業一沉不起。○七年,林建明向傳媒揭露蔡楓華正接受抑鬱症治療。至 11年,蔡楓華於盧敏儀協助下在九展開演唱會, 12年更進軍紅館,完成他三十一年來的夢想。

容錦昌 街頭遊蕩

已離開幕前多年的容錦昌,一直受情緒病所困,不時被發現呆呆吽吽,瞪大雙眼通街遊蕩,甚至匿入廁格偷窺,去年又被人目睹在巴士上自言自語,病情從沒有好轉。



鍾意就快D Share啦!
Related Posts Plugin for WordPress, Blogger...