2014年1月22日 星期三

[FACE 348] 挑戰 Kpop  ShinAs One As One,MF,




Beauty Hunt

挑戰 K-pop  Shin@As One

韓國組合少女時代、 BIGBANG等當頭起,個個掛住歎 K-pop,令本地薑條路更難行。

出道近 2年嘅女子組合 As One成員 Shin(吳思佳),亦有一半韓國血統,加上又是女子跳舞組合,難免俾人同 K-pop比較。只得 19歲嘅 Shin,初出道時仍相當在意網友留言,特別話佢哋同韓國啲女子組合冇得比,更加令她傷心。

但經過一年,自言相當任性嘅 Shin,終於學懂放低執著,她說:「網友話咩由佢啦!我知道喺香港做組合好難行,但我哋 4個會努力,希望第時好似郭富城咁!」

Profile

吳思佳 Shin

身高: 165cm

體重: 102lbs

Instagram: ASONESHIN(粉絲人數 111人)

微博: AsOne_Shin(粉絲人數 5,773)

有一半韓國血統嘅 As One成員 Shin(吳思佳),自細學跳中國舞, 15歲開始喺星級排舞師 Sunny Wong嘅舞蹈學校學跳 hip hop同拉丁。跳了兩年被 Paco睇中與其他 3名成員組成 As One, Shin說:「我本應去美國讀 high school,但媽咪畀我揀,我就揀咗留低試嚇。」入行後 Shin才知路難行,她說:「個個都睇 K-pop,基本上一出嚟跳,啲人就話我哋抄佢哋,但其實我哋係有攞佢哋啲優點再加自己 style。以前好留意啲網友留言,每一個都睇,睇到話我肥、醜樣都有唔開心㗎!但𠵱家冇嘢囉,惟有自己做好啲,等佢哋改觀囉!」

Shin平時除咗教成員講韓文,本身亦有喺 YouTube教人,仲搵埋許廷鏗幫手示範添!網上圖片

As One成立年幾, Shin話最感激三位成員嘅遷就,仲話同另一隊女子組合「 Super Girls」好鬼 friend,絕冇不和。

準時點返工



今年得 19歲,入行一年多,除咗出騷工作外,冇工開日子原來都要日日 12點返公司。她說:「冇嘢做 12點就要返公司喇,跳舞、唱歌、跑步各 1個鐘,跟住就要互相教大家嘢,我識韓文就教佢哋,其他成員就教我其他嘢。」

一年多嘅訓練,令 Shin任性性格轉變,她說:「可能媽咪錫我啦,令我性格好自我,遇到啲唔啱自己嘅嘢會唔開心,試過因為唔習慣個新髮型而喊,但呢一年令我改變好多。」同門有大師姐薛凱琪,不過 Shin偶像係郭富城,她說:「佢到𠵱家都係香港跳舞第一,好希望有佢咁嘅成就。」自言 3年冇拍拖嘅佢,原來擇偶條件係一定要單眼皮,她說:「同我拍拖嘅男仔,對眼一定要好似條綫咁,高大、大隻唔一定靚仔,但一定要單眼皮。」啲口味都好韓妹喎!

成員 Oli(右一)之前因為子宮有良性瘤要休養半年,最近復出歸隊, As One暫時仲係磨刀期,接多啲 job增加曝光率先。



鍾意就快D Share啦!
Related Posts Plugin for WordPress, Blogger...