Kay在內地略有名氣，身價不斷上升，𠵱家仲識做直銷搵錢，真係要代張繼聰畀個「 Like」佢，希望佢今次唔會中伏啦。
封面
月搵 30萬大拆家 B餐 Kay美容機直銷拉客
早前有指直銷公司入侵娛樂圈，林珊珊細女李怡（野人），更被影到在展銷會向人推銷價值約 8千蚊的「回春機」，落足嘴頭 sell客。
野人所屬的美國上市公司「 Nu Skin」，在港已有多年歷史，產品遍及美容和健康食品，原來娛圈還有多位明星名人會員，其中包括最近熱論「老婆 A、 B餐」的贏家謝安琪。據知屬銅鑼灣總部的 Kay，曾向前同門師妹 Super Girls、欣宜和吳若希等推介美容食品及美容機，自己做埋變靚啲人辦，以口碑速銷，有時月入近 30萬，相當和味！ B餐 Kay慳家又識搵錢，不過直銷公司近日被《人民日報》點名批評涉傳銷、洗腦，股價一度大瀉， Kay小心搵外快搵出禍。
直銷公司一向於坊間非常流行，不過由美國傳入的「 Nu Skin」，甚懂玩明星效應，連邱淑貞、袁詠儀及胡杏兒等亦曾被影到上「 Nu Skin」入貨，每次起碼花 5位數，而周海媚都曾在微博開名介紹該產品。
「回春機」起家
能夠吸引明星客，只因不少明星都是其直銷商，介紹同行幫襯有錢袋，是一筆大生意。其中一部俗稱「回春機」的美容機相當吃香，售價約 8千蚊，聲稱可以瘦身去斑，連靜脈曲張都有效，雖然功效未被證實，但經星級直銷商落力在娛圈宣傳，仍吸引到貪靚的女星掃貨送禮自用。
據知除了一班中女沉迷「回春機」，近日不斷被網友拎去同「 A餐」徐濠縈比較的「 B餐」謝安琪，去年中開始向身邊人好友推介；而 Kay去年曾在疑似宣傳稿的雜誌訪問中，承認平時會用全套「 Nu Skin」護膚品，變相公開推銷。「 Kay做咗會員年幾啦，皇室堡 office未搬去嘉蘭中心嗰陣， Kay已經去嗰邊攞貨， keep住介紹到好多客，佢間唱片公司嗰個欣宜、吳若希同 Super Girls都有幫襯㗎！以佢客源咁廣，有時一個月搵到 30萬，雖然對於明星嚟講唔係特別多，但當幫補嚇都唔錯！唔只 Kay，佢老公都有一齊做㗎！」知情人士透露。
Eason早過 Kay
謝安琪搵到食，「 A餐」食家陳奕迅原來比她更早成為「 Nu Skin」用家，亦有會員曾見過邱淑貞、張家輝同李思捷親自掃貨，證明的確有唔少名人明星已經成為信徒！
據知低調用家 Eason，其實係由阿徐好友 Judy Ip介紹。「 Judy識好多潮人，以前喺 I.T izzue做首席時裝顧問，入咗直銷公司年半，就升做最頂級嘅藍鑽石級主任。」
而貴為天後的「 B餐」謝安琪，近日忙於上深圳參加歌唱比賽外，仍與老公張繼聰合力做推銷員。
Aka@Super Girls︰有聽 Kay提過
據知情人士透露︰「班明星上到去展銷中心通常買親都幾萬蚊，不過唔係個個都 keep住做，有啲上去買過一次嘢，就俾啲 sales影曬相，之後放上網，變相幫人宣傳咁，之後都怕怕啦；有啲星就真係當生意做，連唔識嘅走埋去 sell，誇張過地產經紀㗎！但就好怕俾人知，怕被誤會係傳銷。」據知 Kay親身做「白老鼠」，不時向同公司的女歌星埋手，「信徒」愈來愈多。
本週一，本刊記者致電 Super Girls成員 Aka趙慧珊，她說︰「有聽 Kay提過，我就未試過，其他成員就好似有，不過我準備試嚇隻綠茶美白丸，呢樣平啲，其他都幾貴。」記者致電 Kay經理人夏森美，他亦直認知道此事。「其實阿 Kay只係算用家，佢試過 ok，先介紹畀身邊啲女仔朋友咋嘛！只係好普通嘅一件事！（一個月搵 30萬？）點會呀？阿 Kay唔會當生意咁做！」呢盤生意咁有爭議性，當然低調啲好。
《人民日報》轟涉傳銷 股價狂瀉 4成
「 Nu Skin」（大陸名為「如新」）被娛圈人神化，但其實負面新聞多多。除了產品評價在網上好壞參半，營銷手法被質疑，日前《人民日報》一連三日報道公司因涉嫌傳銷，涉搞大型集會向成員「洗腦」，被中國工商總局和商務部關注，中國工商總局上週四更公布會調查事件。「 Nu Skin」股價在美國暴跌，上週三、四兩日間累積跌幅曾超過 40%！公司先發聲明指報道「不準確和誇張」，後才改稱會配合有關部門核查。現時內地市場佔「 Nu Skin」 31%生意額，達 6.67億美元，是其最大市場。
據梁永鏗律師指，本港《禁止層壓式計劃條例》已在 12年初實行，新例釐清和擴大層壓式銷售定義，刑罰提高至罰款 100萬和監禁 7年。
A餐定 B餐？
Kay威盡《音超》
謝安琪近日參加深圳衞視的《中國音超》，雖然冇 G.E.M.的《我是歌手 2》咁 hit，但 Kay愈戰愈勇，在第二輪複賽唱林俊傑的〈她說〉獲 9.91全場最高分，力壓內地歌手陳楚生晉級，不過 Kay所屬的「金牌大風隊」成員卻出局，得番隊長 Kay一個繼續比賽。
|
鍾意就快D Share啦！
|
|
|
