掃呢頁CODE去手機

2014年1月22日 星期三

[FACE 348 外地娛樂] 深田恭子攞你命 深田恭子,恭子,MF,




日本驚慄片興玩雙重人格橋段,今次深田恭子喺《同屋:喚命日記》中,飾演日頭鬼咁溫柔,但夜晚就揸刀殺人嘅變態殺人犯。雖然角色好恐怖,但恭子就話演得好過癮。

日面

深田恭子攞你命

恐怖片除荷里活稱王之外,其實日本亦唔輸蝕。尤其 98年一套《午夜凶鈴》曾嚇到唔少觀眾唔敢開電視,《午夜凶鈴》做足 16年日本恐怖片王,今年輪到由深田恭子搭北川景子主演的驚慄片《同屋:喚命日記》突圍。

《同》片中, 31歲深田恭子與 27歲北川景子唔只鬥靚,仲要鬥演技,為突破,兩代女神(其實相差 4歲)要玩埋同性曖昧情。

《同》片打正旗號是恐怖片,血腥場面當然唔少得,兩個女神更會施展暴力,又驚嚇又夠喪!如果有港版,好啱何超拍喎!

由深田恭子與北川景子主演的《同屋:喚命日記》,是改編自日本已故著名恐怖推理小說家今邑彩的同名作品。故事講述北川景子一次因車禍入院,遇上做護士的深田恭子,由於二人性格投契,於是景子建議一齊租屋同住,仲交換日記分享心事,點知住住嚇景子先發現恭子原來患有雙重人格,噩夢從此開始。

互相照應

性格孤僻嘅景子,認識恭子後成為好友,兩人唔只經常一齊食飯傾心事,之後更搬埋一齊住,姊妹互相照應。

行為異常

不過住住嚇,景子發現恭子經常自言自語。當恭子知道佢同男性朋友表現親密,更會呷醋,而且失控發惡,精神失常情況愈來愈明顯。

大巴摑景子

《同》片標榜驚慄加懸疑,所以戲中不乏血腥與暴力場面。片中,一向做開玉女的恭子,化身變態女魔,唔只鬱手向景子大力兜巴摑,仲動粗對她拳打腳踢,打到景子連衫都爛埋,咪話唔狼死。

講起打戲,恭子接受訪問時表示內疚:「我每次打北川都會好唔忍心,但佢竟然對我講:『唔緊要,放盡去打就得㗎啦!』,所以我咪唔客氣打落去囉!」

揸刀反抗

為自身安全,景子懷疑恭子想攞自己條命時,就會揸起刀對抗。一向演開愛情喜劇嘅景子,話想轉型,嘗試拍驚慄片,睇佢陰森表情,好有潛質做恐怖片女王。

狂摑景子

恭子(左)試過發癲,捉住景子(右)個頭狂 fing,更連環掌摑,狠辣程度,勁過《巨輪》倀雞英。

景子雖然被恭子搞到差唔多發癲,但當透過日記發現恭子原來患有雙重人格,於是搵埋好友高良健吾一齊幫恭子做番正常人。

為父嫁奀星

31歲恭子同 28歲奀星五十嵐麻朝搞姊弟戀,拍拖 3年,兩人一早同居,共用一部單車,有傳今年內還會拉埋天窗。

現時已屆 31歲的恭子,與 28歲奀星男友五十嵐麻朝已拍拖 3年,雖然之前恭子經常話未係時候結婚,但有指恭子父親最近健康愈來愈差,為圓父親見證愛女出嫁心願,最近恭子已改變主意,所以今年內恭子隨時傳出婚訊。

恭子笑唔鬱

初出道時恭子(左圖)雖然包面,但勝在有少女氣質;可惜現已變成膠面人,慘不忍睹。

出道以來一向肥嘟嘟的恭子,近年唔只積極減肥,去年曾試過 3個月內減去 22磅肉,令體重降至 110磅,為 keep住青春,有指恭子還去打 botox,可惜打得多,面部表情變得愈來愈僵硬,最近被影到微笑時面部肌肉鬱唔到。只得 31歲就搞成咁,何必呢?

《同屋:喚命日記》

上映日期: 2月 20日



鍾意就快D Share啦!