據知無綫播上季《好聲音》零宣傳冇反應，主辦單位遂將今季交給 now轉播。如果無綫繼續播，糖妹亦有可能有得留低。
探熱針
玩綽頭 官恩娜糖妹冇料到 出局《中國好聲音》
浙江衞視王牌歌唱節目《中國好聲音》今個暑假推出第三季，節目大收，令兩度擔任教練的庾澄慶豬籠入水，參賽歌手吳莫愁、李代沫等可以出唱片開巡迴演唱，賺到笑！新一季《好聲音》終於預埋香港歌手。據了解，入圍的本地薑落實包括有曾被性侵的趙頌茹、在亞視絕處逢生的亢帥克及港姐出身的周美欣；至於嘗試敲門的官恩娜、鄧穎芝和糖妹，因缺乏淒涼際遇，被主辦單位嫌冇料到，冇份玩。
愈慘情愈好
最新一季《好聲音》週日（六月二十二日）在香港進行公開招募，曾經是歌手的趙頌茹當日帶住囡囡，由老公周永恒陪同到場報名，有家人在台下打氣，已經走出性侵陰霾的阿 Yu，忍唔住邊唱邊喊。
據了解，今次由 now跟《好聲音》聯手選拔歌手，唱得未必一定入選，還要考慮參賽者個人經歷，愈戲劇性愈有賣點，機會愈大。
「佢哋已經通知阿 Yu入圍。近幾年有咁多事發生喺佢身上，之前仲爆埋細個俾人性侵，加上周永恒，一對患難夫妻有好多話題，而佢試音嗰日表現唔錯，所以啲評判揀咗佢。除咗阿 Yu，早排離開亞視又俾公司告緊嘅亢帥克都入圍，佢由內地嚟香港發展，當中有好多勵志經歷，啲評判好 like。另外仲有選過香港小姐嘅周美欣，佢喺加拿大贏過好多歌唱比賽，但因為選美先有機會入娛樂圈，都好有 gimmick。」知情者說。
官恩娜爛聲
有鄧紫棋憑《我是歌手 2》走紅國內做例子，令不少在本地樂壇浮沉無碟出無出路的歌手，主動敲門搏一鋪。
「好似鄧穎芝，好多年冇出過唱片，好在 N年前有首歌叫《苦情人》喺南方仲係好 hit，令佢可以返內地登台做騷；一個月前主辦單位搵佢去試音，佢寄咗 demo去，不過最後冇回音。
「其實好多歌手見到阿 G.E.M.咁掂，都唔介意去玩選拔賽，官恩娜都有去玩，但因為嗰日狀態差把聲爛曬，入唔到圍。最唔好彩係糖妹，佢本來入到圍，但原來佢份約同無綫係包埋歌星約，最後要自動棄權。」知情者說。
水漲船高
12年浙江衞視買入《 The Voice》版權，一手打造《中國好聲音》，節目推出迅速熱爆，令不少參賽者一夜爆紅，挾住《好聲音》招牌，長搵。
|
鍾意就快D Share啦！
|
|
|
