2015年4月1日 星期三

《五個小孩的校長》勁催淚收過千萬 導演關信輝:寫劇本已經喊! [FACE - 410] MF,



戲中5位小朋友從未拍過戲,但男女主角卻有楊千嬅和古天樂,導演關信輝解釋:「監製陳木勝話題材好有意義,但冇咗 cast就冇咗焦點,冇咗話題就唔能夠持久,會好快落畫,所以要搵就要搵最好嘅演員。」

爆 Like王

《五個小孩的校長》勁催淚收過千萬 導演關信輝:寫劇本已經喊!

《五個小孩的校長》改編自「$4,500校長呂麗紅」的真實故事,由楊千嬅飾演的呂慧紅,眼見只得 5位學生的元田幼稚園面臨倒閉危機,為了幫助小朋友繼續有書讀,甘願以超低月薪接任校長一職;故事感人,觀眾開場喊到散場,上映未夠兩星期,票房已超過 1千 3百萬。

導演兼編劇關信輝在拍攝前親訪過呂校長,電影內容有九成是真實情節,關導演更透露了一些被剪走的內容,說到眼泛淚光;他自己亦曾有個改變他一生的老師,可是關信輝想邀請他看這部電影時,才知他已離世,忍不住哭了!

關信輝說到當年恩師禁不住流淚,想睇多啲可能係關導演有史以嚟最感動嘅訪問,就要下載 FACE Pop睇片喇!

真實版校長呂麗紅在小朋友特訓期間扮演副校長,楊千嬅係校長,令小演員熟習彼此關係,但呂麗紅因不想高調而沒有參與演出。 YouTube畫面

F:《 FACE》 關:關信輝

F:當你搵真實嘅呂校長,佢有咩反應?

關:其實第一次見佢就喺畢業禮,唱緊〈友誼萬歲〉,即係電影入面嗰首,我喊到不得了!嗰日十幾人畢業,我已同自己講,套戲 ending一定係畢業禮。完咗之後我同校長食飯,我又喊晒,佢又喊晒,佢話當年只係一個人畢業啫,我聽完好感動,一定要拍出嚟,好多謝佢信任我! Day 1開始唔係歌頌一個人,校長亦唔想歌頌佢幾偉大,而係表揚佢以生命影響生命嘅精神。

戲中場景係一所棄置學校,製作人員重新裝修變成元田幼稚園,不在原址拍攝是因為學校要正常上課,而且太多阻礙會影響小朋友演戲。

F:有冇啲感人真事未有拍出嚟?

關:有好多,呂校長知道嘉嘉(飾劉玉翠女兒)屋企啲傢俬好舊,佢真係女俠!搵人捐咗成車傢俬,搵搬運公司車去嘉嘉屋企,佢屋企喺落斜,啲工人唔負責搬,校長傻到自己搬,床呀櫃呀,搞到啲搬運工人感動到一齊搬,我覺得呢場好好睇嘅,無奈片長冇拍到。另外係何伯(吳耀漢飾)有次約校長喺屋企食飯,校長開工到好夜,去到見到張燈結彩,原來係何伯生日,但佢唔敢預早講,因為覺得校長嚟係好榮幸,佢好尊重同好感激呢位校長,所以張燈結彩。

珠女父母在雷雨天車禍死亡,珠女向天伸手呢場戲拍咗過百 take,關導演向小演員王詩雅解釋:「珠女,我都掛住媽媽,因為我媽媽都過咗身。我喊,珠女就明白佢點解要喊,其實小朋友係好聰明!」

F:你點樣挑選同訓練 5個小朋友?

關:用咗 4個月去搵,喺音樂學校、團體、 fb,結果 cast咗四百幾個,再選 10個仲要有兩個月特訓,佢哋會同千嬅一齊,小朋友要叫番戲入面個名,千嬅嚟到要叫佢校長,大家熟習先。嚟到要裝咪,因為去到現場先畀啲新嘢佢哋會唔習慣,一唔舒服就可能唔集中,喺片場會發生嘅嘢都喺呢兩個月 run咗先。所有小演員唔可以拍過戲,要一張白紙,因為係講情真或者童真,如果佢做戲、扮可愛就唔 work。

每位小演員的特訓都唔簡單,好似飾演小雪的何涴瀠,每日要踩住鐵桶在廚房煮飯,所以在戲中才會看到她熟練的手勢。

F:戲中有一句「每個人都有掛念嘅好老師」,你自己嘅好老師係邊位?

關:小學我讀書好差,考 0分考第尾,好多老師話我冇得救,但有位姓朱嘅中文代課老師同我講:「喂關信輝,我睇你個樣,其實你都係聰明嘅,不過心散,不如由𠵱家開始,你集中做一樣嘢,我相信你會有成就!」我未試過有人讚,朱老師話我得喎,我就不如作文啦,從此儲錢去書局買作文書睇、去寫,突飛猛進,開始寫故仔、寫詩、讀大學寫論文,𠵱家寫劇本做導演。我好多謝呢位老師,但係我返學校想請校長同教師睇呢套戲,校長話呢位老師已經過咗身……但我諗佢喺天上,都會恩惠嘅!

F:點解咁易喊?

關:由寫劇本開始已經喊,其實邊個整喊我?係喬宏!以前我唔喊嘅, 99年拍《天使之城》(福音電影),有場戲講陳嘉輝唔返屋企食飯,返到去阿爸已經死咗,喬宏就同佢講:「記住呀,飲湯唔係飲維他命,係飲煲湯嗰個人嘅心機。」句對白係我寫嘅,但通過喬宏講出嚟,我直頭嗌唔到 cut,嗰次之後一觸碰到啲感動位就好易喊,但係好嘅,如果感動唔到我,又點感動到觀眾!

鍾意就快D Share啦!
Related Posts Plugin for WordPress, Blogger...