告別號
離離合合完鳥吧 《 FACE》踢爆過的戀情有很多
《 FACE》 07年繼承《壹本便利》創刊以來，總共出版了 462期。 4百幾期當中，做得最多封面的男藝人，竟然係緋聞同是非都唔多的陳豪，佔了 6期；而封面女王就係張栢芝，佔了 14期！
多年來，唔少明星的地下情都係由《 FACE》率先爆，包括陳法拉薛世恆、鍾嘉欣伍允龍、胡杏兒 Phil、 G.E.M.同林宥嘉等。可惜再 sweet的戀情都有完結一日，除咗杏兒能夠開花結果，其餘 3段戀情，都同《 FACE》一樣難逃一死。
完了吧，如無意外。不過一段感情結束，代表新開始即將來臨，希望在明天，好似我們還有《 KETCHUP》同《交易通》延續《 FACE》精神，祝每個上過《 FACE》封面的女星，都可以學嘉欣 bb咁幸福，搵到個好歸宿！
封面王 陳豪（ 6次）
絕種好男人陳豪以 6期成為《 FACE》封面王，想當年仲未坐穩大台一哥位的陳豪，同廖碧兒拍拖時女尊男卑，試過半夜三更陪女友睇急症，又做柴可夫車出車入，但仍逃唔過被撇命運！好在好心有好報，陳豪已經成為大台搶手貨，又同港姐陳茵媺結婚，嚟緊仲會做第三任爸爸添，真係好幸福！
封面后 張栢芝（ 14次）
栢芝出道十幾年，發生過江湖姦殺令、淫照事件、結婚生仔離婚，絕非一般 35歲女人會經歷過！《 FACE》見證住柏芝同霆鋒由拍拖到分開， 2011年兩人離婚，亦係由本刊率先爆。雖然冇咗老公，但柏芝依然努力湊大 Lucas同 Quintus，更成功殺入內地，狂搵人仔養家。呢方面真係要畀 like㗎！
首爆法拉薛大少拍拖
當年未係一線花旦的法拉，做來做去都係幫手推油的姣精角色，但法拉一早冧掂身家超過 20億的薛大少薛世恆。 07年兩人拍拖斷正，法拉揸下車發現記者，為保護戀情同男友，竟然冒險片車，仲差啲撞低本刊記者，順利成為《 FACE》創刊封面！可惜兩人最終於 13年宣布分手，法拉亦離開大台，獨自到美國讀書進修。
鍾嘉欣伍允龍斷正
《 FACE》第 2期封面，係鍾嘉欣伍允龍拍拖斷正！ 07年，本刊在將軍澳坑口村發現二人密會，凌晨時份一齊歎泰國菜，仲一碗河粉兩份食。可惜兩人拍拖 8年後，去年正式分手，嘉欣 bb更極速搵到在加拿大做脊醫的新歡 Jeremy。兩人於今年 2月舉行婚禮，更盛傳嘉欣會在溫哥華安胎。同新歡結婚生仔都係 1年內搞掂，反而同伍允龍一齊 8年都唔肯公開， it’ s not fair！
胡杏兒陪 Phil去 ball
胡杏兒同黃宗澤拍拖 8年，曾經高調在台慶公開「互頂宣言」，又同居多年，偏偏最後都要分手收場。回復單身後，大把人追的杏兒， 15年 1月被本刊踢爆，陪新歡李乘德 Phil去除夕 ball。戀情曝光後，杏兒索性公開關係，更於去年 12月結婚，婚後展開長達 2個月的蜜月旅行，遊遍日本、希臘、英國、馬爾代夫等地！而前度 Bosco早前則被爆戀上日模 Jun，各有各幸福
林宥嘉爆 seed護 G.E.M.
10年 12月，本刊發現林宥嘉秘密來港陪 G.E.M.過聖誕。當時呢對熱戀中嘅情侶，戴住口罩都要去銅鑼灣做連體嬰，又熊抱又啜嘴，仲一齊返 G.E.M.的深井屋企過夜。點知去到樓下發現記者，平時陰聲細氣的林宥嘉，竟然失控發狂追打記者，最後要 G.E.M.幫手勸停！但 14年爆出林宥嘉偷食台妹，兩人隨即分手，仲隔空互罵！
毒 L一齊追睇過的𡃁模
𡃁模曾經瘋行，呢 4個女仔相信有追開《 FACE》嘅讀者，一定有印象，當年宅男最期待就係書展，周秀娜、 Angelababy、 DaDa， Kama等，成班𡃁模鬥出寫真，佢哋嘅寫真集你未必有買，但佢哋嘅性感相，你一定有睇過，當日大家嘅女神，鬥性感，鬥是非，不過今日 Angelababy變咗黃曉明老婆，周秀娜已收起性感， DaDa仲攞埋金像獎最佳女配角， Kama喺英國讀緊碩士。或者你仲揾緊下一位女神，但係時候諗一諗，應該同女神一齊進步喇。
話題女王 周秀娜做老闆
07年當時得 22歲嘅 Chrissie周秀娜，因為 D cup身材，有曲綫又有線條，加上樣貌似樂基兒同阿嬌，每次嘅性感出現，都係傳媒同宅男嘅驚喜，其後出嘅寫真集，非常有話題性，成口泡刷牙，人形攬枕，宅男一定會記得，寫真集令 Chrissie成功上位，之後再拍電影及喺國內拍大陸劇， 13年仲做埋內衣品牌 LAMIU老闆,事業成功，但女神一直冇着落，自同陳偉成分手後，一直未有人得到女神，飛雲機會嚟喇！
百果園 DaDa：「𡃁模係我人生一部份。」
當年 21歲 DaDa陳靜，因拍咗個百果園廣告，加上 E cup身材，好快成為宅男女神，之後出過幾本寫真集亦大賣，好快就入咗電影圈， 13年憑《低俗喜劇》攞到金像獎〈最佳女配角〉， DaDa由𡃁模變為電影人，但佢絕不介意曾經被稱為𡃁模。
她說：「好多人會介意被人叫𡃁模，但我絕對唔會，嗰個階段係我人生一部份，我冇後悔，亦冇後悔行性感，出寫真，如果而家操得返個狀態，我唔介意再影㗎，哈哈哈，當日幫《 FACE》影水着，開頭好緊張，但啲相出嚟好靚，之後亦影咗幾次，亦都因為咁多咗人認識。」
Kama英國讀碩士
08年因為拍邦民電視廣告，令 18歲 Kama羅凱珊上位，之後亦發生過彭順事件，但冇影響佢嘅事業，之後仲幫迪士尼賣廣告，其後推出寫真集，亦大賣， 10年 Kama突然退出娛圈，轉到英國讀書，據知今年她將會碩士畢業，當年會考只得 2分，但經過 6年努力，而家變為碩士畢業，好叻女㗎！
Angelababy做埋人妻
講起𡃁模，一定要提 Angelababy，家陣佢已經成黃曉明老婆，並在大陸爆紅正式成為強國人，不過當年佢都係靠出水着寫真儲落一班粉絲上位。
當然仲有一班大家欣賞過又叫唔出名嘅𡃁模，《 FACE》當年都出過 3本精裝𡃁模寫真精華嘅特刊，一出亦俾大家搶斷市，唔知大家仲有冇 keep呢？
韓料最爆 推超強韓娛 app
自《 FACE》創刊，一方面緊貼本地娛樂，韓娛方面仲係走在最前線嘅傳媒！早前 hit爆中、港、台神劇《來自星星的你》，《 FACE》專程飛到韓國當地直擊拍攝結局篇，仲公開兩位主角金秀賢同全智賢的真實一面，原來全智賢排場仲勁過「千頌伊」㗎！另外，《 FACE》亦專程飛到海南島踢爆情侶手鈪上陣嘅 EXO中國籍成員 Tao同世勛喺池邊調情添！而之後推出嘅手機 app《 FACE Pop》，更是主力韓國娛樂資訊，名符其實「韓料最強」！
獨家首爾追《星星》
金秀賢原來都係「煙民」，唔使埋位總會匿埋一角「叉叉電」，不過食煙對身體有害，「都敏俊」都係早戒為妙
雖然全智賢呢身打扮同一般市民落街買餸冇乜分別，但勝在女神天生麗質，唔靠衣裝都有「星味」，女神果然唔係「流」㗎！
直擊 Tao同世勛海南密會
MAMA足本報導
《 FACE》對於一年一度音樂盛事「 Mnet Asian Music Awards」（簡稱 MAMA）梗係會緊貼報導！好似去年頒獎禮亮點落咗去頒獎嘉賓周潤發度，同 BIGBANG打成一片嘅發哥，台上瘋狂 selfie到台邊，最後搞到要工作人員出手趕落台，《 FACE》同《 FACE Pop》都有全程足本睇！
U界年度盛事 FACE UStar打造校園型人 Icon
《 FACE》除了娛樂靚女韓娛勁之外，由《 FACE》主辦嘅 FACE UStar校花校草選舉絕對係大專界嘅年度熱話，入到圍嘅都係靚仔靚女又有才華，可以話周身刀，張張利。活動舉辦六年以嚟，一直成就咗唔少年輕人嘅夢想。有人參加完做咗明星、有人參演拍戲、有人拍旅遊節目、有人仲做埋港姐， FACE UStar真係佢哋達成理想嘅第一步。
李任燊 Kyle
2011 FACE UStar校草冠軍、網上人氣 UStar Boy
電影《藍天白雲》男主角，演鄧麗欣老公、港台青春劇《 DIY2K》、內地電影《沙漏愛情》男主角，並拍攝維他港式奶茶、八達通、 7-11等多個廣告
陳詩欣 Eunice
2011 FACE UStar2強
MusicNEXT旗下歌手、 Jamcast旗下模特兒
推出單曲派台作品《感情戲》、《蠢》、拍攝港台青春劇《 DIY2K》
群星出力盡撐
每年 11月都係 FACE UStar校花校草選舉會進行決賽，比賽當晚除咗 UStar搏盡之後，都有一班巨星嚟唱歌助慶，謝安琪、周柏豪、關心妍、 Super Girls、 As One等等都有得做嘉賓助慶，現場同學睇得開心，一班 UStar表演亦更落力。
歷屆 UStar型人代表
撰文：娛樂組
|
鍾意就快D Share啦！
|
|
|
