熱爆娛樂: 傾掂數　禮金全免　楊怡 3樓揸手嫁羅仲謙 [FACE

2016年3月30日星期三

傾掂數　禮金全免　楊怡 3樓揸手嫁羅仲謙 [FACE - 462] __,羅仲謙,楊怡,MF,

楊怡同羅仲謙秘密到英國註冊，謙謙特登揀古堡影結婚相，希望老婆可以好似公主咁出嫁！

封面

傾掂數　禮金全免　楊怡 3樓揸手嫁羅仲謙

大台花旦近年陸續出嫁，先有胡杏兒上年高調嫁夜場老闆 Phil，再有鍾嘉欣同加拿大脊醫 Jeremy閃婚兼盛傳佗埋 B，日前終於輪到楊怡喇！

36歲楊怡秘密與 31歲羅仲謙到英國註冊及影結婚相，正式成為羅太，恭喜晒！上週日(27日)，兩人回港交代婚事，謙謙兩度錫楊怡額頭，更已改口叫楊怡做太太，閃盲在場記者。

結得婚做人世，當場係講心唔講金。貴為大台一線花旦，楊怡手持 3個總值超過 2千萬的物業，反而謙謙仲未做到業主，今次娶老婆一毫子禮金唔使俾之餘，婚後亦係入住楊怡的日出康城單位，同外母一齊生活。想快啲過二人世界，謙謙要努力喇！

拍拖 4年，楊怡終於同細自己 5年的羅仲謙拉埋天窗，更瞞住公司同經理人，秘密到英國的利茲普城堡影結婚相，又在雙方父母見證下註冊，正式成為夫婦。

楊怡同羅仲謙上週日（ 27日）由英國返港，在機場 sweet爆晒鑽戒；謙謙之後又在微博叫太太做「羅楊怡」，好識冧女喎！（網上圖片）

兩人去年到台灣旅行遊夜市，當時已傳出二人有計劃於今年 3月結婚。《蘋果日報》圖片

上年 4月，楊怡同謙謙低調睇樓，可惜最後都抽唔中，置業失敗。《蘋果日報》圖片

愛儲磚頭

上週日（ 27日），兩人放完假返港，在機場拖手曬幸福，左手無名指戴住鑽戒的楊怡，被問到巨鑽有幾重時，即時一副冧樣維護老公，「幾多卡唔重要，最緊要係有心！」

事實上，出道 17年的楊怡，事業同身家都比老公羅仲謙優勝。搵得多而且投資有道，楊怡現時已擁有 3層樓，分別係將軍澳日出康城、將軍澳中心及紅磡城中匯， 3個物業市值加埋超過 2千萬！

楊怡非常孝順，現時同媽媽一齊住喺日出康城單位。（網上圖片）

楊怡家姐楊卓娜唔覺意洩露咗一家人去英國嘅行蹤。（網上圖片）

謙謙今次秘婚冇通知公司，激嬲一向疼錫佢嘅老闆王海峰（左）。圖片

謙謙冇樓揸手，之前一直住喺大埔圍村屋企。（網上圖片）

同外母住

一向愛錫家人的楊怡，大方把將軍澳中心單位讓俾家姐楊卓娜一家居住，自己則與母親居於日出康城領峰的過千呎單位。至於冇樓揸手的謙謙，婚後則要搬去老婆的日出康城寓所，與外母同住！

其實早有結婚計劃的謙謙，曾努力嘗試做業主，去年更帶埋楊怡睇將軍澳緻藍天新樓，可惜最後抽唔到，被迫轉 plan。除了要繼續黐樓住，謙謙今次同老婆傾掂數，一毫子禮金都唔使俾，淨係出機票酒店錢去英國影相，慳番一大筆！

早前楊怡拎住巨鑽玩具自拍，暗示就快做人妻。（網上圖片）

羅仲謙同楊怡上週五（ 25日）突然公布婚訊，兼發了一張結婚相。（網上圖片）

謙謙今年套《西遊記》在內地票房狂收 11億，成功在內地有少少知名度。（網上圖片）

辣㷫老闆

雖然搵錢能力同資產都不及老婆，但謙謙近年積極工作，在年初的賀歲片《西遊記之孫悟空三打白骨精》中，謙謙飾演「沙僧」一角，與鞏俐、郭富城等合作，算係邁向殺入內地市場的第一步。

謙謙同楊怡只在英國逗留幾日即急住返港，除了因為楊怡週一（ 28日）要出席新劇宣傳活動，更主要係謙謙今次秘婚過於突然，連公司都呃埋，結果激嬲老闆王海峰，被急 call返香港解話兼補鑊！如果因為結婚搞到冇咗個飯碗，謙謙真係要帶老婆返圍村住喇！