掃呢頁CODE去手機

2015年4月1日 星期三

咪嬲豬呀!愚人節邊個先係整蠱專家? [FACE - 410] MF,



全知言

咪嬲豬呀!愚人節邊個先係整蠱專家?

4月 1日係愚人節,呢日無論俾人點整蠱都唔嬲得,所以做好俾人玩嘅心情未呀?全知言問咗啲演員、歌手睇吓佢哋有冇俾人整蠱過或者整蠱人,先知原來 Evelyn(蔡穎恩)係危險女友嚟㗎!

糖妹 假扮細佬

我情人節嗰陣扮咗個男裝, post咗張相扮係我扮細佬徵女朋友,得到嘅 feedback有好多女仔嚟問我攞 WeChat呀、 facebook呀、電話呀咁,但我統統幫我細佬整走晒,因為我細佬去咗拍廣告,捧咗佢做明星喇!(最尾兩句係糖妹整蠱你哋咋!)

網上圖片

咁好心機扮男人又寫晒徵友留言,唔怪得啲人中伏

Evelyn蔡穎恩 扮踏兩船

我試過同初戀男朋友講,好凝重咁講,我好對唔住你呀,我做錯嘢呀,我一腳踏兩船,仲同朋友夾計整咗啲曖昧嘅 message,結果佢好嬲好嬲好嬲,最尾我哋叫佢睇埋啲 message最底嗰句,跟住佢碌碌碌就睇到「愚人節快樂」,跟住佢成晚冇同我講過嘢喇!最後我要嗲番佢同埋扮小丑囉!

安志杰 門口放屎

喺美國讀高中時,啲同學整我,攞堆屎,用紙袋包住跟住點火,擺喺我屋企門口,一開門見到有火,會踩嘛,但係我知道佢哋整蠱我,因為電影上面有見過呢個畫面,嘻嘻!

天堂鳥

被女神玩

左起: Tyrese、 Gordon、 Lincoln

有個自己幾有好感嘅女仔用短訊向我表白,嘩真係幾開心!傾咗幾句以為當真,點知原來係玩我,嗰時自己未拍過拖,以為中獎,原來都冇買彩票!

愚人節玩得激 街坊:叫我起身屙尿

分別喺尖沙咀、旺角同銅鑼灣訪問咗幾十人,但似乎香港人唔多興玩整蠱,或者俾人整蠱咗都唔記得,今年愚人節不妨玩吓啦喂!

黃小姐

試過有人打嚟話我中咗獎,又試過叫我起身屙夜尿,識得㗎,我鬧番佢:「你黐線㗎?」

姚先生(台灣)

見過有人在大廈頂樓聊天,男生突然掉下去,掉落一樓,把女生嚇倒,跑過去發現下面有氣墊床,原來沒事。

鍾意就快D Share啦!