2015年4月8日 星期三

王征玩死亞視 宮雪花:好後悔選亞姐! [FACE - 411] 亞視,亞洲小姐,亞姐,王征,宮雪花,MF,



宮雪花一直身體力行支持亞視,但到了今時今日,總有轉軚的時候,你估佢撐大台定撐王維基 HKTV多啲,就要下載 FACE Pop睇片喇!

爆 Like王

王征玩死亞視 宮雪花:好後悔選亞姐!

亞視踏入倒數,經歷 58個年頭的電視台最終死於王征手上;曾係亞視 icon之一的宮雪花,今年也正正是她參選亞姐的 20周年,沒有亞視就沒有宮雪花!

66歲的花姨對亞視的感情深厚到可以貼錢返工、冇約依然肯義演撐到底,但去到呢一刻已經心淡,花姐終於忍唔住,大鬧王征唔知香港人需要乜!仲話非常後悔選過亞姐!

王征未入股亞視前已認識花姨,花姨稱兩人私底下有聯絡。《蘋果日報》圖片

F:點睇王征出咗咁多怪招都續唔到牌?

花:王征話(唔續牌)呢個係陰謀,我哋真係唔明白係乜嘢陰謀,可能只有佢自己知道,原來成個賣盤過程係個陰謀?陰謀呢個字可圈可點囉!點解話係陰謀,唔話係商業運作呢?點解王征唔早一日公告胡先生(胡景邵)會買亞視呢?點解( 3月 31日)會講王維基(先)呢?王維基係一個好敏感嘅名字,據說係「一男子」唔想王維基發到免費牌嘛!王征明知「一男子」唔鍾意王維基,點解會攞佢出嚟講?真係百思不得其解,我覺得佢係計算錯誤囉!我覺得政府係有心唔想亞視經營落去囉!

宮雪花(右) 95年以 47歲高齡參選亞姐,成為熱爆話題,盛傳有人為搶回收視,開條件邀約她過檔,但花姨不為所動,結果當年亞姐收視高達 31點,只輸俾對台 1點成為奇蹟。《蘋果日報》圖片

F:點解亞視一直搵唔到買家呢?

花:王征覺得佢哋出手太低,我哋有次傾過,因為亞洲會同王征食飯,王生對我講:「呢 5年有個小小遺憾,冇捧你發揮出你嘅潛力。我就問,今年我係亞姐嘅評委,出年仲係唔係?佢答:「如果我一日話得事,你就一定係。」佢講得出呢句話,係咪即係已經搵咗買家,所以有可能話唔到事呢?佢係有信心嘅,只不過蹉跎咗歲月,冇早啲拍板囉!猶猶豫豫,諗住政府一定發牌,咪拖得幾耐得幾耐,可以傾吓價囉,所以佢係計錯數!

花姨在亞姐只奪得第五,以及「最受傳媒關注獎」,有機會拍劇,但她嫌拍得少及宣傳不足。《蘋果日報》圖片

F:20年前你選亞姐曾被人撬過大台,條件係唔去總決賽,今時今日有冇後悔?

花:我喺亞視選美嗰陣好委屈㗎!收視 31點,隔籬台 32點,用咗 26個巨星,張國榮、梅艷芳、譚詠麟、曾志偉等等, 26個打你,香港歷史上冇試過;當時真係有人嚟問我可唔可以喺總決賽消失,跟住嚟我哋台,我哋會畀你幾錢、幾多份合約,發誓真係有咁嘅事!但我覺得對唔住良心,因為我真係想拍戲,如果知道今時今日亞視係冇製作嘅,我一定去(大台),對唔住亞視我都要去!分分鐘我喺嗰度做咗視后呢,做咗影后呢!我係覺得好難受!我可以對住亞視講,我係非常之後悔!

宮雪花早前因用「美圖秀秀」執相太重手,執到欄杆都變形而被網友譏諷,的確幾識得製造話題。網上圖片

F:如果你係亞視高層,有冇計起死回生?

花:嗱!家寶(亞視執行董事),如果你分啲權力俾我做高層,我一定做到一隊少女時代,家寶你信唔信我?我又讀過工商管理,點解唔俾我管理一隊亞視嘅少女時代呢?可以打上國際,我哋有咁多亞姐,被淘汰嗰啲都好有才華,如果佢哋唔夠靚,我會叫佢哋去韓國整容,做到國際化嘅少女時代,但呢個幻想已經破滅咗喇!怪你囉家寶!王征,你 5年冇捧我囉,如果你唔俾我喺亞視開畫展,你一世都對唔住我呀!

鍾意就快D Share啦!
Related Posts Plugin for WordPress, Blogger...