騷肌 selfie
蔡國威經常做 gym，雖然未去到張家輝咁精壯， 41歲年紀嚟講，叫做好 fit㗎喇。
網上圖片
真面目
一技傍身 亞視釘牌 六合彩都冇得播 蔡國威廣州開健身室轉行
亞視不獲續牌，做到下年 3月正式消失，雖然仲有 12個月，但亞視個個月都出唔齊糧，隨時執笠唔出奇，一眾藝員要變失業大軍，而亞視唯一有收視嘅節目《六合彩》（收視平均 1點）合約亦到 7月完結，有六合彩王子之稱嘅蔡國威絕對首當其衝，一向死忠的他亦打定輸數，原來一身亞洲先生 body嘅蔡國威想到廣州開健身室。他說：「呢行講機遇，我都唔知有冇機會做落去。」
41歲蔡國威喺亞視捱足 22年，當年參加《未來偶像爭霸戰》入行，（當年冠軍為田蕊妮），多年來係亞視金牌司儀，近年主力做《六合彩》主持，上週三（ 1日）行會宣布亞視不獲續約，亞視做到下年 3月就消失；而《六合彩》播映權原來去到今年 7月 31日就完結，做咗 10年主持的他，只剩番 3個月做。
8月約滿的蔡國威，出名係亞視死忠，他說：「屋企人冇畀壓力我，朋友好多都問我點，好多好主動幫我搭路，但我唔急於要𢱑撈。有諗過完全唔做呢行，始終呢行講機遇，我都唔知有冇人想用我。」
除咗做司儀，原來蔡國威亦有一身好 body，平時包到實，私下其實係健身發燒友，喺微博不時「騷肌」，最近幾個月經常香港、廣州兩邊走，據知想搞健身室生意。他說：「係搞緊一啲嘢，但真係好初步囉，係近半年先諗。（搞健身室生意？）哈哈，呢樣生意係我自己興趣之一啦。等我再實行多少少先同大家交待啦。」
亞視散 band暗星散 張家瀅喊到豬頭
張家瀅係亞視唯一做到女神嘅藝員，有樣有身材，為亞視釘牌喊足兩日。她說：「喊咗兩日好唔捨得亞視，希望繼續可以喺呢行。」
亞洲小姐仲有得搞？
亞視釘牌，嚟緊亦唔會有白武士登場，眾所周知一定冇水，估唔到最近亞視官網（有官網㗎！）竟然登出 2015亞姐同亞生嘅網上報名宣傳！你真係估佢唔到！會唔會到時要求啲參賽者貼錢比賽呢？咁易估到就唔係亞視
|
鍾意就快D Share啦！
|
|
|
