2015年4月8日 星期三

亞視講波隨時冇工開 鍾志光仔:唔想靠老豆入大台 [FACE - 411 - 大專校園] 亞視,BKD_S,MF,



鍾行廉  21歲 教院體育教練及管理副學士 Yr.2

原來 Isaac同朋友開咗間公司,雖然連名都未改,但已經籌備緊同旅行社合作搞一啲專睇 NBA的旅行團,仲話賺得多唔多錢係其次,最緊要推廣到籃球。

Main Camp

亞視講波隨時冇工開 鍾志光仔:唔想靠老豆入大台

亞視終不獲續牌,原先亂吹王維基會買起亞視,原來係王征 FF!俾佢玩殘又點只香港市民,現就讀教院體育管理副學士 Yr.2、 21歲嘅鍾行廉( Isaac)本已傾好下週二( 14日)首次擔任亞視直播本地甲一籃球聯賽評述,但家陣亞視隨時執笠,份工凍過水。

其實 Isaac係大台足球評述員鍾志光長子,同樣流住講波血, Isaac有老豆做後台,根本唔驚冇工開啦,不過佢話:「唔想靠老豆入大台!」後生仔最緊要有骨氣!

鍾志光仔 Isaac從小就鍾意睇波,開電視總聽到爸爸(鍾志光)做評述,所以當正佢係偶像,仲想做老豆接班人:「被爸爸影響,自細就鍾意體育,中五已經申請入 TVB實習做倫奧資料搜集員,諗住鋪路做夢想嘅講波佬,不過 TVB唔多招攬新血,咁啱上年亞視請體育評述員,結果俾我成功入圍,咪焗住同老豆打對台。」不過𠵱家亞視不獲續牌,評述員份工凍過水, Isaac直認只要爸爸向公司開口,要入大台體育組唔難,不過 Isaac始終冇咁做,「我想靠自己,唔想俾人覺得我冇料,全靠父幹!」

亞視不獲續牌,睇嚟 Isaac喺 14日第一次嘅「處女作」,甲一籃球聯賽永倫對晉龍嘅評述隨時冇工開。他亦表示仲未收到通知究竟要唔要返工!網上圖片

咪以為 Isaac同鍾仔兩個喺屋企睇波實會拗到面紅耳熱,原來兩仔爺都齋睇唔講。

做甲一打雜鋪路

唔好睇 Isaac(黃圈)斯斯文文,其實佢睇得又打得,仲係仁濟醫院王華湘中學籃球隊助教。

為咗省靚履歷,向大台評述員目標進發, Isaac就算功課有幾忙,都盡量搵體育有關嘅兼職,中五同年就有幸入咗本地甲一籃球隊福建做領隊助理:「喺大台實習有次出去採訪籃球比賽結識到張志豪(亞視體育記者兼前福建領隊),佢問我有冇興趣幫佢一齊管理球隊,我梗係𦧲飯應,一做就做咗 3年。有時見街場打波勁嘅,又會叫佢哋試下去福建跟操,甚至隊員練波比賽有啲咩唔敢同教練溝通,我就做埋社工角色,好似當佢哋朋友咁傾偈,同教練分享番啲球員感受,所以我同班球員好 friend㗎!」

Isaac坦言做咗福建領隊助理 2年,原來並沒有薪金,就算現於另一支甲一隊伍晉龍做,都係零收入,但 Isaac就好抵得諗,「阿爸教落做人唔好怕蝕底,我自己鍾意做咪得囉,有時受薪壓力仲大,𠵱家冇薪我都去做,證明我真係好熱愛體育!同埋我夢想可以同爸爸父子檔主持 2016奧運,𠵱家望落我白做,好似好蝕,咪當學吓嘢兼建立好人脈,等多啲體育界嘅人識我,希望嚟緊 TVB會搵我啦,我唔想靠老豆先入到大台吖!」

做埋遞水

Isaac做咗領隊助理 3年,頭 2年的福建隊友、員工甚至教練都好照顧佢,所以今年想跳出嚟,喺晉龍由零做起,「講真我打波又冇佢哋咁叻,所以我會以朋友關心佢哋,一打完波就遞水,打好關係。」

阿爸唔鼓勵入行

Isaac對體育咁有火,身邊隊友、教練及前同事都大讚佢,不過爸爸鍾志光就唱反調,唔多想佢入行。

Isaac(黃圈)入行嘅恩師除咗係張志豪之外,另一位係 Keyman馬啟仁,佢話全靠 Keyman俾機會,可以喺佢間 505 Unit體育經理人公司做實習生。

Isaac爸爸 鍾志光

當興趣就得!

做體育評述員當興趣就得,始終呢行喺香港同外國差太遠,不過都相信佢嘅能力,記住呢行係靠實力而唔係人脈,靠人脈只會加速死亡。

甲一晉龍教練 安慶健

幫輕球隊好多!

可能 Isaac之前喺福建做過 2年,所以過到嚟晉龍都做得頭頭是道,好有熱誠,而且佢同啲球員關係好好,幫輕咗我哋好多。

甲一晉龍小前鋒 蔡育霖

好抵得諗!

佢唔會介意我哋叫佢執頭執尾,做好多嘢好似拎飛、 book場都唔會 say no,好抵得諗。

蕭芳芳細女採訪 NBA

鍾志光大仔 Isaac,一心想成為籃球評述員,同係星二代嘅蕭芳芳細女張雅琹,一樣熱愛籃球,佢曾經係英華校隊, 2011年仲做特約記者幫新浪採訪 NBA明星賽,訪問過高比同占士大帝,羨慕死人!

蕭芳芳因耳鳴淡出娛圈,大女凱琹 12年婚禮才全家出動,她向傳媒表示對細女雅琹(左)做體育記者大力支持。《蘋果日報》圖片

張雅琹雖然係特約記者,但她好落力,完場後第一時間上前同占士做訪問,毫不怯場。網上圖片

鍾意就快D Share啦!