掃呢頁CODE去手機

2015年6月4日 星期四

打拳跳舞賽車獨木舟 虎爸錢小豪無犬子 [壹週刊 - 1317] 錢小豪,M1,



探熱針

打拳跳舞賽車獨木舟 虎爸錢小豪無犬子

當年跟天后鄭秀文合作過《大頭綠衣鬥殭屍》的錢小豪,年前幫 Juno執導的《殭屍》埋位後,拍住花旦楊怡在電視劇《潮拜武當》擔正男一。現年五十二歲的他第一段婚姻觸礁,跟前妻所生的兒子關係亦遠不如現任妻子丘倩鳴所生的兒子錢穎德親密,虎爸錢小豪更全力培訓囝囝,操到十八般武藝皆能。

跳舞有天分

跟丘倩鳴結婚十四年,兒子錢穎德已經十二歲,得老豆真傳,身手靈活。以為兒子是學武材料,幾歲大的穎德便開始學泰拳。

「佢其實一直鍾意跳舞多啲,所以我冇逼佢,因為佢要對嗰樣嘢好有興趣,如果夾硬逼,對大家都唔好。」錢小豪自任教練,兩父子經常一齊練拳,亦以親子為主,打得出色與否,反而其次。

錢小豪坦言打拳時間,也是親子時間。

一二年細佬錢嘉樂結婚,錢小豪跟老婆及囝囝去飲,穎德更悉心打扮。

十八年前跟鄭秀文合作電視劇《大頭綠衣鬥殭屍》,直至今年才再拍大台電視劇,跟楊怡合演《潮拜武當》。

拍沈震軒 MV

見兒子有舞蹈天分,錢小豪順其自然,並投放時間資源,安排穎德跟兩個老師學爵士舞及 Hip Hop;去年沈震軒拍《親愛的》 MV,便邀請穎德一起在中環街頭對舞。

「我好開心個仔有自信,跳得亦唔錯,唔好以為跳舞好簡單,其實同打擂台差唔多,雖然唔似功夫咁有身體接觸,但要用晒身體肌肉,又要配合節奏感,普通一場舞五至十分鐘,八歲小朋友(穎德八歲開始學舞)要記晒十分鐘音樂,又要記咁多舞步,係要有啲天分。不過佢跳得好,好多女仔鍾意。」錢小豪說。

跟老豆在拳館一起接受訪問時的穎德雖然甚少主動發言,但個人興趣全部偏向動態,除了泰拳和跳舞,去年他參加小型賽車亦拿了第四名。

「我想佢習慣大場面,賽車起跑時後面有好多引擎聲,由紅燈去綠燈嗰一下好緊張,如果克服到呢啲情緒,對日後做其他嘢好有幫助。」錢小豪說。

穎德在沈震軒的 MV《親愛的》演出,跟他一齊跳舞。

憑《殭屍》翻生,錢小豪在戲中亦繼續騷肌。

九十年代殭屍片大熱,他跟林正英合作的《殭屍先生》屬經典代表。

邵氏出身

現年 52歲的錢小豪,自幼習武, 14歲在功夫擂台比賽中得銅牌,獲邀加入邵氏電影公司訓練班,更被名導演張徹收歸旗下,第一部擔任男主角的影片為《飛狐外傳》,因被公司力捧,帶挈胞弟錢嘉樂入行。

演出超過百部影片中以動作片居多,跟林正英、許冠英合演的《殭屍》系列,最深入民心。 02年一度淡出幕前轉做導演,作品包括《街燈》和《絲路豪客》。

錢小豪經歷過兩段婚姻,與前妻郭秀雲 90年在澳洲秘婚,誕下兒子錢景峰,但結婚三年便離婚。 01年,錢小豪與現任妻子丘倩鳴結婚,婚後育有一子錢穎德。

親子最緊要

只要囝囝喜歡,錢小豪都支持,賽車外,穎德亦有玩越野單車、獨木舟、射箭及高爾夫球,去年開始學埋自由體操。

「自由體操應該八歲開始,都遲咗幾年,不過佢身體柔韌性高,如果配合埋跳舞仲好睇,身體動作同腦筋轉得快有關連,身手好諗嘢會 sharp,我梗係想佢樣樣都有成就。不過講到底,都係享受同個仔一齊成長,兩父子有共同興趣、話題,就唔會有青少年暴風期。」錢小豪用心良苦。為栽培兒子周身刀張張利,付出不少。

玩小型賽車攞過第四名,穎德要求再玩 F1,錢小豪話:「要好多錢,俾佢嚇親。」

穎德要學射箭,錢小豪又抽時間跟他一起上堂。

兒子景峰三歲時,他跟第一任老婆郭秀雲離婚,父子關係疏離,甚少聯絡。

二○○○年,錢小豪曾帶領一隊單車友挑戰尼泊爾一座雪山,作慈善籌款。

穎德跟他學越野單車,現已可以揸住單車落十幾級樓梯。

一○年,《殭屍》片再度大熱,他跟元華、周秀娜合作演出《殭屍新戰士》。

直升機老豆

「老」來得子特別難!不少男藝人做咗老豆之後,都會作出改變,搵命搏嘅唔好打攪佢,寧願有錢唔賺,日日陪住自己個心肝寶貝,日夜在孩子身邊盤旋,做直升機家長。

劉華

為避免寶貝女劉向蕙( Hanna)成為傳媒目標,劉華耗資二億買入加多利山獨立屋,再花過千萬裝修改建成安全堡壘;而為了有更多時間陪伴女兒成長,劉華唔再做牛華,每年只拍一至兩部戲就收手。今年九月女兒入讀 K1,為讓女兒適應學校生活,原本準備開跨年騷都剎停,將工作盡量安排上半年做完,下半年專心陪 Hanna。

魏駿傑

近年已全面北上搵食,但魏駿傑專攻登台和商演,長劇極其量只願客串幾集。有錢唔賺,全因唔想長時間留守內地,就算老婆是全職主婦,屋企亦有外傭,但湊女返學放學、睇功課一腳踢,不假手於人。

鍾意就快D Share啦!