2015年7月31日 星期五

有型地死去(上) [忽然1周 - 1044] MW,



不經不覺,《忽周》已經邁向 20周年,可惜再沒有機會迎接另一個 20年了。

娛樂講呢啲

有型地死去(上)

君要臣摺臣不得不摺,橫死掂死,不如有型地死。阿 Q都係咁話,人生在世有幾何經歷摺書先?仲要摺全港銷量冠軍嗰本,成件事集荒謬、吊詭、反智於一身,能參與其中實在是難能可貴。在潮流興跳船的世代,能在這艘華麗沉船內玩到最後一刻,然後乘風歸去,仲唔係與有榮焉?我真係覺得堅型。

我在《忽周》前後十四年,由十二蚊兩餸「監躉」飯與三蚊例湯食起,話冇傷感,絕對呃人;但傷春悲秋不是我們的風格,況且大家都知道,《忽周》只係行先一步,咁大把。

這些年有過很多精彩片段,有幸交了不少好友,希望樹敵也不會太多。這專欄承蒙老總及 CEO厚愛,不經不覺也碌了多期,斷估最後兩期寫乜都得,於是我諗,書之將死,後會無期,不如趁機講我一直未講的說話。

林海峰,你是我唯一要 say sorry的人。當年年少氣盛的我不甘被你寸親,把你寫到好衰,此舉其實好低能。你張卡我一直放在記事簿內,甚有辟邪之用。我想講,現在我每天八時出門上班,在別無選擇下局聽你節目……出得嚟行,真係要還。

蔣志光,你說過只要我不做《忽周》就會接受訪問,我真的好感激你這個承諾。只是,現在都不重要了。

張國強,中秋節快樂、冬至快樂、聖誕快樂、新年快樂、恭喜發財、端午節快樂。每年你的短訊總快過我,今次跟你預祝往後一年。

阿 Bob,幾年前嘅專訪都俾你摷番出嚟,證明你好有心裝載,兼好認真地對待一般人眼中認為好唔認真嘅行業。抵你成功嘅!

阿 Bob得知《忽周》將會停刊,立即 post了幾年前他在《忽周》的專訪,並向《忽周》說多謝,十分有情有義。

梁思浩,謝謝你在電台的讚賞,那次的錄音,一直在我電話內。

玲玲師傅,多年來的鮑糕餅糉及貴夾極飽的豪華盛宴實在令我們大飽口福,依家冇咗《忽周》班友,日後可以慳番唔少喇! Anyway, thank you。

江美儀,我好掛住 Teddy,有機會希望可再抱下佢。你講得好啱,髮型真係太重要了。

許志安,原來你係我做得最多嘅專訪人物,我老公知道後鬼咁開心,我問佢點解?佢話因為你係佢嘅終極偶像!

Keyman,因為你我睇多咗韋斯咸,佢降班嗰年我都有唔開心……咗一陣。

修哥,本來跟你約好了在 2022年你 90大壽時再跟你做訪問,現在恐怕有點難度了。但世事無絕對,最緊要保重。

事出突然,一時間只諗到咁多,諗到下期再講。下期臨死前會跟大家分享我多年來聽聽埋埋袋咗落袋嘅大道理與小智慧,呢啲好嘢,梗係要留番摺書先講。

《忽周》專訪中,出得最多的人物是許志安。

當日因為不甘被林海峰「寸親」,把他「寫衰」,到了快將完結的一刻,想向他說聲「 Sorry」。

本來跟胡楓約好在他 90歲生日( 2022年)再做專訪,沒料到《忽周》竟然會先行一步,專訪也應該會告吹。

鍾意就快D Share啦!
Related Posts Plugin for WordPress, Blogger...