掃呢頁CODE去手機

2015年7月23日 星期四

劉小慧點醒 同前夫大和解 黎瑞恩胰臟生腫瘤唔割得 [壹週刊 - 1324] 劉小慧,黎瑞恩,M1,



娛頭

劉小慧點醒 同前夫大和解 黎瑞恩胰臟生腫瘤唔割得

現年四十一歲的黎瑞恩,前年發現丈夫曾智明有內地密友後,決定一刀切,帶着一對仔女離開九龍塘大宅兼離婚,面對婚姻失敗,黎瑞恩一度情緒失控要睇臨床心理,直至年初被老友劉小慧點醒,才發現一味抱怨冇意思,都要自我反省。到今年二月,黎瑞恩主動跟前夫和解,雖然心結解開,卻發現胰臟早已鬱出兩個腫瘤,不能割,冇藥食,黎瑞恩反而好睇得開:「下半場每日要開心!」

失婚日日喊

經歷傷痛再重生,黎瑞恩跟劉小慧和李國祥出錢出力,投資做網上清談節目《講乜靈嘢》,宣揚正面訊息,七月底推出第一集,三人會各自分享如何面對逆境,黎瑞恩更首次公開剖白婚變的心聲。

「以為自己冇事,但一到夜晚就會喊,望住仔女又會喊,最後要睇心理醫生。醫生話有啲抑鬱,建議我食藥,但唔想靠藥物,寧願自己調節。有次我唔開心打俾小慧,平時佢會好撐我,但嗰次佢突然講咗句:『其實你唔好咁爆先』」

老友一句當頭棒喝,黎瑞恩開始反覆思量,縱使被人傷害,也要檢視自己。

「當時成日問點解,我做錯咗啲咩?我有乜唔好?婚姻底線衝破咗當然唔可以再一齊,但十幾年感情唔明點解搞成咁。所以有時諗起會好嬲,但火起完又諗吓,佢(前夫)其實唔係咁差,思想好撕裂。好多謝佢哋(她指一指身旁的劉小慧與李國祥)幫助我,睇番轉頭其實我都有唔啱嘅地方!結婚耐咗,我變咗佢阿媽,乜都查根問底,成日追住問佢整好呢樣嗰樣未。」在旁的劉小慧聽到呢句亦好大反應:「你睇佢而家變咗幾多!我最想聽到佢講呢樣。」

眼見性格火爆的黎瑞恩年來走不出離婚陰霾,劉小慧一直勸化,希望老友識得放下。

黎瑞恩、劉小慧及李國祥齊齊主持網上節目《講乜靈嘢》,分享人生經歷。提到三個的友情,劉小慧更加講到喊。

由寶記三小花到今日各自有家庭,廿幾年友情,一方有難其餘兩個必力撐。前年黎瑞恩開個唱適逢婚變,劉小慧一直陪伴在側安慰。

離婚後帶仔女搬到大埔比華利山居住的黎瑞恩,雖沒把病情告訴子女,但一對寶貝是她的精神支柱。

去年跟金利來集團太子曾智明結束十一年夫妻關係,傷透的黎瑞恩一度要睇臨床心理。

成因不明

根據香港大學醫學院內科部腸胃及肝臟科的袁孟峰副教授表示,胰臟是人體內腸胃的重要器官,胰臟的功能有兩種,一是用來消化食物,另一個是製造胰島素控制血糖,但胰臟腫瘤成因至今依然不明,若不幸患上,需要長期觀察,但如果腫瘤影響到其他器官,就要考慮進行切除手術。

冇藥食靠自己

諗通咗,懂得愛錫自己,黎瑞恩今年五月做她人生第一次 body check。長期情緒受困,不知不覺鬱出病,她說:「有時冇啦啦周身骨痛,個心好抽搐,甚至食嘢好似吞唔落,頂住喺喉嚨。所以解決咗情緒上鬱結就做埋 body check。諗住 check下腸胃,以為生瘜肉。點知乜都冇,反而喺第二個位置(胰臟)出現兩個瘤,良性嘅,但醫生話好難搞,割又唔得,因為黐住晒好多嘢,醫生叫我要開心啲,每三個月 check一次。」

黎瑞恩、劉小慧、李國祥及藍公子四個主持出錢出力開網上節目,其中一集請 Solar做嘉賓。借豪宅場地,一隊 crew都十幾人,好認真。

雖然不再是曾家新抱,但黎瑞恩與老爺曾憲梓一直保持良好關係。

與前妻和解後,曾智明亦一盡父親之責,經常約會仔女,彌補一切。

黎瑞恩同曾智明感情生變時,男方經常留連廣州。年初她到廣州即觸景傷情,如今二人再見亦是朋友。

仇恨到和解

今年五月,曾智明以四千多萬贈送三間大埔獨立屋給黎瑞恩。

今年五月,地產界傳出黎瑞恩擲四千七百萬掃大埔豪宅「天賦海灣」三個單位,事後她承認買入自住。其實三個豪宅是自覺虧欠妻兒的曾智明,送給他們的補償。

嬲別人、傷自己,黎瑞恩做 body check前三個月,主動打給前夫。「離婚初時好仇恨對方,一分手就你死我活,對方講一句都好易刺激我,大家態度變得愈嚟愈差。有次揸車上廣州捧一個朋友場,但去到中途一見廣州兩個字,我就忍唔住係咁喊,結果冇睇騷返香港打俾 Ricky(前夫),同佢講我嘅心情。

「起初佢反應係:『點呀?』佢唔知我想點,可能又怕我打去鬧佢,但我只係講啲感受。原來咁多年,大家中間有好多誤會。(記:有冇互相道歉?)有,我開心晒。」兩人多年的死結,終於因原諒而解開。「雖然事實改變唔到,但點解唔可以做番朋友,話晒呢個人曾經都係我最錫嘅人。」黎瑞恩強忍淚水說。

仔女唔知

兩個胰臟腫瘤均有 1.5cm,得悉後黎瑞恩反應出奇平靜,亦沒有因此擔憂孩子的將來。「我全程冇喊,朋友問我點解?我話因為個天叫我注意身體,我若果有八十歲,依家都行咗一半啦,咁剩番一半我只想每日過得開心。如果係以前,知道自己有病,我會發脾氣,而家諗通咗,心理醫生都唔使再睇。我冇話俾小朋友聽,因為我當係小毛病,或者過一排會冇咗!」

胰臟瘤會否出現病變,主要取決於患者的情緒,身懷計時炸彈,黎瑞恩選擇樂觀面對。「其實呢種瘤好難發現,好多時一發現已經係癌症末期,我慶幸發現得早,醫生話冇藥食,而家會做一啲自然療法,不過最大關鍵都係心情。」

跟蘇志威結婚十八年,劉小慧稱至今每晚仍跟老公傾偈至夜深。育有兩女,家庭美滿,有秘訣。



當上催眠師的李國祥,親自示範如何用意念收腹,教人 keep fit。

近年李國祥做騷之餘,亦擔任唱歌老師。

重情義的黎瑞恩,不時跟昔日寶麗金舊同事飯局一聚。

李國祥做代父

四年前,李國祥不忍只有三歲大的姪仔,不獲離異的父母照顧,作為叔叔的他甘願放棄單身自由,擔起代父責任。「四年幾前,我媽媽因為一個手術遇上併發症死咗,姪仔一向由佢照顧,後來我接手。但因為我啲兄弟姊妹個個都係單親家庭,怕我唔明照顧一個小朋友嘅責任有幾大,所以好反對。後來發覺只要知道自己選擇正確,原來我嘅能力可以係咁大。」

劉小慧:我都有恐懼時

將黎瑞恩點醒的劉小慧,雖是昔日寶記三小花中,活得最風平浪靜的一個,但一樣有煩惱。「一直我對家庭生活都好滿意,但人係貪心,無論幾好,都會諗吓負面嘢。我份人要未雨綢繆,因而令自己跌入一個恐懼陷阱,唔應驚都驚咗先。以前我以為自己唔係怪獸家長,但原來係!要佢哋好多補習,係咪需要到咁?以前成日鞭策我老公做多啲,其實唔應該,我應該要信任佢能力,諗通咗我咪放手,我嘅角色,鼓勵就夠,佢亦自自然然有動力。

「我嘅改變,係因為睇到 KC(李國祥)改變,睇住佢由一個完全冇動力冇自信嘅人,學咗催眠之後唔同晒,佢影響咗我。做呢個節目係想發放正能量俾人,大家用自己嘅經歷鼓勵人。」

鍾意就快D Share啦!