2015年7月23日 星期四

有價有市 星二代暑期筍工 湯鎮業孖仔接騷時薪七萬 [壹週刊 - 1324] 湯鎮業,M1,



探熱針

有價有市 星二代暑期筍工 湯鎮業孖仔接騷時薪七萬

上山詩鈉女兒 Hilary,仲有王敏德二女王麗嘉,有星爸星媽名氣加持,星二代入娛樂圈搵錢話咁易。近日就連湯鎮業的一對孖仔,同樣挾着星二代光環,接到份超筍暑期工,以時薪七萬接拍手錶廣告。

大孖 Bruce(白衫)和細孖 Chris十足餅印,但同樣俊俏,好有條件入行。

林俊賢女兒 Denice

美國讀大學

湯鎮業與第一任妻子姜坤所生,已經二十歲的孖仔湯君慈(大孖 Bruce)及湯君耀(細孖 Chris),長大後擁有父親俊朗外形,上月放暑假從美國返港,兩兄弟原本打算搵暑期工吸收經驗,點知未行動,已經被黃曉明做代言的天梭錶主動敲門,邀拍廣告。

大品牌搵上門,據悉湯鎮業孖仔幕前處男頭炮作,酬勞高見四十多萬,包影相(拍攝時間五小時)及出席活動行騷(約一小時),工作加埋六粒鐘,時薪接近七萬,對於一個普通學生哥,簡直係超筍暑期工。

據悉,過往曾有唱片公司及片商見過湯鎮業的孖仔後,即向他們打主意,卻遭父親以學業為重拒絕。直到近年,眼見大細孖只差兩年便完成社會學研究大學課程,湯鎮業才肯放手,批准兩兄弟拍廣告試水溫。

湯鎮業兩個仔轉眼已二十歲,兩兄弟處男廣告袋四十幾萬,超筍!

兩兄弟小時候是肥仔,胖嘟嘟十分可愛,想不到現在變成型男。

進修讀演藝課程

對於孖仔處男作,可以拍到大品牌廣告,父親湯鎮業好安慰:「對於學生嚟講可以呢個 job佢哋有問我意見,我都想佢哋見識吓。」至於日後會否子承父業殺入娛圈?他說:「等佢哋讀埋兩年大學先算,反正佢哋喺美國荷李活嗰邊,到時可以修讀埋演藝,唔係話想佢哋入呢行,正如今次有人搵佢哋拍廣告,起碼可以學啲基本功,會淡定啲。」

湯鎮業跟第一任妻子姜坤育有兩子一女。

成長期間努力運動,減去肥肉變成美少年。

洗米華 Mandy內訌

至於大細孖處男作夥拍的對手,正是不理父親經濟封鎖、堅持要入行的林俊賢大女 Denice。據悉一心入娛圈發展的 Denice,棄保險工作轉做模特兒,雖不獲父親鋪路支持,但憑老翻梁洛施外貌,加埋對四十三吋長腿,無論是樂基兒效力的 Cal Carries,捧紅 Jessica C的 Model One,幾間大的 model公司都想簽 Denice,甚至有傳洗米華的太陽娛樂,以及 Mandy Lieu做老闆的經理人公司,為了簽 Denice一樣無面俾,搞到要「內訌」搶人。

星二代紛紛入行,但林俊賢不想女兒 Denice做幕前, Denice唯有叫𡃁模表姑姐 Naomi(黑超)幫手搭路。

上山詩鈉女兒 Hillary(右)和翁靜晶女兒劉萬儀都甚受客戶歡迎,不時被邀出席活動。

星二代好價

𡃁模上唔到大場,知名藝人只愛北上掘金,造就星二代成為品牌新寵,就算冇幕前經驗,憑「星二代」三個字已經有一定名氣保證,活動身價仲相當可觀。

鍾意就快D Share啦!
Related Posts Plugin for WordPress, Blogger...