熱爆娛樂: 抽水有發圍　邵仲衡取代謝賢接 50萬廣告 [忽然1周

2015年7月31日星期五

抽水有發圍　邵仲衡取代謝賢接 50萬廣告 [忽然1周 - 1044] 謝賢,邵仲衡,MW,

笑住試衫

上周六（ 25日），王賢誌帶邵仲衡到名店買衫拍廣告。邵仲衡試領帶時好滿意，仲對住王賢誌笑晒口。

娛樂喧

抽水有發圍　邵仲衡取代謝賢接 50萬廣告

邵仲衡憑《大時代》效應，加上出位言論，成功鹹魚翻生，成為廣告商寵兒。繼早前客串電器廣告，近日更以 50萬酬勞，取代謝賢，成為王賢誌旗下男性健康食品的代言人，計計埋埋共有五個廣告在手，豬籠入水。

據知拍攝廣告前，老闆王賢誌更帶埋邵仲衡去連卡佛買衫。上周六（ 25日），兩人在試衫期間，王賢誌更豪氣話：「錢唔係問題，最緊要靚。」老闆咁睇重，邵仲衡好有 face。

其他影片：>>男星愛抽水

邵仲衡早前與麥長青以「孖生兄弟」造型客串電器廣告，搶盡風頭。原來他下個月初將會取代謝賢，以 50萬酬勞出任王賢誌旗下男性健康食品的代言人。

上周六（ 25日），王賢誌（ Vinci）與邵仲衡在尖沙嘴連卡佛揀衫拍廣告，兩人主攻西裝，試了 Armani、 Isaia等多套名牌西裝。邵仲衡對自己的廣告中的造型甚有要求，他說：「想有啲新嘢俾觀眾，襯 sneaker（運動鞋）感覺 young啲。」 Vinci和應：「都好，可以試，錢唔係問題，最緊要靚。」不過試完一輪，兩人都係冇心水，最後去附近餐廳傾廣告細節，一傾就個多小時。

自從踢爆劉青雲追過劉美娟，邵仲衡人氣急升，廣告商更找他（右）同麥長青以「孖仔」造型拍廣告。

王賢誌：四哥太花弗

兩人離開時，接受本刊訪問。 Vinci話：「今日都係研究廣告造型。（邵仲衡取代四哥喎！）其實四哥係早幾年嘅代言人，中間幾年冇咗代言人，依家覺得係時候幫個品牌做宣傳，所以搵佢（邵仲衡）囉！」

對於揀衫無上限，邵仲衡笑笑口話：「我身形大，太便宜嘅衫我着唔到。」 Vinci則說：「想佢（指邵仲衡）廣告形象唔花弗，有另一面。其實四哥都有吸引力，但有好多老婆擔心，老公食咗我嘅產品會變到好似四哥咁花弗，我覺得邵仲衡男女老幼都 buy，所以搵佢。」

做定功課

王賢誌一直都有幫眼揀西裝，不過邵仲衡一早有心水，之前已透過電話 send西裝相俾王賢誌參考。

傾足粒幾鐘

試到攰，王賢誌同邵仲衡去附近餐廳醫肚，兩人繼續傾廣告細節，言談甚歡。

邵仲衡：我幾好生意

近日頻頻見報的邵仲衡，對於被指「抽水」上位，他十分避忌：「唔好咁講，我希望將產品轉去另一形象，想俾觀眾另一種 feel。」問 Vinci是否貪邵仲衡見報率高，他說：「都係個 timing喇，講真，一年前未必搵佢囉！」

邵仲衡承認手上有數個廣告及電影：「我依家都幾好生意，嚟緊我會叫你（觀眾）食乜做乜，會叫你去邊度借錢，又會拍葉念琛嘅電影。」邵仲衡指現在跟私人健身教練操 fit身形，希望以最佳狀態拍廣告。咁識宣傳，彈得起，真是有原因㗎。