掃呢頁CODE去手機

2015年11月5日 星期四

七年唔斷 打得火熱 林子祥清晨閃出女友香閨 [壹週刊 - 1339] 林子祥,M1,



上月中,同 Fiona密會的阿 Lam拉埋負責掩護的車婉婉去灣仔食飯,走時兩個刻意保持距離。

娛頭

七年唔斷 打得火熱 林子祥清晨閃出女友香閨

68歲仍有魄力開個場的林子祥,去年被本刊踢爆與由粉絲變女友的阮麗嘉( Fiona)暗撻六年後,見光關係至今仍未斷纜。但為免觸動雙方的「另一半」,近七張的阿 Lam步步為營,在女友石澳香閨密會後,會選擇大部分人未醒的清晨時間閃走,拍拖偷偷摸摸,愈難愈愛。

女友負責埋單

林子祥跟比自己後生超過廿年,由粉絲榮升波友,再跳級成為背後女人的四十歲富婆 Fiona暗交多年,但礙於未正式跟葉蒨文分開,密友關係,至今封存地下,兩人見面,比前加倍小心。

上月中,阿 Lam與女友 Fiona密會,索性拉埋波友車婉婉做掩護,三人行去灣仔晚飯,一食兩粒鐘。餐飯由富婆 Fiona埋單,阿 Lam就自動自覺俾貼士,好有默契。

之後阿 Lam孖住車婉婉先落樓,落到街兩人邊行邊視察環境,警覺性甚高。未幾, Fiona落樓會合,船頭驚鬼船尾驚賊的阿 Lam,避忌行開,讓車婉婉陪住墮後的女友。

行到停車場入口,任務完成的車婉婉自己走,失去遮擋的 Fiona繼續扮唔識阿 Lam,一支箭行去攞車,搞到六十八歲「林伯」要急步追,上車安全合體。

車廂撫摸  08:00

上週,阿 Lam一清早在女友石澳的獨立屋離開,並揸車載她往中環,途中伸懶腰的 Fiona順勢摸下阿 Lam。

在石澳大宅密會後,阿 Lam車女友去中環交人。鬼祟的 Fiona不在男友鄭維健辦公室的遮打大廈門口落車,寧揀距離大廈五分鐘路程的舊立法會。

去年初, Fiona同樣一清早在阿 Lam跑馬地寓所離開,暗撻七年至今仍出雙入對。

早前阿 Lam在節目《靚聲王》唱到阿婆彈起跳 boxing舞,成為網友熱話。

提早落車行返屋企

Fiona揸車送阿 Lam返跑馬地藍塘道屋企,但阿 Lam竟然提早在藍塘道口落車,寧願花五分鐘撐斜路行返屋企,都唔願喺家門前斷正。

兩人要見又要避,咁辛苦,因為阿 Lam仍是人夫身份, Fiona本身亦有個未甩拖一齊十二年的大靠山、已故船王包玉剛前女婿鄭維健。

「阿 Lam同鄭生係波友, Fiona都係對方介紹俾佢識,當時阿 Lam同莎莉關係唔係好似而家咁,知道 Fiona係老公頭號 fans,仲叫 Fiona幫阿 Lam打理 fan club啲嘢。點知兩個愈行愈埋,上年仲爆埋見光,鄭生點可能會唔介意!所以 Fiona而家同阿 Lam見面,都唔敢太肆無忌憚。」知情者爆。

好樣身材又出眾的 Fiona,七年來周旋於情人與知己之間,仍深得鄭維健重視,本來住渣甸山的她,升呢搬到大浪灣 23號別墅,與名門家族許世勳為鄰,愈住愈豪。

密會完交人

Fiona會合鄭維健後,兩人到停車場取走 golf用品,之後在遮打大廈門口登上中港車牌的七人車。

下午拍莎莉

女友要交人,食自己的阿 Lam中午由司機車去銅鑼灣做嘢,到下午出席活動,他身邊人變番係莎莉。只有工作,才令他們一起。

莎莉揸錢難甩身

雖然阿 Lam與葉蒨文各行各路多年,但有指因女方依然手握財政大權,唔想人又冇錢又冇,阿 Lam唯有凡事顧忌幾分。

「雖然已經分開屋住,但因為仲會以夫妻檔名義去登台,所以就唔離婚,莎莉一直都負責管錢,阿 Lam為咗搵私己錢,有時接 job會叫啲 friend呃莎莉話係義務演出,甚至會扮返內地打 golf,瞞住莎莉唱騷。」阿 Lam身邊人透露。

各自受另一半掣肘,阿 Lam與 Fiona密會,時間安排,亦以神不知鬼不覺為大前提。

上週一(十月二十六日),掛住女友的阿 Lam,晨早八點在對方的石澳香閨離開,做埋司機,揸車送 Fiona去中環。途中見 Fiona伸了個懶腰,又用手輕撫阿 Lam的後尾枕,彼此關係,不言而喻。

為免返家斷正, Fiona車到藍塘道口就放低阿 Lam,要他撐斜路撐足五分鐘返屋企。

上月中他倆拉埋波友車婉婉食飯, Fiona簽咭埋單,阿 Lam負責俾貼士,好有默契。

掩護的車婉婉在停車場入口跟他們道別,怕俾途人發現的 Fiona,一支箭標去攞車,扮唔識阿 Lam。

親送女友去交人

去到中環,目的地是遮打大廈,明明可以在正門落客區停車,但 Fiona卻選擇在立法會附近落車,再自己行返遮打大廈的辦公室會合鄭維健。未幾,又見她與男友拎住球袋,落樓上了架有中港車牌的七人車,返大陸打 golf。

女友要交人,阿 Lam揸車返家小休一會後,由司機送去銅鑼灣做嘢。同一日,上午黐完 Fiona,下午就同葉蒨文合體做番兩公婆,齊齊出席活動。

本週一,葉蒨文又客串做人妻,現身林子祥個唱記者會,擺明交戲,活動未完,已經唔理阿 Lam速撇。與阿 Lam日夜會面的 Fiona相比,葉蒨文只是擺門的工作夥伴。

本週一  2/11

為工作才跟阿 Lam合體的莎莉,本週一現身撐對方個唱記者會,但要傳媒出口叫合照,莎莉才行埋老公身邊。

之後同阿 Lam一家影埋大合照,做完訪問的莎莉唔理阿 Lam就獨自鬆人。

現為環球香港投資主席兼董事總經理的鄭維健,是已故船王包玉剛前女婿,亦曾是董建華競選辦公室主任。 03年他與 Fiona戀情曝光。

多年前已傳出莎莉同阿 Lam各自「搵食」, 05年莎莉跟羽毛球教練楊尚仁過從甚密。

去年阿 Lam生日適逢在澳門開騷,陪伴在側的是 Fiona,而非葉蒨文。

粉絲變老婆

粉絲愛偶像,見得多,有機會拍拖甚至更進一步,變老婆!

羅敏莊 陳國邦

視老公為超級偶像的羅敏莊,二人合作第一部電視劇《雲海玉弓緣》時已經主動出擊,向男方表示要照顧他,拍拖未幾即同居,其後女方再主動求婚, 09年拉埋天窗成為一家人。

范姜 鍾鎮濤

一直是阿 B歌迷的范姜,由阿 B跟前妻章小蕙感情有變開始,之後經歷破產,一直不離不棄,就連對方跟前妻所生的女兒都照顧埋,拍拖多年,先後為阿 B誕下兩女,去年 8月,二人才正式在峇里舉行婚禮。

Wendy 譚詠麟

本是譚詠麟歌迷會會員的 Wendy, 95年跳級成為秘密情人,翌年更為阿倫誕下兒子曉風, 06年,譚父去逝,阿倫公開承認兩母子身份。

撰文、攝影、攝錄:娛樂組

鍾意就快D Share啦!