掃呢頁CODE去手機

2015年11月11日 星期三

真係生嚿叉燒 如果有個女似齊昕點算好? [FACE - 442] 齊昕,梁齊昕,MF,



《蘋果日報》圖片

全知言

真係生嚿叉燒 如果有個女似齊昕點算好?

梁齊昕萬聖節摑母,加埋鬧龍蝦唔係親生老母,劇情峰迴路轉,仲爆過大台師奶劇,做花生友當然覺得好睇,但如果你個女係齊昕,或者好似齊昕咁反叛,又會點呢?

啲阿媽成日話生叉燒好過,呢句有時都真係幾有道理,當你個女當街打你老婆嘅時候,梁特首返去處理家事先係重中之重喎。下屆唔好諗連任喇,搞掂自己屋企先啦。

唔會理佢 袁嘉敏

「如果我個女係齊昕咁嘅性格,唔會再理佢喇,因為大個咗二十幾歲,就算佢去非洲生活,都係佢自己決定,唔會再管佢囉!人係一個獨立個體,真係要俾佢自由先發揮到。」

佢有壓力 王菀之

「我自己都有過反叛期,試過因為保護自己啲公仔,而同媽媽鬧交,自己仲態度好差,不過兩母女都好快冇事。如果我第時有小朋友呢,都唔會用鬧,我會用傾偈的方式,我媽媽都有教我,同小朋友相處,唔好覺得自己高高在上,佢哋會好有壓力。」

點都唔嬲 林雅詩

「如果我個女係齊昕,我會唔嬲囉,始終呢個係我自己嘅小朋友,佢就算點樣對我,唔好話打我啦,打我十巴又好,推我又好,或者殺咗我,我都唔會嬲,因為佢係我自己小朋友。」

溝通重要 周柏豪

「如果我個女係齊昕,我當然會傷心啦,點教呀?希望好似朋友咁,開解到佢啦,好似我以前爹哋媽咪咁樣開解我一樣,好似朋友一樣,有咩都唔怕講,唔會好輕易就責備佢,我覺得都可以打開溝通之門嘅。我就好好彩,我由細到𡃁家都同父母關係好好,我有咩都同佢哋講,拍拖呀,甚至學校犯事都會講,我覺得溝通係最重要。」

辭職教女 黃修平

「如果我個女係齊昕,我會聽佢講多啲,或者好簡單,我會辭職,盡量會花多啲時間喺屋企,家庭好重要啦,尤其中國人嘅思想,修身、齊家,做好先處理出面嘅事業啦,如果係我就咁做,但係佢(梁振英),我就冇謂幫佢答啦。」

80後都唔幫齊昕:激死自己

年青人都係不覊放縱愛自由,但唔少後生仔都話俾齊昕激死,打阿媽呢下,真係爭唔落,希望齊昕可以收下火啦。

《蘋果日報》圖片

《蘋果日報》圖片

《蘋果日報》圖片

Carmen 19歲

「如果係我個女會激死,佢啲行為真係激死自己,如果我係佢阿媽,佢打番我,我唔通當街打番佢咩?但教佢又唔聽,冇嘢可以做到。」

Francis 21歲

「如果佢係我個女,我會覺得俾佢激死,我會覺得我係特首,你仲做啲嘢嚟落我面,太唔安份守己,我會叫佢去外國,唔好再返嚟影響自己形象。」

Fred 27歲

「如果佢係我個女,我會好鍚佢啦,佢做咗啲全香港嘅人都想佢做嘅事,我覺得佢係香港人嘅女兒,雖然佢打阿媽,但治國大過齊家嘛。」

即時報料 facepop

熱線: 9222 0828

電郵:facenews@nextmedia.com

facebook: Face Magazine inbox

line、 we chat id: facemagazine

鍾意就快D Share啦!