真人騷
脫離黎明 JW：瞓得着覺囉！
JW王灝兒回來了，而攞 JW同宇宙 G.E.M.鄧紫棋比較是常識吧。
兩個都係 90後（ JW25歲， G.E.M.24歲），兩個的肺都很巨、都曾經是學界歌唱比賽的中堅份子和長勝將軍，只差一步：一個入咗 A Music跟黎明，一個簽咗蚊型公司跟咗經理人張丹，有誰想到，幾年以後的走向一個已經衝上宇宙，另一個起過、靜完，這才告別黎明又再重新起步？
我很喜歡 JW，因為就算走了寃枉路，就算已經被別人 b離得太遠，她還是總能看到好的一面：
「大家都鍾意唱歌，大家都有熱誠，大家嘅夢想都係世界巡迴演唱會，有啲嘢你未做到，但係你識嘅人做到喎……係真㗎，睇住佢成功，我真係好戥佢開心！」
「當年 Leon簽我時有幾多嘢做到、幾多嘢做唔到……我唔會咁睇嘢，我淨係會諗係佢令我首〈男人信甚麼〉攞咗金曲金獎囉，你諗下，金曲金獎喎！有幾多歌手一世人會有呢個機會攞金曲金獎？」
你信我，甚麼樣的人都見過，甚麼樣的答案都聽過，真心膠同真心感激我仲識分，和那種大台特產、皮笑肉不笑的「我戥佢開心、電視台好似大家庭」不一樣。
整個訪問， JW嘴角一直上揚，那個停不下來的笑容、那一句「有啲嘢你未做到，但係你識嘅人做到喎！」，連我都覺得有點被打動。
當她說到曾經懷疑過自己、閉上眼會問自己一百個問題，直到簽了新公司、推出新歌〈矛盾一生〉，總算能安安穩穩的睡一覺時，連我都覺得舒了口氣，這麼一個不比任何人差的女孩子，總算讓她等到了。
而我不知道 A Music focus咗去邊？
七月簽新唱片公司，咁幾多月同 A Music完約？
仲有幾年……其實我做呢個決定好緊張，嗰度係我第一份工、簽嘅第一個歌手約，好多嘢唔捨得，但我想要個 change，所以自己搵咗陳善之出嚟傾，一路傾一路已經喊咗出嚟……係佢同我講唔使驚、知我想講乜嘢，佢話我做任何決定佢都會支持，因為我哋係一家人……
唔使賠錢？
乜都唔使……佢哋好好㗎，我都估唔到呢間公司咁好。未做歌手時都聽過好多傳言，又話過冷河、又要嗌交、又要賠錢……
點解會覺得 A Music唔好？同你想做嘅嘢有咩唔同？
唔係唔好，頭幾年其實成績好好，之後嗰幾年佢哋 focus嘅嘢唔同咗……
Focus咗去邊？
我都唔知，可能喺電影，我知佢哋好多嘢搞緊，但呢個係一個磨擦嘅過程，未必覺得好啱。
佢哋 focus咗去第二度，你會唔會好得閒？有幾得閒？
我可以去做 gym啦，定時定候成日有得做，去做 facial去扮靚……係少咗曝光，咁又冇幾個月，一兩個星期冇嘢做。呢啲嘢好多歌手都遇過，我覺得呢啲時候最緊要諗嘢 positive啲，如果連自己都放棄，咁就真係冇㗎喇……
當年你簽 A Music時，係唔係黎明自己見你？
我第一次上去公司，同陳善之傾傾下， Leon就推開 office門入咗嚟喇……
四大天王，你最鍾意邊個？
梗係 Leon……哈哈，其實四個都鍾意嘅……
當年佢承諾你嘅嘢，有幾多做到、幾多做唔到？
唔係咁計嘅……我唔會咁睇嘢，我淨係會諗係佢令我首〈男人信甚麼〉攞咗金曲金獎囉，你諗下，金曲金獎喎！有幾多歌手一世人會有呢個機會攞金曲金獎？
G.E.M.最爆嘅時候 我最得閒。
呢一行你同邊個最 friend？
我有好多係未入呢行已經識，許廷鏗、 G.E.M.、糖妹都係以前歌唱比賽已經識。
佢哋三個都好忙，你眼見人哋咁忙，有冇壓力？
梗係有！成日問自己點算好！好彩屋企人冇俾壓力我，好彩我有一班好朋友成日同我講我得㗎，只係時機未到……要佢哋不斷同我講，我先有個動力。
有冇一啲時候，時機等極都未到，連自己都懷疑自己？
成日有，成日問自己好多問題，成日都瞓唔到覺，一合埋眼有一百條問題問緊自己：究竟我唱歌好唔好聽？究竟我𠵱家做緊啲乜嘢？究竟啲人話我似呢個似嗰個……我好開心簽咗新公司，因為我簽咗之後，瞓得着覺囉……因為我知道佢哋真係為我好，有呢一種信任同安全感真係好重要。
當年歌唱比賽已經識 G.E.M，會唔會喺佢唱緊《我是歌手》爆紅時，就係你最冇嘢做嘅時候？
個人一定要保持感恩，因為我真係識咗 G.E.M.好多年，係真㗎，睇住佢成功，我真係好戥佢開心……因為有啲嘢你自己未做到，但你識嘅人做到喎！大家都鍾意唱歌，大家都有熱誠，佢仲細我一年添，𠵱家已經世界巡迴緊喎！呢啲係大家嘅夢想喎！你就可以更加話俾自己聽，自己都做得到！
但你知唔知，呢一行，好多時唔係堅持就做得到？唔係鬥長命，就一定輪到你？
我知道㗎，一個人喺間房諗埋一邊，一定會向呢個方向諗……但有啲嘢一定係有心無力，尤其係呢一行，真係唔係你想就得到。除咗 G.E.M.，我身邊仲有好多唱得嘅朋友，仲有好多人冇呢個運，只可以做好自己，呢個係 only way。
但去到嗰個位，承受嘅嘢又唔同，佢俾人叫緊宇宙 G.E.M.喎？
美國有個 rapper講，要成功就要預咗俾人講。我諗， you have to be bigger than the gossip。我都覺得佢好多壓力，佢之前都同我講唔知着咗邊件衫出嚟，全中國都話佢隻腳粗……我唔知邊張相，但係我話你已經好瘦好細粒喇喎！已經戒呢樣戒嗰樣乜都唔食得喇喎！我出新歌第一日都有見佢，我好驚，係佢 calm me down，同我講第一日已經有十萬，真係好好！
新歌推出，好評多，負評都會有，你又點睇？
其實一直都有負評，之前唱快歌，香港好多人唔太鍾意，有啲話我扮衞蘭，有啲人話我漂咗頭髮扮韓星……首先我要澄清，我唔係扮韓星囉，美國好多 artists都有漂頭，我從來都唔覺得自己聲音似衞蘭囉！我𠵱家唔會理呢啲評論，好多時啲人係得閒冇嘢做至會留呢啲 hate嘅 comments，佢冇嘢㗎喎……所以我都要冇嘢至啱。
之前工作量唔多，但係錢夠唔夠使？唱歌以外嘅時間，你做啲乜？
ok㗎都，我唔係嗰啲坐喺度等到冇晒錢嘅人，所以之前已經同朋友一齊做啲 marketing嘅小生意。其他時間，我鍾意做 gym，鍾意打 tennis。尤其係 tennis，佢唔只係運動，對我嚟講更似一個家庭活動，因為細細個就係爹哋教識我打 tennis。
一早就知努力未必有回報。
爸爸媽媽做啲乜嘢？屋企有幾多個兄弟姊妹？
爸爸做生意㗎，已經退咗休喇，媽媽就係全職主婦……我仲有個大我五年嘅家姐，瘦過我又黑過我。其實家姐比我早唱歌，比我參加更多歌唱比賽，我比賽都係跟住家姐，佢做乜我做乜咋嘛……
點解家姐冇唱落去？
我諗爸爸係擔心，覺得做歌手唔穩定，好多憂慮，佢唔俾。始終家姐係大女，佢會嚴啲，而家姐又係嗰啲好聽話嘅女，所以爸爸唔俾，佢就乖乖咁唔再比賽，去咗讀 law。
所以你當初一路讀大學一路做歌星，都係爸爸要求？
反而唔係喎，完成 degree係我自己心願，又係我覺得一世人只會讀一次大學，一定要經歷一次。
唔辛苦咩？兩邊走？
唔係喎，成件事我自己覺得好正，又係一個大學生，又有公司買機票俾我成日返下香港、儲下里數。
結果成績讀成點？
ok㗎，我係嗰啲一定唔會俾自己 fail嘅人，幾忙都好，我一定會做好佢。
讀書就話可以努力，可以一定唔俾自己 fail，你幾時發現，呢一行原來努力咗未必有回報，好多嘢唔係有 plan就可以依計劃行事？
我諗入行第一年我已經知……有一樣嘢我從來冇話過俾人知，第一年第一次錄音唱〈男人算甚麼〉，我一路以為首歌係我一個獨唱……雖然錄嘅時候有高音有低音，都覺得怪怪哋……直到首歌出街，我先至知係同衞蘭合唱。我諗公司唔係呃我，係想俾個驚喜我都唔定……嗰陣時我已經知，原來有啲嘢人哋可以唔俾你知，有啲嘢唔到自己控制， promote一首歌一個人，一間公司自己有佢嘅途徑。我唔係嬲，我好多謝衞蘭，最後咁好成績，我都好開心公司有呢個決定。
呢行仲有好多政治因素呢， A Music同商台唔 friend，所以你同你啲歌都入唔到商台？
我諗唔只娛樂圈，其他行業都好多呢啲嘢，聽家姐講都唔少，有啲人為咗上位，就咁踩住你上……但係我咁多年又冇見過呢啲嘢，我諗係 A Music好保護我，從來都只俾好嗰面我睇，咁多年我都係一個受保護動物……
所以 25歲你都未見過壞人壞事？
thank god……又冇喎，冇一個人「叮」一聲好憎佢喎……可能我嘅人又係好 forgiving呢，就算有嘢唔開心，講講講……講完舒服晒！可能佢又會得到佢嘅教訓呢？
拍拖呢？有冇遇過壞人？
都冇……我發現真係要搵個大多幾年，成熟啲嘅男朋友，之前嗰個大我三年，佢唔係唔好，係未大、未定。每段 relationship都一樣，有好甜蜜嘅時候，我試過同佢喺聖誕節截唔到的士，佢包咗成架小巴嚟坐返屋企……我覺得好浪漫但又會有啲我覺得信唔過佢嘅時候，好似我首歌一樣，咪就係〈矛盾一生〉囉。
矛盾一生
沒有的時候會希望得到，得到了，然後呢？
我覺得最難唔係失去，而是像 G.E.M.一樣，支持和反對的聲音同樣鋪天蓋地。
我問 JW，覺得自己頂唔頂得順先？她說：「我覺得我 ok，我同佢一樣份人好固執，如果我覺得啱，就唔會理人點講，就一定會堅持落去。」
其實有班人，唔唱得又話人唔唱得，唱得又話人 X叫，話完唔好睇仲要睇完再起勢咁啋，又何嘗唔係矛盾一生？
撰文：朱小博
攝影：葉曉明
髮型： Harry@il colpo
|
鍾意就快D Share啦！
|
|
|
