帶住成抽粉紅氣球去戥胡杏兒開心，久違嘅廖碧兒一見記者同鏡頭似足素人一樣周身唔自在。
真面目
大師妹 臨老先入門 36歲廖碧兒做 Baby師妹
好閃吖，好曬吖！嗰頭大事慶祝開生日 P，呢頭就宣布求婚成功再發埋婚紗照，上個星期專心放閃嘅杏兒日日上頭版，其他姐仔搶鏡無望可以點？咪就係惟有專心戥人幸福囉！
上週五（ 6日）帶埋未婚夫 Philip包場慶生，半個大台花旦贈慶，有現役有過氣，仲有好耐冇見嘅廖碧兒！離開大台四年，事業感情一概冇作為，原來唔聲唔聲簽咗 Baby經理人 Kim。 36歲先嚟做小師妹，年紀比大師姐大十年，事業何只爭十條街，難怪一切從簡，都係低調啲好。
人離巢佢離巢，杏兒一離巢嫁得出仲要做埋 3D數碼一姐，當年一樣係大台花旦嘅廖碧兒就爭好遠，離巢四年繼續 dry繼續霉，難得蒲頭賀杏兒，見到本地傳媒又極生疏，唔通唔想搶主人家鏡定冇乜近況要 update？又唔係喎！原來去年尾 Bernice靜靜雞轉經理人公司，微博聯絡工作方式又轉埋，不過從來冇公開宣布、冇乜幾何同經理人 Kim互動，連上月大師姐 Baby風光大嫁都唔見去飲，咁到底轉公司為乜？
拍西片接美劇喎
四年來演藝作品買少見少，除咗行山飲食同北上剪彩賺騷錢，廖碧兒大部份時間攞嚟專心做品酒師同釀自家紅酒。不過被問到有冇興趣買酒莊，佢反而話未係時候：「買酒莊係我夢想，不過𠵱家都係專心演藝事業先！」
說好的演藝事業在哪裡，週一《 FACE》致電新經理人公司助手高小姐，得到嘅答覆原來係衝出香港喎：「 Bernice揀咗 Kim間公司，都係因為呢度多啲 fashion嘢同埋外國化啲！ Bernice啱啱拍完套西片又主演完套新加坡電視劇，嚟緊我哋都 hold咗期，出年三月會去拍美劇……不過戲份同內容就未可以公佈住，其實佢好忙，不過喺香港少曝光啫！」所謂西片，其實就係由張雨綺主演，海報中十個有九個係普通話拼音嘅《蒸發太平洋》，咦……聞落有浸膠味嘅！
馬賽正式拜拜大台
又係戥人開心中堅份子，又係同人唔同命另一代表，有份賀杏兒嘅另一份久違面孔係馬賽（現改名司馬賽兒），又會咁啱又係快將離巢。據悉下月約滿大台，馬賽周圍放聲氣決定不續約，去邊？未有着落噃！
採訪、撰文：娛樂組
攝影：娛樂突發組
|
鍾意就快D Share啦！
|
|
|
