封面
4年關係 新聞部皆知 已婚吳璟儁鬼祟夜會索主播藍可盈
大台新聞部又有已婚主播疑似搭上新聞小花，之前有許方輝同周嘉儀傳出緋聞，搞到男方幾乎同老婆離婚，周嘉儀被雪藏一排𠵱家仲走埋添！
今次輪到做《講清講楚》得寵主播吳璟儁，雖然同大台新聞部前編輯鄭悅朗結咗婚 3年，但據知他 4年前，已把靚女小花藍可盈當紅顏知己；另一方面新聞部盛傳吳跟老婆婚姻亮紅燈，上週六（ 7日）凌晨吳璟儁更漏夜走到天水圍密會藍可盈，大台新聞部真係好亂呀！
入咗大台 9年， 31歲吳璟儁外貌比年齡成熟， 12年 12月 30日迎娶已離職嘅外電組編輯鄭悅朗，喺中環延開 50席，當日藍可盈都有出席，估唔到另有內情。原來吳璟儁早於結婚前，因同事之利先後親近藍可盈同鄭悅朗，鄭悅朗亦一早知道吳藍的「友誼」，吳璟儁最終亦揀咗同鄭悅朗拉埋天窗，但仍 keep住藍可盈這個紅顏知己。
藍可盈再辭職
據大台新聞部同事爆料指：「鄭悅朗明知都堅持要嫁，成個新聞部都知。有人結婚前一晚仍然同女方講：『你要等我，呢個婚我一定要結。』之後女方同啲好姊妹講番，呢單嘢先揚出嚟！」
上年 8月吳同藍嘅關係喺新聞部通晒天，傳到阿花袁志偉耳邊，向兩人照肺，畀兩條路吳璟儁揀，一係吳走一係藍走，而藍可盈上年突然辭職。今年藍可盈重返新聞部，袁志偉則精心安排，要兩人返唔同更。
近日新聞部同事亦頻頻咬耳仔，見有女主播最近體態豐盈，大家竊竊私語；而且藍可盈最近再次遞信，下月將轉到于品海旗下新媒體香港 01返工；亦傳出吳璟儁同老婆鄭悅朗嘅婚姻亮起紅燈。
公園兜圈
上週五（ 6日）本刊目擊，吳璟儁夜晚收工後駕車載利君雅同另一女同事離開公司，先去到將軍澳港鐵站外送女同事落車，再送利君雅到屯門洪水橋附近，然後獨自駛往天水圍天耀邨，亦即係藍可盈屋企附近。
吳璟儁停低架車行入便利店買水，然後步行到天耀邨公園，差不多同一時間藍可盈出現喺公園另一邊，手拿麥當勞紙袋同銀包，着住鬆身白色衫腰肢粗，喺公園行嚟行去又不停講電話，但未見兩人碰面，其後吳璟儁駕車駛入附近後巷，未幾絕塵而去。
藍可盈：唔想講呢啲嘢！
至週日（ 8日）吳璟儁放工後先返咗元朗朗晴居住所，後再駕車到元朗西鐵站，原來係同老婆鄭悅朗交人， 2人泊車後喺商場行咗陣，期間冇拖手又少話題； 2人喺茶餐廳食晚飯，鄭悅朗神情嚴肅，吳則不時托住個頭一副苦惱樣。
食完飯兩公婆不是一齊返住所，反而是吳璟儁載老婆返回元朗西鐵站，然後獨自返屋企。凌晨 12點半又再出動，他警覺性奇高，由元朗駕車去到美孚再截返元朗再入天水圍，喺藍可盈住所附近兜嚟兜去，最終二人並冇見面，但有新聞部員工透露，當晚吳和在公司的藍可盈講了成晚電話，氣氛並不愉快。吳璟儁老婆鄭悅朗離開大台新聞部後，做咗立法會秘書處公共資訊主任，週一（ 9日）本刊致電問疑似分居嘅佢，婚姻是否觸礁，鄭悅朗即好有戒心咁答：「吓？點解會咁樣講？唔好意思，我諗我唔會同你做一個咁樣嘅訪問。」隨即 cut線。
而吳璟儁則着住紅色波衫加短褲落街買生果同麵包，記者上前問到佢同藍可盈嘅關係，吳即黑面講咗句：「黐線！」即粒聲唔出返回住所。
本刊再致電藍可盈，她一聽到係記者來電即語氣變得不友善，問佢係咪同吳璟儁有親密關係，藍可盈答：「唔係，冇啲咁嘅事。（係咪一齊幾年？）唔講喇，唔想講呢啲嘢！」便收線唔再接電話。
受重用旺桃花
吳璟儁入新聞部以嚟一直得到總監袁志偉重用，重頭節目《講清講楚》吳璟儁屬主要主持，訪問梁特首都交畀吳璟儁，可見地位超然！做嘢叻，原來吳女性緣非常之強，同事間有傳幾位女記者都同佢關係好好。
周嘉儀戀許方輝
許方輝前年被爆同周嘉儀搞婚外情，被偷影到喺車廂內行為親䁥，人夫許方輝赴女方香閏等，許方輝幾乎離婚； 2人事後被停職，休息幾個星期後復工，但許方輝至今仍然唔出得鏡，周嘉儀則已在今年 3月最後主持《香港早晨》後離職，轉投興業證券市場拓展部做 CEO，間中出席下活動。
林燕玲 酒店爆房
有小飛俠之稱嘅林燕玲，曾經由大台轉到 now新聞台任高級主播，再升為首席主播；但 09年被爆同已婚會計師龔耀輝到酒店爆房，林燕玲即被公司停職、燉冬菇兼降職減薪；停工 3個星期後復工，林燕玲誓神劈願表示會同龔耀輝斬纜，但不久又被發現 2人喺中環相聚。
其後林燕玲轉職渣打銀行股票衍生及中介銷售部窩輪銷售副董事，但今年 10月被裁走。
陳嘉欣傳姐弟戀
傳出姐弟戀 31歲小花陳嘉欣與細佢 2年記者劉晉安傳出姐弟戀，今年 7月去咗英國升學嘅劉晉安難得返香港，約埋成班舊同事去鄭萃雯屋企打邊爐，當大家飲飽食醉，嘉欣 BB主動入廚房洗碗，劉晉安幫手抹乾碗碟，鄭萃雯影咗相兼 po文留言：「默默洗碗的小情侶。」唔覺意公開咗 2人情侶關係。
採訪、撰文：娛樂組
攝影：娛樂突發組
|
鍾意就快D Share啦！
|
|
|
