掃呢頁CODE去手機

2016年3月24日 星期四

《寒流黑金》李秉憲 斷手翻身 [壹週刊 - 1359] __,李秉憲,寒流,M1,

李秉憲喺新戲《寒流黑金》入面飾演政治流氓,深藏不露嘅演技大獲好評。電影精《寒流黑金》李秉憲 斷手翻身有行內前輩講過:「喺演藝圈千祈唔好行差踏錯,做錯一件事可以將之前做嘅十件好事完全抵銷。」韓國型男李秉憲實力毋庸置疑,可惜2014年捲入桃色醜聞,令佢形象插水。避走荷李活拍《未來戰士:創世智能》之後,回歸韓國影壇,第一炮演出極具爭議嘅《寒流黑金》。正所謂有危就有機,李秉憲成功靠呢套戲翻身,仲摘下亞洲影 ...


李秉憲喺新戲《寒流黑金》入面飾演政治流氓,深藏不露嘅演技大獲好評。

電影精

《寒流黑金》李秉憲 斷手翻身

有行內前輩講過:「喺演藝圈千祈唔好行差踏錯,做錯一件事可以將之前做嘅十件好事完全抵銷。」

韓國型男李秉憲實力毋庸置疑,可惜 2014年捲入桃色醜聞,令佢形象插水。避走荷李活拍《未來戰士:創世智能》之後,回歸韓國影壇,第一炮演出極具爭議嘅《寒流黑金》。正所謂有危就有機,李秉憲成功靠呢套戲翻身,仲摘下亞洲影帝,為洗底踏出重要一步!

改編漫畫 揭露貪腐

唔知係咪社會風氣每況愈下,韓國近年特別多政治黑金及貪腐嘅作品。《寒流黑金》改編自尹太浩嘅網上漫畫《內部者們》,呢位漫畫家之前嘅作品《苔蘚》及《未生》等都被拍成電影及電視劇,擅長反映社會不公平現象。《寒流黑金》故事以李秉憲飾演嘅政治流氓為中心,專門幫政界人士做唔見得光嘅交易,不過貪心食兩家茶禮,結果被斬手變成廢人。無晒利用價值嘅佢為咗報復,決定同檢察官以及政治評論員聯手,將貪腐官員逐個曝光。

電影將政治社會中嘅黑暗面及不公平,加上劇中有大量血腥打鬥以及色情場面,喺韓國上映時列為限制級(即係香港嘅三級片),不過都無礙觀眾入場,成為三星期票房冠軍,而且打破限制級嘅票房紀錄,入場人次超過六百萬,成為韓國史上賣座嘅三級片。李秉憲更加憑呢套戲,喺第十屆亞洲電影大獎奪得最佳男演員,成為亞洲影帝,洗底成功!

戲中另外一位男角曹承佑飾演檢察官,同李秉憲有好多對手戲,互相猜疑嘅角力戰甚有張力,非常緊張。

戲中被斬去右手,劇情需要更加不時拆出嚟,像真度好高,第一眼睇真係嚇親。

斬右手 挑戰打戲

李秉憲出席亞洲電影大獎之餘,仲順便出席電影喺香港嘅首映禮。今次喺戲中有好大挑戰,電影初段佢已經被人斬去右手,之後嘅戲份都係戴住一隻假手去演。由於只係可以用左手,李秉憲接受訪問時表示,喺演出時有一定難度:「未演之前我以為沒有太大問題,後來發現只是用一隻手很不方便,尤其是進食及打鬥場面,最難是食麵。本來我也想過要事前訓練好才拍攝,但後來又想因為主角是被人斬手,反而不用訓練得太完美,有些瑕疵才夠真實和合理。」喺戲中假手就好似佢嘅第二生命,應該已經建立咗深厚感情,梗係要拎返屋企作為留念啦。「哈哈,我又無咁諗過,不過而家你講完,我真係應該拎返屋企留念喇。」

戲中嘅角色同原著有好多出入,更加強悍更加似流氓,同時亦加入幽默感,李秉憲都話覺得個角色傻更更。

李秉憲奪得亞洲影帝,佢更加喺台上多謝太太李敏貞及囝囝,重塑好男人形象。

李秉憲到訪香港出席首映,被問到成為首位擔任奧斯卡頒獎嘉賓嘅韓國演員,佢話非常光榮,好似發夢一樣。

撰文:關錦雯

攝影:葉志明


鍾意就快D Share啦!