度完蜜月返港，杏兒笑晒口， Philip就黑晒面，問乜都唔應。
娛樂偵訊
74日密密做冇着落 杏兒失望：未咁快！
去年尾拉埋天窗後，胡杏兒同老公 Philip Lee隨即啟動馬拉松蜜月之旅，遊勻十三個國家，穿越歐亞美三大洲歎世界。
為期 74日造人之旅，話咁快就完！
上週五（ 18/3）早上八點，杏兒同老公盡興返港。出閘時李太笑晒口，李生就面燶燶。被問到已否造人成功，杏兒耍手擰頭話：「未咁快！」
十問九唔應
晨光早返到香港，二人各自推住兩喼行李出閘，戴帽加黑超的杏兒行先， Philip隨後。見到記者，錯愕的杏兒好快便露出四萬笑容，相反 Philip就黑晒面，十問九唔應。
兩公婆摩打腳行去上車，沿途一直保持距離。心知老公見到記者唔多高興，杏兒亦不時刻意停步回頭望。
「（玩得開唔開心？）開心呀！（有好消息（造人）未？）未咁快！返嚟有好多嘢做呀！（ Bosco有新戀情喎！）呢啲唔使講啦，佢開心就得！」
行到停車場，杏兒將行李交俾老公搞掂，自己先坐上車， Philip同司機夾手夾腳放好行李後，便速閃上車。
十個生日願望
七十四日環球造人旅程，杏兒幾乎日日在 ig放閃，呢頭在北海道滑雪，轉頭已身處新西蘭釣魚。其中一站英國，二人世界變六人行，男女雙方家長會合一齊玩。
蜜月之旅最後一站，杏兒同 Philip馬爾代夫二人世界，陽光海灘， hea足兩個星期。狀態大勇的杏兒，晒 bikini相身材 fit到漏，在當地為老公慶祝婚後第一個生日，李太上載一張兩公婆攬住情深對望相留言：「李生，生日快樂！李太上。」甜到漏！
壽星 Philip亦許下十個生日願望，要做「好老公」、「好女婿」之餘，仲要「 be a good dad!」恨 B恨到出口！
努力咗兩個半月，杏兒的肚皮暫時尚未有聲氣；要兌現對住夫家鄉親父老開下三年抱兩的期票，生！快啲生！生完再生！事在必行。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
