娛樂偵訊
被乾腌一年 許廷鏗擦鞋求和
27歲巨聲幫出身的許廷鏗，入行至今已出過六張唱片又開過個人音樂會，前途原本一片光明，但因曾有離心而激嬲老闆何哲圖，將公司資源轉移到同門的鄭俊弘及胡鴻鈞身上。
以卵擊石冇好結果，許廷鏗只好屈服，擦住老細鞋搏解凍！
走漏風聲
被指貌似吳尊的許廷鏗，○九年參加《超級巨聲》後被無綫力捧，風頭一時無兩。
一一年，簽約星煥國際，許廷鏗離巨聲幫作獨立發展，不足幾個月，已成功吸納大量 fans，推出兩張唱片均達到金唱片銷量，同年橫掃樂壇四大頒獎禮的他，行內睇好，可以接棒上位做一線歌手。
大把人吼！有意招攬的包括 Paco黃柏高，一四年滿約星煥的許廷鏗，一度考慮合約期滿後轉會到太陽娛樂，點知跳槽風聲走漏，激嬲老細 Herman何哲圖，就算最終他決定留低，一樣無補於事，照雪！
「當時 Alfred（許廷鏗）聲勢本來好好，好多公司都想挖佢走，但弊在佢太高調，大家以為佢一定會去太陽娛樂；佢的確係諗過去跟 Paco，但知道許志安同劉浩龍都會離開東亞唱片過太陽娛樂， Alfred又覺得內部競爭好大，所以最後選擇續約星煥。但 Herman一早收到風 Alfred想走，認為佢養唔熟，所以照放佢入雪櫃，但唔係一般雪法，照同佢出唱片，但唔會谷宣傳，又唔安排搵錢 job俾佢，聽落其實有啲笨，損人不利己，但老細話事，大家冇 say！」知情者說。
判若兩人
何哲圖腌乾許廷鏗，並將公司資源轉投鄭俊弘及胡鴻鈞身上。
「舊年 Alfred真係冇乜嘢做，好似冇咗目標咁！反正得閒，所以佢同屋企人飛咗幾個星期，去睇北極光，散心兼重新整理吓自己。」
幾經考慮，歐遊回來的許廷鏗決定求和。
「去到歐洲， Alfred見到間鋪頭叫 Herman竟然影相 po上網，之後返到香港見到老闆好似變咗另一個人咁，仲一個禮拜內兩次請老闆食飯。不過咁做都啱嘅，起碼俾老闆感覺到佢知錯，先有機會解凍。」知情者說。
撰文、攝影、攝錄：娛樂組
|
鍾意就快D Share啦！
|
|
|
