掃呢頁CODE去手機

2016年3月24日 星期四

年初分手 上月復合 林子善落訂結婚 [壹週刊 - 1359] __,林子善,M1,

上月子善與女友復合後,二人合照比以前更sweet。娛樂偵訊年初分手 上月復合 林子善落訂結婚由電影中閒角開始,到今日是四間茶餐廳的藝人老闆,34歲的林子善最近定下婚期,準備做老襯。拍拖五年決定「找數」,只因為今年初分過手。幸得唐詩詠點醒,幾乎走寶的林子善上月搏老命箍煲;失而復得,即向女友「落大訂」定婚期,箍實未婚妻。收工再開工林子善最近在ig露口風,在與女友及家人的溫馨合照上留言:「我好幸運有個幸 ...


上月子善與女友復合後,二人合照比以前更 sweet。

娛樂偵訊

年初分手 上月復合 林子善落訂結婚

由電影中閒角開始,到今日是四間茶餐廳的藝人老闆, 34歲的林子善最近定下婚期,準備做老襯。

拍拖五年決定「找數」,只因為今年初分過手。幸得唐詩詠點醒,幾乎走寶的林子善上月搏老命箍煲;失而復得,即向女友「落大訂」定婚期,箍實未婚妻。

收工再開工

林子善最近在 ig露口風,在與女友及家人的溫馨合照上留言:「我好幸運有個幸福家庭,未來仲會有個好嘅老婆。」暗示將與女友拉埋天窗。據悉,上月向拍拖五年的女友 Kary「落訂」定婚期的林子善,已着手物色酒店訂酒席。

早年爛玩愛蒲的林子善,同「味之天使」的陳蕊蕊拍拖兩星期就散,直至跟現職 I.T售貨員的 Kary拍拖,蒲精終被辣妹收服。自此,他搏命工作賺錢,由演員仔變成老細,有車有樓。

本週一(三月二十一日)下午,林子善揸住架 Benz離開將軍澳電視城後,直踩過海,返回大坑的「龍鳳冰室」睇檔,收工再開工的他,埋水吧將飲品送到客人面前,冇停過手。

記者恭喜林子善結婚,開心到爆的他連環講多謝。唔講唔知,原來年初這段五年情曾經散過,分手後,林子善才發覺對方的重要,於是發狂箍煲,上月成功氹番女友,為免節外生枝,他立即開出結婚「期票」,心甘命抵做老襯。

本月中,子善在社交網露結婚口風,話自己將會有個好老婆,言語間流露成家立室的決心。

多得老友唐詩詠當頭棒喝,才令子善的起心肝努力箍煲娶老婆。

感情失而復得,他有份演出的《末代御醫》亦死而復生,月尾出街。

愛的宣言

提起未婚妻,林子善公開發表愛的宣言。

「唔經歷一啲嘢,唔知對方咁重要!兩個月前我哋試過分手,我冇做對佢唔住嘅嘢,大家關係都好好,只係近年雙方親人成日會問我哋幾時結婚,有種無形壓力,我喺啲樽頸位諗唔通,大家分開冷靜吓。但分開後我好辛苦,原來真係好需要佢。

「之前覺得自己未養到老婆,成日俾壓力自己;分開後再諗吓,佢係我咁鍾意嘅女人,不如就當係一個動力,去搵多啲錢養好個老婆,所以下定決心箍煲,仲要結婚。我哋上個月復合,大家都好珍惜,定咗一八年結婚,依家開始努力搵贊助。」林子善說。

辛苦掹番段感情,為何還要對方多等兩年!

「我哋問過蓮花宮一個師傅,佢幫我哋擇日嘅。結婚都要儲多啲錢,俾禮金、擺酒好多錢要用,預鬆啲比較好。其實我未正式求婚,但會俾個 surprise佢,所以唔可以講太多,不過結婚一定喺香港擺酒。」

子善識咗 Kary後修心養性,搞生意努力賺錢。 12年創業,女友梗係要出現打氣。

與子善拍拖多年, Kary早已融入男友朋友圈子,與唐詩詠及馬國明非常老友。

12年,他倆被發現甜蜜買大床,沒料四年後,今年初情海翻波一度分手。

子善父母早視 Kary為新抱,故阿仔同女友復合,最開心相信係兩老。

唐詩詠點醒

箍煲成功,林子善說全靠「細妹」唐詩詠點醒。

「分開嗰段時間嘉穎、馬明同阿妹(唐詩詠)都有開解我,起初我仲諗住等對方喺外面見多啲,或者佢會遇到個更好呢!點知阿妹話梗係唔好咁樣放開佢,女人覺得你唔緊張,佢唔會俾你返轉頭。

「阿妹咁講,我當堂醒晒,第二日就去求佢返嚟我身邊,過程做咗好多 sweet嘅嘢,我未送過花俾人,佢係第一個;我仲花咗八粒鐘畫咗幅畫,係我哋五年來嘅點滴,佢收到,感動到喊!」失而復得,林子善開心過做老細。

本週一( 21/3),子善喺大台開完工,揸住代步的平治趕返大坑睇鋪。行到去門口不忘先招呼客人,遞上遮袋。

子善因拍《鐵馬尋橋》及《怒火街頭》,與男主角鄭嘉穎成為死黨,佢話結婚戥穿石,嘉穎一定走唔甩。

電視劇一部接一部外,子善亦深得王晶疼錫,電影《鴨王 2》亦預佢一角。

一聽到記者恭喜佢,原本唔多願接訪問的子善即刻笑晒。

抖都唔抖,一返鋪就落手打點招呼,老細果然最落力。

完美結局

感情兜兜轉轉,發覺新不如舊,翻撻前度火速拉埋的圈中例子有不少,大團圓結局,過程不論甜苦,都咁精彩。

鄭秀文 許志安

91年撻着,其間多次傳出分訊, 02年二人正式分手;直至 11年被發現在太平館撐枱腳翻撻斷正, 13年於峇里秘婚,去年 Sammi終認許太身份。

周慧敏 倪震

08年尾,倪震被揭背住周慧敏,與城大女生張茆在中環夜場脷疊脷啜到反白眼,數日後,他發聲明引咎分手,但一週後又戲劇性地宣布婚訊。二人 09年 1月在跑馬地寓所低調完婚。

吳雨霏 洪立熙

Kary與網球王子 Brian青梅竹馬, 09年戀情曝光,二人三離三合,直至 13年 Kary與拍拖半年的余文樂分手,才發現最愛早在身邊,於是疊埋心水嫁,二人於去年 7月在意大利酒莊行禮,再返港補擺酒。

撰文、攝影、攝錄:娛樂組


鍾意就快D Share啦!