九龍灣時昌迷你倉四級大火，燒足108小時，連日市民感激消防員嘅付出、為2名消防員不幸殉職，感到痛心，紛紛留言為消防員打氣，在前線消防員最艱辛嘅日子，網民不斷為消防送上祝福，傳媒及團體亦自發捐款，大火終於在上周六深夜撲滅，消防員已平安回家，演藝界噚日召集9家本地電子傳媒拍片向前線消防員致敬，又呼籲藝人一隻手拎住寫上「#向前線消防員致敬」兼另一隻手亮起手機電筒燈，影張相放上facebook，打埋hashtag（新聞連結：http://bit.ly/291RbTZ），收集相片放落MV，仲話會錄歌《真的英雄》向香港消防員致敬。一夜之間被唔少網民批評演藝界抽水兼粉墨登場做大龍鳯（新聞連結：http://bit.ly/28Y0i3q）。森美今早喺電台節目《早霸王》反擊話佢哋「偽善」嘅網民，佢唔明點解啲人會批評藝人呢個行動，森美講起「致敬」係冇先後、快慢同多少，佢話：「先後，致敬有幾快，反應有幾快，你嘅致敬有幾快，同你嘅致敬程度無關，你十年後仲會記得消防員做過嘅嘢，你仲記得今日個消防員嘅名，十年後先致敬，覺得你仲真心，邊有得計算。」佢認為人哋做好事（拍MV致敬），啲人可以唔信服：「你去抨擊人只會顯示到你未睇清楚呢件事，我只係覺得你未睇清楚份事，你係一個『道德警察』，但呢件事唔係一個道德嘅問題，因為呢個係一個絕對嘅問題，肯定係絕對，冇正負。」小儀話佢唔明點解啲人會咁，森美就叫佢理解下啲人咁諗就冇咁嬲，佢認為件事冇對錯、冇先後、冇多少，仲話網民覺得呢個世界有對錯，覺得PO相呃like：「咁我做得，你做得，係你唔做，你唔做係你唔表達你嘅敬佩，唔代表人哋表達敬佩係錯，同你唔相同嘅嘢唔代表你係錯，件事係本身冇對錯，最重要係唔同你一樣嘅唔代表你要用極端嘅方法去話人。」佢又話自己唔係對呢件事有咩意見，又唔知情況點知，森美強調呢個社會上好多事唔係一定有AB畀你選擇：「致敬唔致敬，你一定係致敬，件事係我哋同理心嘅展現，係人類嘅基本。」佢認為目前港人對政治嘅熱愛係最高峯嘅時期，佢以前讀大學時係冇理咁多政治嘅事，冇咁多學生上街，當然每一樣嘢都涉及一個政治議題喺入面，不過致敬活動見唔到政治議題喺裡面。佢批評啲反對活動嘅人生活當中，平時諗得太多政治議題，就覺得只有啱同錯，只有1同2，樣樣嘢都批評，仲叫啲人為人諗多步，諗批評人嘅原因係咩。」節目開咪講咗近一個鐘，事後佢接受《蘋果》訪問時，力撐演藝界話：「呢個絕對係一件啱嘅事，如果有覺得啱嘅嘢唔敢講，係一個白色恐怖，將來乜都自我審查，會影響到政治理念，民生課題都唔敢開聲，都唔係一個好嘅現象。！」
|
鍾意就快D Share啦！
|
|
|
