「千億新抱」徐子淇於2006年下嫁恒基二少李家誠（Martin），踏上豐足的豪門路！適逢今年是結婚十周年，子淇接受《東網》專訪，分享鮮為人知的豪門生活，更大爆老公如何愛錫她。如果要為幸福評分，她不諱言自己是100分幸福滿瀉！
幸福爆燈
徐子淇於2006年12月跟李家誠在澳洲舉行世紀婚禮，哄動一時，從此被冠以「千億新抱」名譽。婚後為千億家族誕下兩女兩子，湊成兩個「好」字，人生完美到極致。轉眼間，這段童話婚姻十年了，外間對她有支持有妒忌，她又如何評價自己的幸福度？子淇直言是100分幸福爆燈！
自覺只係普通家庭
不過，外界形容「一入豪門深似海」，入了這個「深海」十年的子淇雖已是四個小朋友的母親，但依舊帶點孩子氣，她笑說：「可能係外面啲人睇得多電視劇，『豪門』係人哋嘅一個標籤，我冇特別考慮（係咪豪門）！我覺得我哋嘅家庭只係老爺比較知名啲、或者屋企舒服啲，但其實都係普通家庭，或者咁樣（指外間）包裝個故事會吸引啲。」
「我着平衫又冇人寫」
談及老爺李兆基，子淇讚他是一個很開通的老人家：「完全冇咩豪門規矩，係好簡單嘅生活，我亦都着好多平價衫，可能未必有人影到，同埋我每次出嚟嘅場合都要着得比較莊重啲，我着平衫又冇人寫。」
「老公當我仔咁錫」
夫妻相處之道乃老生常談之事，子淇自言跟丈夫性格不同，但價值觀卻十分一致：「佢年紀都大我幾多，識好多嘢，好多事可以幫我解決，咁佢教我嘅時候又會覺得自己好威，哈哈！（當你女咁錫？）佢當我係仔咁錫，因為細仔同我性格一樣。」
自嘲冇煮餸天分
子淇又讚老公廚藝了得，反而自己只懂煮公仔麵：「佢煮嘢好叻，亦好鍾意煮，有時佢去外國會買牛扒自己煎，又識整龍蝦，我好盡力煮都係唔得！應該係天分問題，只會整蛋糕，所以我哋一家生日都唔會買蛋糕，仔女大咗可以同我一齊整，亦係好好嘅親子時間。」子淇笑言結婚十年，當年的結婚照至今還未揀相，因為每日時間都不夠用，故下定決心今年一定要把婚照挑好，不能再拖。
希望小朋友努力
雖然丈夫是恒基兆業集團的接班人，但子淇重申不管在甚麼家庭出生，也應該靠自己努力生活：「我唔希望小朋友覺得出生喺知名家庭，就唔需要努力，每件事都要用心盡力去做，呢種態度好緊要。」她又指自己是四個孩子的媽媽，知道小朋友很需要愛，故回饋社會也選擇幫助有關小朋友的慈善機構，老公對此十分支持又鼓勵！
難忘世紀婚禮
兩夫婦今年剛好結婚十周年，回味十年前的世紀婚禮，她仍甜絲絲說：「其實原本我哋想揀個陽光海灘嘅地方，可以望住個海，但因為有好多親戚長輩唔係咁方便，所以最後揀咗澳洲。今年十周年我哋都揀咗一個地方，同幾個朋友靜靜哋咁過。」
暑假來了，子淇透露會舉家旅行休息，以為她已經遊遍世界，她卻說有很多地方還沒去過：「埃及、土耳其，有好多地方都想去，但未有機會。之前一直想睇北極光都去唔到，有次竟然坐飛機嘅時候啱啱飛過睇到，好幸運！」子淇的人生，真．幸運！
|
鍾意就快D Share啦！
|
|
|
