探熱針
吳國敬做膽 拖麥包何婉盈升呢做馬主
已經十七年冇出過唱片的吳國敬，可以在一潭死水的唱片市場出靚聲 Hi-Fi碟，原來同馬有關。近年開始對馬匹有興趣的他，跟是馬主的 BMA老闆羅傑承講馬經外，二人更一拍即合做埋唱片。有門路關係，最近升呢做埋馬主的吳國敬，更聯同麥包、何婉盈等一班朋友，合股三百萬購入四匹馬，準備在澳門出賽。
三百萬投一份
吳國敬說，買馬跟唱歌一樣，自己本來就不懂樂理，手上的大熱作，只憑一腔熱誠。
「我唔係馬房出身，唔係馬圈嘅人，但對馬好有熱誠，感染到好多鍾意馬嘅人，呢種 passion，亦感染埋身邊朋友。」吳國敬說。
數月前，吳國敬跟一班朋友集資三百萬，分別在澳洲及美國，購入四匹馬，並準備在澳門出賽，阿敬吹雞，第一時間獲麥包響應。
「我同麥包識咗好多年，佢喺群組話有興趣叫預埋佢，之後仲要求其中一隻馬用佢個名命名，所以有一隻改咗叫『麥包之星』。」
師兄阿叻冇份
早前有傳師兄劉浩龍是今次團體馬主之一，卻因容祖兒事前不知情而被「投訴」，阿敬澄清說：「股東名單入面有個名叫師兄，我最初都一廂情願以為劉浩龍有份，但其實係另有其人。（咁陳百祥有冇份？）冇！叻哥係另一個層次，我哋係初階，入門組。」
據了解，吳國敬、麥長青和何婉盈有份投資的四隻馬仍在受訓中，起碼要等三個月到半年，才決定是否達標出賽。
「希望啲馬將來出賽有好成績，贏多啲獎金。唔貪心嘅！贏咗嘅獎金夠養番啲馬就得，不過，我相信我哋揀嘅馬，唔會差！」吳國敬說。
𦧲飯應
個人冇出碟多年的吳國敬，今次用盡三十年功力，炮製靚聲 Hi-Fi碟《 Amplitude》，原來是由羅傑承太太梁芷珊激活。
「羅太搵我，我直情要𦧲飯應。隻碟兩三年前已經開始籌備，當中都有波折；今次我會做啲唔同一般 Hi-Fi碟嘅嘢，靚聲之外，歌曲同質素都會多元化，會係 Full Band形式。」吳國敬說。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
