2016年7月7日 星期四

脫歐平玩英國 姚子羚拍拖湊仔熱定身 [壹週刊 - 1374] 脫歐,姚子羚,M1,

娛樂偵訊脫歐平玩英國 姚子羚拍拖湊仔熱定身35歲姚子羚與拍拖一年半,屋企大把物業大把的士的鄭子邦上月甜蜜歐遊,二人親密攬腰攬頸,十足預支蜜月。早前被好姊妹龔嘉欣爆婚訊,但姚子羚說男友「的士邦」未求婚,更強調一定唔會今年嫁。哦,咁出年囉!英鎊脫歐抵晒英國脫歐,半年冇拍劇的姚子羚趁住英鎊跌,同男友鄭子邦去英國度假,順便探朋友。「一早plan好咗,仲有其他朋友一齊去,只係咁啱撞正脫歐,所以好抵玩!除咗英 ...


娛樂偵訊

脫歐平玩英國 姚子羚拍拖湊仔熱定身

35歲姚子羚與拍拖一年半,屋企大把物業大把的士的鄭子邦上月甜蜜歐遊,二人親密攬腰攬頸,十足預支蜜月。早前被好姊妹龔嘉欣爆婚訊,但姚子羚說男友「的士邦」未求婚,更強調一定唔會今年嫁。哦,咁出年囉!

英鎊脫歐抵晒

英國脫歐,半年冇拍劇的姚子羚趁住英鎊跌,同男友鄭子邦去英國度假,順便探朋友。

「一早 plan好咗,仲有其他朋友一齊去,只係咁啱撞正脫歐,所以好抵玩!除咗英國,佢哋仲去埋羅馬,跟住再返英國探朋友。」姚子羚身邊人說。同「的士邦」拍拖已是公開事,對戀情事一直低調處理的姚子羚,今次歐遊一反常態,又拖又攬放閃。

「一來喺外地,氣氛唔同,加上一班朋友咁去,感覺一定 free啲!所以 Elaine(姚子羚)同阿邦影相都好放鬆,似十足新婚夫婦咁,班朋友入面有個小朋友,係阿邦朋友個仔, Elaine同阿邦當正自己仔咁,成日爭住湊,真係快啲拉埋,自己生番個」

母愛爆棚

Elaine與阿邦朋友的兒子很投契,除了經常照顧他之外,還不時逗他玩,母愛爆棚。

阿邦與 Elaine都愛小朋友,他們對同行朋友的兒子視如己出,經常「一家三口」影相留念, Elaine更愛跟小朋友自拍,好溫馨。

廿幾歲接手生意

行程先到英國玩幾天,之後轉去羅馬逗留近一星期,尾站折返英國留多兩日,一行人七月初回程。

「阿邦要睇住啲生意,唔可以走太長時間, Elaine返香港都要傾開新劇嘅事,所以只係玩咗十幾日。」

今年初,姚子羚被收養的狗狗「通仔」咬傷面,傷口深到要入院縫針,並即時停工。破相連推兩部劇,停工的她一直在男友位於紅山半島的屋企養傷,二人關係,已密不可分。

「阿邦好叻講嘢,有啲人會以為佢唔踏實,其實阿邦廿幾歲,佢哋父母就先後走咗,咁後生就要接手老豆嘅的士生意,所以一定有番咁上下獨立能力。佢兩個一齊已經年半,感情好穩定,之前 Elaine俾狗咬傷,本身諗住可用化妝品遮住照拍劇,但阿邦反對,堅持要 Elaine同公司攞假,休息養傷。」

不介意沒有二人世界, Elaine反而與阿邦的朋友及親戚有說有笑,俾足面男友, Elaine是個很貼心的女朋友。

在英國玩了幾日,臨返港前一晚, Elaine與男友去了 London Eye睇夜景兼拍照留念。

就算 Elaine與阿邦早已公開戀情,但二人很少在人前有親密舉動,今次歐遊,他們會拖手行街,又會攬腰攬頸合照,很難得。

聽男友話唔再搏

本來只打算停工兩個月,結果姚子羚足足休息了半年。

「 Elaine喺無綫超過十年,捱咗咁耐終於可以孭正,喺《四個女仔三個 BAR》同《張保仔》嘅表現都俾人大讚;但畢竟都三十五歲,都想結婚,阿邦雖然唔會阻止佢發展事業,但亦講過女仔應該要有個男人照顧先叫幸福,暗示女友唔好太搏命。 Elaine都好認同,所以先放慢晒腳步,拍拖先,事業後。」姚子羚身邊人說。

在大台捱了十多年,終於爬到花旦之位的 Elaine,為了男友,寧願放慢事業上的步伐,享受生活。

女友受傷的日子裡,阿邦對她加以照顧,是位百分百好男友。

阿邦相識滿天下,人緣甚好,識落很多圈中人,還經常帶 Elaine出席私人聚會,可見二人感情穩定。

早前有傳阿邦在派對溝阿 Sa,其實二人相識多年,是一對好朋友。

雖然被愛犬咬傷過,但 Elaine並沒有嬲牠,最近更帶牠去做寵物義工。

阿邦每日都會返的士行處理業務,是位勤力的老闆。

男友有膊頭

之前姚子羚被愛犬咬傷,曾接受過本刊訪問的「的士邦」公開認定女友地位,男友有膊頭肯承擔,姚子羚大可坐定定等做鄭太。

被愛犬咬傷的 Elaine,得到男友全天候照顧,令二人的感情一日千里。

壹:係咪認定呢個男朋友?

邦搶答:係我認定佢,講笑啫。

壹:幾時結婚?

姚:好番先,養傷先,都想快啲做嘢。

壹:外面傳你哋秘密結婚。

姚:絕對冇啲咁嘅事。暫時工作,結婚就你諗嘞(笑住指向男友)。

邦:以我咁嘅性格,唔會嘅,如果結婚,好事一定會講出嚟。

壹:冇計劃過幾時?

邦:拍多一陣拖先,如果結婚,真係會同你哋講。

壹:會唔會要小朋友?

邦:如果結婚,會想要小朋友。

壹:生幾多個?

姚:交俾個天,幾多個冇所謂。

邦:交俾我,唔係淨係交俾個天。

撰文、攝影、攝錄:娛樂組


鍾意就快D Share啦!
Related Posts Plugin for WordPress, Blogger...